Փաստ ինֆո

Սեռական շահագործման նպատակով կանանց թրաֆիքինգի գործով նախորդ նիստին պաշտպանական կողմը դատարանին ինքնաբացարկ է հայտնել, իսկ այսօր փոշմանեց ու ետ վերցրեց՝ խնդրելով դատարանին շարունակել գործի քննությունը:

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում, նախագահությամբ Արշակ Վարդանյանի, այսօր գործով տուժող Ելենա Նիկողոսյանի և նրա վկա՝ մոր ցուցմունքներն անցան դռնփակ, քանի որ չէր բացառվում, որ հրապարակվեր տուժողի սեռական կյանքին վերաբերող մանրամասնություններ:

Դատարանի այս որոշմանը դեմ արտահայտվեց ամբաստանյալ Հերիքնազ Խաչատրյանի պաշտպան Հրանտ Գևորգյանը, հայտարարելով, որ «էտ երբվանի՞ց են մարմնավաճառները կաշկանդվում, փողոցում կանգնում են՝ չեն ամաչում, դատարանում ամաչու՞մ են»:

Նշենք, որ նախորդ դատական նիստում տուժողը ցուցմունք էր տվել, սակայն պաշտպանական կողմն այսօր կրկին ցանկացավ հարցեր ուղղել նրան: Այնուամենայնիվ տուժողի ցուցմունքն անցավ դռնփակ, ինչպես որ նրա վկա՝ մոր ցուցմունքը:

Ամբաստանյալի պաշտպան Հրանտ Գևորգյանը հանդես եկավ միջնորդությամբ՝ դատարանին խնդրելով մեղադրական եզրակացությունը հետ ուղարկել՝ խմբագրման և վերափոխման համար:

Պաշտպանը միջնորդությունը փորձեց հիմնավորել նրանով, որ իր պաշտպանյալի քրոջ` Բավական Խաչատրյանի, գործի շրջանակներում, ով արդեն դատապարտված է, տուժողներից մեկի մասով մեղադրողը հրաժարվել է մեղադրանքից, սակայն իր պաշտպանյալին մեղադրանք է առաջադրել, այն դեպքում, որ, ըստ մեղադրանքի, քույրերը հանցագործությունը կատարել են նույն խմբի կազմում:

Դատարանը միջնորդությունը մերժեց՝ ակնհայտ անհիմն լինելու պատճառաբանությամբ, հավելելով, որ ներկա փուլում գործը՝ մեղադրական եզրակացությամբ, մեղադրողին վերադարձնելու ինստիտուտ քրեական դատավարության օրենսգրքով չի նախատեսվում:

Նշենք նաև, որ այսօրվա նիստին չէր ներկայացել ամբաստանյալը: Դատարանը ներկաներին տեղեկացրեց, որ նախորդ նիստի ժամանակ տուժող՝ Ելենա Նիկողոսյանի հարցաքննության ընթացքում, որը եղել է դռնփակ, ամբաստանյալի նկատմամբ սանկցիա է կիրառվել և նա 2 ժամով հեռացվել է դատական նիստերի դահլիճից:

Ըստ մեղադրանքի՝ Հերիքնազ Խաչատրյանը, բնակվելով Արաբական Միացյալ Էմիրությունների Դուբայ քաղաքում, ինչպես նաև Նելլի Ներսիսյանի ղեկավարությամբ զբաղվելով մարմնավաճառությամբ, միավորվելով վերջինիս և Հայաստանում բնակվող իր ավագ քրոջ՝ Բավական Խաչատրյանի, հետ, անդամագրվել է մարդկանց շահագործման նպատակով ստեղծված կազմակերպված խմբին, որի ղեկավարն է Նելլի Ներսիսյանը:

Նրանք իրենց հանցավոր մտադրությունն իրագործելու նպատակով կատարել են համապատասխան դերաբաշխում: Ըստ այդմ՝ Նելլի Ներսիսյանը, ղեկավարելով հանցավոր խմբի գործողությունները, անձամբ կազմակերպել է հավաքագրված անձանց մուտքի հրավեր ստանալը, կատարել նրանց Դուբայ տեղափոխելու հետ կապված ծախսերը, իսկ Հերիքնազ և Բավական Խաչատրյանները կատարել են կանանց հավաքագրման և Դուբայ տեղափոխելուն, փոխանցելուն, թաքցնելուն ուղղված գործողություններ:

Հերիքնազ Խաչատրյանին մեղադրանք է առաջադրվել ՀՀ քրեական օրենսգրքի 2 հոդվածներով՝ ՀՀ քրեական օրենսգրքի 132-րդ և 34-132-րդ հոդվածների 3 մասի 1-ին կետով՝ կազմակերպված խմբի կողմից մարդու թրաֆիքինգը կամ շահագործումը և դրա փորձը: Նրա նկատմամբ որպես խափանման միջոց է ընտրվել կալանավորումը: