Փաստ ինֆո

2014թ. հունիսի 23-ին, էլեկտրաէներգիայի անհիմն թանկացման համար ինքնաբուխ բողոքի ակցիայի ժամանակ, իշխանության ներկայացուցիչներն՝ ոստիկաններն են բռնություն կիրառել ակցիայի մասնակիցների նկատմամբ: Այս մասին այսօր՝ իշխանության ներկայացուցչի նկատմամբ բռնության գործով դատական նիստում, հայտարարեց բերման ենթարկված վկա Հարություն Աղլամազյանը:

Ըստ նրա՝ տվյալ օրն ակցիայի մասնակիցները հավաքվել են Հանրային ծառայությունները կարգավորող հանձնաժողովի շենքի դիմաց՝ էլեկտրաէներգիայի անհիմն թանկացման վերաբերյալ  հանրության ձայնը լսելի դարձելու նպատակով, կոչ անելով, որպեսզի ապօրինի թանկացում տեղի չունենա:

Ոստիկանները՝  մոտենալով ակցիայի  մասնակիցներին,  հորդորել են, որ շենքի մոտից հեռանան, սակայն  ցուցարարները չեն լքել ակցիայի  վայրը: Դրանից հետո,  ըստ վկայի,  իրենց ընկերներից մեկին ոստիկանները բռնությամբ տեղափոխել են ոստիկանության «Գազել» մակնիշի ավտոմեքենան: 

Ակցիայի մասնակիցները՝ թույլ չտալով, որ իրենց ընկերոջը տեղափոխեն «Գազել»-ով, համախմբված կանգնել են մեքենայի դիմաց, սակայն որոշ ժամանակ անց դեպքի վայրում ոստիկանների թիվը շատացել է, վերջիններս կոպտորեն ակցիայի մասնակիցներին քաշքշելով ու ձեռքերից ու ոտքերից բռնելով՝  ազատել են ավտոմեքենայի առջևի մասը  և ակտիվիստին տեղափոխել ոստիկանություն:

Ակցիայի մասնակիցները Հանրային ծառայությունները կարգավորող հանձնաժողովի շենքի մոտից շարժվել են դեպի Սարյան փողոց, և, քանի որ ոստիկանները վերցրել էին նրանց բարձրախոսը, վկայի խոսքով,  իրենք չեն կարողացել հրահանգներ տալ իրենց համախոհներին, թե այսուհետ ինչ պետք է անել:

Ի դեպ,  վկան նշեց, որ այդ մասին փաստող տեսանյութեր կան, նա  չմոռացավ  հավելել, որ քրեական գործեր կան հարուցված նաև ոստիկանների նկատմամբ:

Վկայի պնդմամբ՝ ոստիկանները բարձրախոսով ցուցարարներին ուղղված որևէ կոչ չեն արել, հակառակը՝ ոստիկաններն իրենց պահվածքով այնքան էին բորբոքել մթնոլորտը, որ ակցիայի մասնակիցները չէին հասկանում, թե ինչ է տեղի ունենում:

Վկան նաև պատմեց, թե ինչպես են իրեն բերման ենթարկել ոստիկանություն. ինքը Սարյան փողոցում կանգնած է եղել, երբ իրեն մոտեցել է 4 ոստիկան, ձեռքերից ու ոտքերից բռնելով տեղափոխել «Գազել» ավտոմեքենան  ու տարել ոստիկանության Կենտրոնի բաժին: Գործով միակ ամբաստանյալ Նարեկին ևս բերման են ենթարկել, սակայն  ինչպես՝  վկան չի տեսել: Վկան ընդգծեց, որ  ոստիկանը, ում, ըստ մեղադրանքի,  իբր հարվածել է Նարեկը, իր հետ նստել է նույն «Գազելը», սակայն հարված ստանալու մասին որևէ խոսք չի եղել:

Վկան հայտնեց, որ իր ու Նարեկի պես նույն ճակատագրին են արժանացել ևս շուրջ 27 ակտիվիստներ, ովքեր  տարբեր մեքենաներով այդ  օրը բերման են ենթարկվել ոստիկանություն: 

Մեղադրողի համար անհավանական էր, թե ինչպես կարող են մարդուն կանգնած վիճակում ոտքերից բռնելով տեղափոխել: Ի պատասխան մեղադրողի հարցի՝ վկան պնդեց իր ցուցմունքը՝ նշելով, որ չի հիշում հաջորդականությունը՝  սկզբում ոտքերից են բռնել, հետո՝ ձեռքերից,  թե հակառակը, սակայն նշեց, որ ոտքերից ու ոտքերից բռնելով՝ տարել, նստեցրել են  ավտոմեքենան:

Վկան իր հերթին հարց ուղղեց  դատախազին՝ « դեպքի օրվա տեսանյութերը չե՞ք նայել», ինչին ի պատասխան դատախազը հայտարարեց, որ իրեն պետք չի տեսանյութեր դիտել և որ դա «քրեական գործի հետ կապ չունեցող բան ա»:

Վկան հայտնեց նաև, որ Նարեկին ճանաչում է ակցիաներից, սակայն չի հիշում, որ նա երբևէ ոստիկանության աշխատակիցների հետ կոնֆլիկտի բռնվի: Ըստ  նրա, Նարեկն այդ օրը շատ ակտիվ չի էլ եղել:

Հաջորդ դատական նիստում կհետազոտվեն գործում առկա գրավոր ապացույցները:

Ըստ մեղադրանքի՝ Նարեկը 2014թ. հունիսի 23-ին՝ ժամը 14:00-ի սահմաններում, Երևան քաղաքի Սարյան փողոցի 22 շենքի մոտ տեղի ունեցող բողոքի ակցիայի ընթացքում ծառայողական պարտականությունները կատարելու կապակցությամբ կյանքի կամ առողջության համար ոչ վտանգավոր բռնություն է գործադրել իշխանության ներկայացուցիչ հանդիսացող, ՀՀ ոստիկանության Երևան քաղաքի վարչության ՊՊԾ գնդի երրորդ հատուկ գումարտակի ծառայող, ոստիկանության սերժանտ Կ.Սաղաթելյանի նկատմամբ՝ նրան պատճառելով առողջությանը թեթև վնասի հատկանիշներ չպարունակող մարմնական վնասվածքներ:

Մեղադրական եզրակացության համաձայն՝ Նարեկը մեկ անգամ ոտքով հարվածել է Սաղաթելյանի ձախ հետույքային շրջանին և մեկ անգամ բռունցքով հարվածել է նրա գլխի ետևի շրջանին:

Նարեկին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով՝ իշխանության ներկայացուցչի կյանքի կամ առողջության համար ոչ վտանգավոր բռնություն գործադրելը, նրա նկատմամբ որպես խափանման միջոց է ընտրվել չհեռանալու մասին ստորագրությունը: