Փաստ ինֆո

Հիմա Թուրքիայում առկա են  հետդարձի քայլեր. եթե ժամանակին ասում էին, որ Ադրբեջանը Թուրքիայից շատ բան ունի սովորելու՝ աշխարհիկ, ժողովրդավարական, լինելով մահմեդական պետություն, առաջ շարժվելու համար, ապա այսօր այնպիսի տպավորություն է, կարծես տեղի է ունենում ճիշտ հակառակը՝  այլանդակ ավտորիտար Ադրբեջանն այսօր օրինակ է դառնում Թուրքիայի համար: Հանրային հեռուստաընկերության «Հարցազրույց» հաղորդմանը տված զրույցում այս մասին նշել է ՀՀ արտաքին գործերի նախարարի տեղակալ Շավարշ Քոչարյանը: 

Հայ-թուրքական հարաբերությունների կարգավորման հարցում խնդիրն այն է,  ըստ փոխնախարարի, թե դեպի ո՞ւր է գնում Թուրքիան. «Կարգավորման գործընթացը ենթադրում էր, որ Թուրքիան պետք է դառնա ավելի քաղաքակիրթ, ըստ էության, դա նաև ենթադրում էր՝ այն ճանապարհը, որը մինչ այդ Թուրքիան անշեղորեն ընտրել, գնում էր դեպի Եվրոպա»,- ընդգծել է Շ.Քոչարյանն՝ հավելելով, որ այն բարեփոխումները, որ Թուրքիան ժամանակին արել էր դեպի Եվրոպա, փորձում է այժմ հետ բերել՝ դա վերաբերում է մարդու իրավունքներին, լրագրողների իրավունքներին:  Թուրքիայում Սահմանադրական փոփոխություն են փորձում կատարել, որով նախագահը պետք է ստանա այպիսի լիազորություններ, ինչպիսին մինչ այդ չի ունեցել: «Ուշադրություն դարձրեք, հատկանշական է, որ մեզ մոտ սամանադրական բարեփոխումների առանցքը երկիրն ավելի ժողովրդավարական դարձնելն է: Այնպես որ մենք ունենք պրոբլեմ»,- նկատել է  Շ.Քոչարյանը:

ԱԳ նախարարի տեղակալը փաստել է, որ Հայաստանը՝ լինելով ինքնաբավ քաղաքակրթություն, միշտ եղել է թիրախ հակաքաղաքակրթական ուժերի համար: «Ժամանակին դա նույն Օսմանյան կայսրությունն էր: Եվ այսօր պատահական չէ, որ Թուրքիան, կարծես, երկու լարի վրա է խաղում, բայց մյուս կողմից ակնհայտ է, որ Թուրքիան, այնուամենայնիվ, սատարում է այն ուժերին, որոնք հակաքաղաքակրթական են: Այստեղ մենք իրոք ունենք խնդիր,  և մենք պետք է դա հստակ գիտակցենք, բայց, այնուամենայնիվ, գիտակցելով հանդերձ, համապատասխանաբար վարենք մեր արտաքին քաղաքականությունը»:

Թուրքիայում առաջին դեմքերի մակարդակով հնչած խոսքերը՝  «մենք հայերի հետ երկխոսում ենք, գաղտնի բանակցում ենք, դուք մի՛ խառնվեք», ըստ Շ.Քոչարյանի,  պարզունակ դիվանագիտական հնարք է, դա,  իհարկե, լիովին չի համապատասխանում իրականությանը: «Այսօր մենք բանակցելու խնդիր չունենք, քանի որ կան ստորագրված արձանագրություններ, և մենք բազմիցս ասել ենք. «Վավերացրե՛ք, կյանքի կոչե՛ք, առաջ շարժվենք»: Սա է իրավիճակը: Բայց մյուս կողմից, իհարկե, աշխարհը չի կարող անտարբեր անցնել, որովհետև նաև այդ արձանագրությունների վավերացումը և կյանքի կոչելը որոշակի լակմուսային թղթի պես ցույց է տալիս, թե որքանով է Թուրքիան պատրաստ լինել այնպիսին, ինչպիսին ինքն իրեն հռչակում է»,-ընդգծեց ԱԳ փոխնախարարը: