Փաստ ինֆո

Բելգիայի պատվիրակությունը այցելում է Հայաստան, երբ հայ ժողովուրդը, միջազգային հանրությունը նշում են Հայոց ցեղասպանության 100-րդ տարելիցը, ոգեկոչում զոհերի հիշատակը։

Բելգիան այն երկրներից է, որը դեռ 1998թ. ճանաչել է  Հայոց ցեղասպանությունը: Հայաստանում նաև որպես Եվրախորհրդի նախարարների կոմիտեի նախագահ գտնվող Բելգիայի փոխվարչապետ, արտաքին գործերի, առևտրի և եվրոպական հարցերով նախարար Դիդիե Ռեյնդերսի  հետ համատեղ մամուլի ասուլիսում այսօր նշել է ՀՀ արտաքին գործերի նախարար Էդվարդ Նալբանդյանը:

ՀՀ արտգործնախարարը լրագրողներին հայտնել է, որ «մենք այսօր հնարավորություն ունեցանք բանակցությունների ընթացքում խոսելու երկկողմ հարաբերությունների, Եվրախորհրդի շրջանակներում իրականացվող համագործակցության մասին»: Քննարկման թեմաներից էր նաև բելգիական նախագահության առաջնահերթությունների իրականացման ընթացքը: «Հայաստանը 2013թ. նախագահում էր Եվրախորհրդի նախարարների կոմիտեում, և երբ համեմատում ենք մեր առաջնայնությունները, ապա դրանք շատ մոտ են, եթե չասենք, որ շատ հարցերում համընկնում են: Մենք ողջունում ենք Եվրախորհրդում Բելգիայի բավական հաջող նախագահությունը, որը արդեն եզրափակիչ փուլ է մտնում: Մայիսի 19-ին կկայանա նախարարական հանդիպումը, և ես հաստատեցի դրան իմ մասնակցությունը»,- նշել է Է.Նալբանդյանը։

Երկկողմ ձևաչափով քննարկումների ժամանակ  անդրադարձ է եղել  իրավապայմանագրային դաշտի ընդլայնմանը, խոսվել է առևտրատնտեսական փոխանակումների մասին, որոնց ծավալը 2014թ. կազմել է մոտ 150 մլն ԱՄՆ դոլար, այս ցուցանիշը նվազել է 2013թ. համեմատ, երբ այն կազմում էր՝ 200 մլն ԱՄՆ դոլարից ավել: «Իհարկե, մենք ունենք շատ ավելի մեծ ներուժ և պետք է համատեղ ջանքերով նոր ծրագրեր մշակենք՝ առևտրատնտեսական համագործակցությունը խթանելու համար: Դրա հնարավորությունները կան, բազմաթիվ բիզնես ֆորումներ են անցկացվել, առևտրական պալատն է գործում, որը բավական ջանքեր է գործադրում այդ ուղղությամբ»,- ասել է Հայաստանի արտգործնախարարը:

Հայաստանի ու Բելգիայի արտաքին քաղաքական գերատեսչության ղեկավարները  խոսել են նաև միջխորհրդարանական շփումների զարգացման մասին, անդրադարձել  տարբեր տարածաշրջանային, միջազգային հարցերի:  «Չմոռանամ նշել, որ բանակցություններին նաև կարևոր տեղ էր հատկացվել Հայաստան - ԵՄ համագործակցությանը, հատկապես՝ Ռիգայի գագաթաժողովին ընդառաջ նախապատրաստական շրջանում»,- հավելել է Էդվարդ Նալբանդյանը:

ՀՀ ԱԳ նախարարն իր գործընկերոջը   ներկայացրել է  Հայաստանի և եռանախագահների համատեղ ջանքերն՝ ուղղված Լեռնային Ղարաբաղի հիմնախնդրի բացառապես խաղաղ կարգավորմանը: Կարծիքներ են փոխանակվել  միջազգային օրակարգի տարբեր հրատապ խնդիրների շուրջ՝ Ուկրաինայում իրավիճակը, զարգացումները Միջին Արևելքում և այլ հարցեր:
«Մենք հուսով ենք, որ այն ակտիվ շփումները, որ մենք մշտապես ունեցել ենք նախկինում և ունենք տարբեր ձևաչափերում, միջազգային համաժողովների ընթացքում, որոնք միշտ օգտագործել ենք՝ հանդիպելու, կարծիքներ փոխանակելու համար, մենք կշարունակենք նույն, միգուցե առավել ինտենսիվությամբ»,- եզրափակել է իր խոսքը ՀՀ արտգործնախարարը: