Փաստ ինֆո

«Այո, իսկապես, մտահոգիչ է նաև մեզ համար, որ  առանձին դեպքերում առանձին հանձնարարականներ և Հայաստանի դատաիրավական բարեփոխումների ծրագրի առանձին միջոցառումներ ժամկետանց են»,- Ազգային ժողովի այսօրվա նիստում՝ կառավարության հետ հարցուպատասխանի ժամանակ, հայտարարեց ՀՀ արդարադատության նախարար Հովհաննես Մանուկյանը՝  համաձայնելով «Հայ ազգային կոնգրես» խմբակցության անդամ Գագիկ Ջհանգիրյանի հետ և կիսելով նրա «մտահոգության որոշ դրվագները»:

Նախարարը նշեց, թե հիմա չէր ցանկանա խորանալ պատճառների մեջ. դրանք բազմաբնույթ են, ապա առաջարկեց առանձին աշխատանքային քննարկման ժամանակ համատեղ վերլուծել, թե ինչ պետք է անել, որպեսզի չշարունակվի ծրագրից հետ մնալու գործընթացը և որակական առումով այդ նախագծերը չտուժեն:

Ընդդիմադիր պատգամավորը, մասնավորապես, ասել էր, թե մտահոգված է ՀՀ նախագահի կարգադրությամբ հաստատված՝ Հայաստանի դատաիրավական բարեփոխումների 2012-2016թ.թ.-ի ծրագրի և դրանից բխող միջոցառումների իրականացման կապակցությամբ: Ըստ նրա՝ 2012թ.-ից մինչ օրս իրականացվել է ծրագրում ընդգրկված հարցերի 1/3-ից պակասը:

«Եթե բովանդակային ենք քննարկում, ապա նկատում ենք, որ իրականացվում են միմիայն այնպիսի օրենսդրական նախաձեռնություններ, որոնք ամրապնդել են դատական բուրգը, մեծացրել են Վճռաբեկ դատարանի նախագահի ազդեցությունն այդ բուրգի նկատմամբ և, իմ անձնական կարծիքով, ավելի  կախյալ վիճակի մեջ դրել մեր ստորադաս դատարաններին և դատավորներին: Երկրորդը՝ ինձ մտահոգում է այն մեթոդոլոգիան կամ տեխնիկան, որով իրականացվում է այս ծրագիրը»,-ասել էր Գ.Ջհանգիրյանը՝ պարզաբանելով, որ կարևորագույն օրենսգրքերի կապակցությամբ աշխատանքային խմբեր են ստեղծվում, մշակվում են հայեցակարգեր, դրանք հաստատվում են կառավարությունում, հետո այդ հայեցակարգերի հիման վրա նախագծեր են պատրաստվում, որից հետո նախագծերը գալիս են Ազգային ժողով:

Գ.Ջհանգիրյանը, որպես օրինակ, անդրադարձել էր ՀՀ քրեական դատավարության նոր օրենսգրքի բազմաչարչար նախագծին՝ նշելով.  «Մեկ տարուց ավելի է՝ մենք աշխատում ենք  այս օրենսգրքի վրա, 10 ամսից ավելի աշխատեցին հեղինակները, բերել են մի մեծ «լավաշ», որում ԱԺ պետական-իրավական հարցերի հանձնաժողովի առաջին 10 սկզբունքային դիտողությունների դիմաց գրել են «քննարկելի»:

Պատգամավորն ընդգծել էր, որ, առանց այդ առանցքային հարցերը գոնե հայեցակարգային մակարդակով համաձայնեցնելու, անիմաստ է ՔրԴատՕր գրել: «Հետևաբար՝ Ազգային ժողովն ընդհանրապես դուրս է մնում այս օրենսդրական բարեփոխումների իրականացումից»,-ասել էր նա՝ հավելելով, որ, այս տեմպերով շարժվելու դեպքում, «բարեփոխումը չարափոխում ենք սարքելու, որովհետև իրականում առաջիկա 2 տարիների տեմպերն ավելի են դանդաղելու»: