Փաստ ինֆո

Շնորհակալ ենք բոլոր այն մարդկանց, ովքեր մասնակցել են Հայոց ցեղասպանության 100-րդ տարելիցի միջոցառումներին, մեր ցավը կիսել և հավատալով նպաստել են մեր վերածննդին:

Այս մասին Ազգային ժողովի հայտարարությունների ժամին հայտարարեց «Ժառանգություն» խմբակցության քարտուղար Թևան Պողոսյանը:

Ընդդիմադիր պատգամավորը ԱԺ կանոնակարգ-օրենքով հայտարարության համար նախատեսված 3 րոպեն օգտագործեց՝ իր և իր 5 զավակների անունից անուն առ անուն «պարզ մարդկային շնորհակություն» հայտնելով՝ Հռոմի Պապից մինչև Քիմ ու Քլոյե Քարդաշյաններ, Քանյե Ուեսթ, «System of a Down» ռոք խմբի անդամներ: Հայտարարությանը հետևեցին պատգամավորների ծափահարությունները:

Նշենք, որ հայտարարությունների համար հերթագրված մոտ երկու տասնյակ պատգամավորների գերակշռող մասն անդրադարձավ վերջին օրերի խորհուրդին՝ ոչ միայն շնորհակալություն հայտնելով միջազգային հանրությանը, այլև՝ բարձր գնահատելով տարելիցի կապակցությամբ կազմակերպված միջոցառումները:

«Ավարտվեցին Հայոց Մեծ Եղեռնի 100-րդ տարելիցին նվիրված միջոցառումները, որոնք բացառիկ էին իրենց կազմակերպվածությամբ ու համազգային համախմբվածությամբ: Հատուկ գնահատականի է արժանի միջոցառումների  էության և կազմակերպման քաղաքակիրթ մատուցումը: Տարելիցը յուրահատուկ քննաշրջան դարձավ նաև քաղաքակիրթ աշխարհում մարդու իրավունքները և համամարդկային արժեքները որպես պետական առաջնահերթություններ հռչակող պետությունների համար»,-մասնավորապես հայտարարեց «Ժառանգություն» խմբակցության ղեկավար Ռուբիկ Հակոբյանը: 

Ռ.Հակոբյանն ընդգծեց. «Վերջին շրջանում այս համազգային համախմբումն ու միասնական բռունցքը յուրօրինակ քաղաքական և բարոյական վարկ էր մեզ բոլորիս` Հայաստանը այս վիճակից դուրս բերելու համար: Եկեք գոնե այս անգամ արդյունավետ օգտագործենք քաղաքակիրթ աշխարհի և համազգային ուժերով հավաքած այս անչափելի վարկը»: 

«Հայոց ցեղասպանությունից հարյուր տարի անց մենք աշխարհին ներկայանում ենք ուժեղ, անկախ, ինքնիշխան հայոց պետականությամբ և Հայաստանի Հանրապետություն, Սփյուռք ու Արցախի Հանրապետություն միասնությամբ»,-իր հերթին հայտարարեց ԱԺ փոխնախագահ Էդուարդ Շարմազանովը՝ համոզմունք հայտնելով, որ «սա է գլխավոր խորհուրդը, որ մենք կարող ենք արձանագրել Հայոց ցեղասպանությունից հարյուր տարի անց»:

Անդրադառնալով Թուրքիայի պահվածքին, նա ընդգծեց, որ այնտեղ ոչ ադեկվատ ընդունվեցին թե Հայաստանում կազմակերպված միջոցառումները, թե գործընկերներ երկրներից հնչած գնահատականները: Ի պատասխան՝ Թուրքիայի ԱԳՆ-ն սկսեց քննադատել այդ երկրների առաջնորդներին կամ ներկայացուցիչներին:

«Սա խոսում էր մի կարևորագույն փաստի մասին՝ թուրքերի ծրագիրը տապալվել էր. Գալիպոլին տապալվեց և այնպես տապալվեց, որ նրանք շփոթված ուղիղ եթերում ցուցադրեցին ոչ թե Գալիպոլին, այլ Ծիծեռնակաբերդի միջոցառումը:

Նրանք այնպես տապալվեցին, որ կոչ էին անում Օլանդին և Պուտինին՝ օբյեկտիվություն պահպանել Լեռնային Ղարաբաղի հարցում, և մտահոգված էին, որ Մինսկի խմբի համանախագահ երկու երկրների նախագահները գտնվում էին Երևանում: Մեկը լինի, հարց տա՝ դուք ի՞նչ գործ ունեք Մինսկի խմբի համանախագահության հետ»,-նշեց ԱԺ փոխնախագահը:

Ըստ Է.Շարմազանովի, ԼՂՀ-ն փաստացի կայացած ժողովրդավարական երկիր է, ինչում միջազգային դիտորդները կհամոզվեն մայիսի երեքին կայանալիք խորհրդարանական ընտրությունների ժամանակ՝ հավելելով. «Եվ սա այն դեպքն է, որ Հայկը չի կարող պարտվել Բելին, Հայկը միշտ հաղթելու է Բելին»: