Փաստ ինֆո

«Այն, ինչ կատարվեց 1915թ-ին և շարունակվեց հաջորդ տարիներին աննախադեպ էր իր ծավալներով և հետևանքներով: Հայ ժողովրդի արևմտյան հատվածը, որ հազարամյակներով ապրել էր իր տանը, իր բնօրրանում, իր հայրենիքում, տեղահանվեց և բնաջնջվեց՝  համաձայն պետականորեն մշակված ծրագրի, բանակի, ոստիկանության, այլ պետական կառույցների և հատուկ այդ նպատակով բանտերից ազատ արձակված հանցագործներից կազմված հրոսակախմբերի անմիջական մասնակցությամբ»,- այսօր Ծիծեռնակաբերդում՝ Հայոց ցեղասպանության զոհերի ոգեկոչման պաշտոնական արարողության ժամանակ ունեցած իր ելույթում ասաց  ՀՀ նախագահ Սերժ Սարգսյանը՝ միաժամանակ հավելելով, որ մարդկային լեզուն անզոր է փոխանցելու այն, ինչ ապրեց մեր ժողովուրդը: «Սոսկ հայ  լինելու պատճառով 1.5 մլն մարդ սպանվեց՝ հավերժական լռության մեջ թաքցնելովմարդկային ցեղի աներևակայելի վայրագությունները, մի մասն էլ վերապրեց սեփական օրինակով սերնդեսերունդ փոխանցելով պատմության պատգամը»,- իր ելույթում նշեց նախագահ Սարգսյանը:

«Ցավոք, ապրիլ ամիսն իր սև հետքը թողեց ոչ միայն հայ ժողովրդի, այլև ողջ մարդկության պատմության մեջ: Այդ ամիսն է համարվում նաև Հոլոքոստի, Ռուանդայում և Կամբոջայում իրականացված ցեղասպանությունների սկիզբը»,- ասաց Նախագահ Սերժ Սարգսյանը՝ հավելելով, որ այսօր Ծիծեռնակաբերդի հուշահամալիրում բարձրաձայնվում է մեկ միասնական ցանկություն, որ «այսուհետ աշխարհի ոչ մի երկրում հուշահամալիրներ կառուցելու կարիք չլինի՝ հիշատակելու մարդկության պատմության նոր ամոթալի էջեր»:

Սերժ Սարգսյանն իր ելույթում հիշեցրեց նաև Հռոմի Պապի արտասանած հետևյալ խոսքերը. «Չարիքի քողարկումը կամ դրա մերժումը նման է նրան, որ վերքն առանց վիրակապելու շարունակի արյունահոսել»:

«Վերքն արնահոսում է, որովհետև աշխարհում շատ են չեզոքությունը, լռությունը, ժխտողականությունը և պակաս՝ մարդկայնությունը»,- ասաց Սերժ Սարգսյանն ու նաև հիշեցրեց, որ դարեր շարունակ հենց մարդասիրությունն ու մարդկայնությունն են եղել մարդու իրավունքների միջազգային կառուցակարգերի շարժիչ ուժը, համամարդկային արժեքներով տոգորված է ստեղծվել «Կարմիր Խաչի միջազգային կոմիտեն», Հայոց Ցեղասպանության իրողությունից դրդված ու բարոյական արժեքներով առաջնորդվելով էր, որ Ռաֆայել Լեմկինը ստեղծեց «Ցեղասպանություն» եզրույթը:

«Երբ Լեմկինին հարցնում էին, թե ինչ է ցեղասպանությունը, նա պատասխանում էր՝ դա այն է, ինչ պատահեց հայերի հետ»,- ասաց նախագահն ու շարունակեց. «Այսօր էլ քիչ չեն համամարդկային արժեքների ժխտման ու պատմության խեղաթյուրման դեպքերը, որոնք նպաստում են նմանատիպ հանցագործությունների կրկնությանը»:

Սերժ Սարգսյանն իր ելույթում հիշեցրեց նաև Դեր Զորում իր արտասանած ելույթը : «Մեզ այլևս անհնար է վախեցնել կամ շանտաժի ենթարկել, որովհետև մենք տեսել ենք ամենասարսափելին: Այսուհետ մենք ապրելու և արարելու ենք կրկնապատիկ ուժով՝ և՛ մեր , և՛ մեր անմեղ զոհերի փոխարեն»,- ասաց նախագահը՝ հիշեցնելով, նաև, որ անցյալ տարի Դեր Զորում պայթեցվեց Ցեղասպանության զոհերի եկեղեցին՝ հայ նահատակների սուրբ մասունքների հետ միասին:

«Ցեղասպանության ճանաչումը աշխարհի տուրքը չէ հայ ժողովրդին, Ցեղասպանության ճանաչումը մարդկային խղճի և արդարության հաղթանակն էանհանդուրժողականության ու ատելության հանդեպ»,- ասաց նախագահը՝ համայն հայության անունից շնորհակալություն հայտնելով Երևանում գտնվող 4 երկրների նախագահներին, միջազգային ողջ հանրությանը ի դեմս Ծիծեռնակաբերդի հուշահամալիրում այսօր ներկա  միջազգային կառույցների ներկայացուցիչների, ինչպես նաև այսօր Ստամբուլի Թաքսիմ հրապարակում հավաքվածներին: «Նրանք ուժեղ մարդիկ են և ճիշտ գործ են անում իրենց հայրենիքի համար»,- ասաց նախագահը՝ հերթական անգամ վերահաստատելով, որ հայ ժողովուրդը մշտապես կանգնելու է նրանց կողքին, ովքեր տառապել են մարդկության դեմ գործված հանցվագործություններից: «Ցեղասպանությունների դեմ միջազգային անզիջում պայքարը մեր արտաքին քաղաքականության անբաժամ մասն է լինելու»,- ասաց ՀՀ նախագահը: