Փաստ ինֆո

 

«Մենք, անշուշտ, շարունակելու ենք Ցեղասպանության միջազգային ճանաչման և դատապարտման ուղղությամբ համախմբված գործունեությունը, և ես վստահ եմ, որ արդեն տեսանելի է այն օրը, երբ հասնելու ենք մեր նպատակին»:

 

ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչության փոխանցմամբ, այս մասին հայտարարել է  աշխատանքային այցով Ամերիկայի Միացյալ Նահանգներում գտնվող Նախագահ Սերժ Սարգսյանը՝ Վաշինգտոնի հայ համայնքի հետ հանդիպման ժամանակ իր ողջույնի խոսքում: 

 

Հայաստանը ղեկավարն ընդգծել է, որ անկասկած, իրավացի էր մեծ հումանիստ Անատոլ Ֆրանսը, երբ ասում էր որ Հայաստանը վերջին շունչն է փչում, բայց կվերածնվի: Այն մի փոքր արյունը, որ դեռ մնում է, ինչպես նա էր ասում, շատ թանկագին է, ու դրանից մի հերոսական սերունդ է ծնվելու:

 

Այն ժողովուրդը, որ չի ուզում մեռնել, երբեք չի մեռնի: «Ու ծնվեց այդ հերոսական սերունդը, այն սերունդը, որ անկախություն կերտեց, այն սերունդը, որ ազատագրեց Լեռնային Ղարաբաղը և այն սերունդը, որ այսօր լծվել է Հայաստանի շենացման գործին»,- հավելել է Հայաստանի նախագահը:

 

Սերժ Սարգսյանն ընդգծել է, որ  Լեռնային Ղարաբաղի հիմնախնդիրը «շարունակում է լինել մեր ամենաառաջնային հարցերից մեկը»: Հայաստանի դիրքորոշումն  եղել և մնում է միջազգային իրավունքի սկզբունքների հիման վրա խնդրի խաղաղ կարգավորումը՝ համահունչ ԵԱՀԿ Մինսկի խմբի համանախագահների և համանախագահող երկրների դիրքորոշմանը:

 

«Ես շատ ուրախ եմ, որ Արցախի պետականաշինության գործին արդեն սատարել են ԱՄՆ հինգ նահանգներ, և սա ամբողջովին ձեր աշխատանքի արդյունքն է»,- դիմելով ամերիկահայ համայնքի ներկայացուցիչներին՝  Հայաստանի ղեկավարը շնորհակալություն է հայտնել նրանց  դրա համար:

 

ՀՀ նախագահը համոզմունք է հայտնել, որ անկախ որևէ հանգամանքից՝  համակարգված աշխատանքի շնորհիվ «մենք կկարողանանք Արցախը դարձնել միջազգային իրավունքի և հարաբերությունների լիարժեք սուբյեկտ»: Այն արդեն կայացած պետություն է՝ իր ինստիտուտներով, ժողովրդավարական ընտրությունների փորձով, և դա անդառնալի գործընթաց է:

 

Հաջորդ նպատակն, ըստ Նախագահի,  Հայաստանը տնտեսապես կայուն, զարգացող, դիվերսիֆիկացված ու ներդրումների համար գրավիչ երկիր դարձնելն է: «Այստեղ մենք որոշակի հաջողություններ ունենք գործարար և ներդրումային միջավայրի բարելավման, բաց երկնքի քաղաքականության, ազատ տնտեսական գոտիների ստեղծման, ինչպես նաև գիտելիքահենք տնտեսության խրախուսման շնորհիվ»:

 

Հայաստանում տարեցտարի մեծանում է նաև ամերիկյան գործարարության ներկայությունը, նշել է Սերժ Սարգսյանը, և այժմ Հայաստանում գործում են ամերիկյան կապիտալով 400-ից ավելի ընկերություններ, իսկ այս տարի՝ «կարծում եմ հաշված օրերի ընթացքում, հայկական շուկայում կսկսի գործել ամերիկյան «Կոնտուր Գլոբալ» ընկերությունը՝ իր 250 մլն ԱՄՆ դոլարի հասնող ներդրումային կապիտալով, որը Հայաստանի Հանրապետության պատմության ընթացքում ամենախոշոր ամերիկյան ներդրումն է»:

 

ՀՀ նախագահը պատահական չի համարել, որ իր ներկա աշխատանքային այցի շրջանակներում  ստորագրվել է Հայաստանի և ԱՄՆ-ի միջև Առևտրի և ներդրումների շրջանակային համաձայնագիրը (TIFA), որն արձանագրում է Հայաստանի տնտեսության, ինչպես նաև հայ-ամերիկյան տնտեսական համագործակցության ոլորտում  հաջողությունները և փոխգործակցության նոր դռներ է բացում: «Սա նշանակում է, որ երկու երկրների գործարարների միջև համագործակցությունը պետականորեն խրախուսվում է»,- նշել է Ս.Սարգսյանը:

 

Հայաստանի ղեկավարը   հորդորել է բոլոր հայերին՝  շարունակել ակտիվորեն ներգրավվել Հայաստանի Հանրապետության պետականաշինության գործին: «Նախկինում մեր խնդիրն էր՝ բարեգործությունից անցնել փոխադարձ շահութաբեր գործընկերության: Այսօր արդեն մեր խնդիրն է՝ ընդլայնել այդ գործընկերությունը, հատկապես, որ ԵԱՏՄ-ին Հայաստանի անդամակցությունը նոր հնարավորություններ է բացում այսպիսի գործունեության համար: Մենք ԱՄՆ-ի, Կանադայի, Շվեյցարիայի, Ճապոնիայի և Նորվեգիայի հետ ունենք «Արտոնությունների ընդհանրացված համակարգից» (GSP) օգտվելու հնարավորություն, իսկ Եվրամիության հետ օգտվում ենք «Արտոնությունների ընդհանրացված համալրված համակարգից» (GSP+), սա նշանակում է, որ հայ գործարարների համար նոր շուկաներ են բացվել»,- ընդգծել է երկրի ղեկավարը: