Փաստ ինֆո

Կրակել են նրա վրա, նա պատճառ չի ունեցել ինքնասպան լինելու: Զինվորի ինքնասպանության գործով այսօրվա դատական նիստում հայտարարեց մահացած զինծառայող Մանուչար Մանուչարյանի եղբայրը: Միաժամանակ նա կարծիք հայտնեց, որ հնարավոր չէ զենքով մի քանի ժամ կանգնել պահակակետում և զենքի վրա չմնան մատնահետքեր:

Տուժողի իրավահաջորդ Օնիկ Մանուչարյանն անվստահություն հայտնեց նախաքննական մարմնին`  կատարված նախաքննությունը գնահատելով ոչ օբյեկտիվ:

Նրա ներկայացմամբ` ռազմական ոստիկանության աշխատակիցները Մանուչար Մանուչարյանի  ինքնասպանության համար փորձել են մի քանի վարկած առաջ քաշել, անգամ փորձել են  ռոք երաժշտության հետ կապել, որը սիրել է լսել Մանուչարը: Ապա առաջ է քաշվել աղջկա վարկածը, թեե Մանուչարը սիրահարված է եղել,ով նրան  մերժել է, ինչի պատճառով էլ Մանուչարն ինքնասպան է եղել:

Պարզվում է խոսքը նրա դասընկերուհու մասին է. ծառայության ընթացքում նրանք հեռախոսային կապի մեջ են գտնվել, աղքջիկն անգամ գնացել է Մանուչարին տեսակցության, երբ վերջինս հոսպիտալում է եղել:

Տուժողի իրավահաջորդը նախ բացառեց սիրահարվածության պատճառով եղբոր ինքնասպանություն կատարելու վարկածը, ապա նշեց, որ եղբայրն ընկերուհի չի ունեցել:  Ինչ վերաբերում է այդ աղջկան, ապա նա, ըստ տուժողի իրավահաջորդի, իր եղբոր «ճաշակով» չէր:

Տուժողի իրավահաջորդը հայտարարեց, որ այդ աղջկան 2 անգամ հրավիրել են ռազմական ոստիկանություն, համոզել ու թելադրել, որ գրի այն, ինչպես ասում են, սակայն աղջիկը հրաժարվել է ցուցմունք գրելուց:

Զորամասում շրջանառվող վարկածն էլ վերաբերել է աղանդին, թե, իբր, Մանուչարը Եհովայի վկա աղանդավորական շարժմանն է հարել և դա է եղել ինքնասպանության պատճառը: Այս վարկածը եւս մահացած զինծառայողի եղբայրը կտրականապես հերքեց:

Ըստ նրա` այս ամենը կատարվել է դեպքի հանգամանքները փոփոխելու նպատակով:

Օնիկ Մանուչարյանը վստահորեն նշեց, որ  եթե եղբայրը ծառայության ընթացքում խնդիրներ ունենար, ապա այդ մասին իրեն կտեղեկացներ, սակայն եղբայրը ծառայության ընթացքում զորամասի մասին միշտ լավ է արտահատվել:

Ինչ վերաբերում է գործով մյուս տուժող Լիբիկ Մկրտչյանի դատարանում արված այն հայտարարությանը, թե Մանուչարին ասել են շորեր լվանա կամ կոշիկներ մաքրի, ապա եղբայրը նշեց, որ դժվար թե նա հակադարձ պատասխան չտար:

Ըստ մեղադրանքի՝ Բաբկեն Գաբոյանը սեփական անձի վարկանիշը բարձրացնելու, համածառայողների շրջանում ենթադրյալ առավելությունը ցույց տալու, գերակայությունն ամրապնդելու նպատակով, կատարել է իր լիազորությունների և իրավունքների սահմաններից դուրս դիտավորյալ գործողություններ:

Երեկոյան «քուն» հրամանից հետո  զորանոցում զինծառայության պարտականությունները կատարելու հետ կապ չունեցող առիթով՝ իր քաղաքացիական շորերը լվանալու պահանջը չկատարելու համար Բ.Գաբոյանի, ինչպես նաև նույն զորամասի ժամկետային զինծառայող, սերժանտ Արման Ստեփանյանի կողմից Մ.Մանուչարյանի նկատմամբ բռնություն է գործադրվել: Նախաքննական մարմնի գնահատմամբ` Մանուչարը պարբերաբար ենտարկվել է ծեծի, ստորացումների, անձնական արժանապատվությունը նվաստացնող գործողությունների ու ծաղրի, որի հետևանքով նրա մոտ զարգացել է «Սուր դեպրեսիվ հակազդում», որն արտահայտվել է տրամադրության դիսթիմիկ ֆոնով, ընկճվածությամբ, հուսահատվածությամբ, ստեղծված իրավիճակից որպես անելանելի ընկալման զգացողությունով: Արդյունքում՝ վերջինս 31.07.2013թ.՝ ժամը 13:00-ի սահմաններում, իրեն ամրակցված ԱԿՍ-74 տեսակի ինքնաձիգով ենթակզակային շրջանում կրակոց արձակելով գործել է ինքնասպանություն, այսինքն՝ անզգուշությամբ պատճառվել է այլ ծանր հետևանք։