Փաստ ինֆո

Նոր ցուցադրությամբ իր դռներն է բացել  Հայոց ցեղասպանություն ինստիտուտ-թանգարանը: Այն մինչև ապրիլի 25-ը բաց կլինի  արտասահմանյան պատվիրակությունների համար՝ տեխնիկական ու անվտանգության նկատառումներից ելնելով, իսկ դրանից հետո Հայոց ցեղասպանության թանգարան-ինստիտուտ կարող են այցելել բոլոր այցելուները: 

 Հայոց ցեղասպանության հարյուրերորդ տարելիցի ոգեկոչման միջոցառումների շրջանակներում Ծիծեռնակաբերդի հուշահամալիրը,  Հայոց ցեղասպանություն ինստիտուտ-թանգարանն ու հարակից տարածքը հիմնավերանորոգվել են «Ծիծեռնակաբերդ» բարեգործական հիմնադրամի միջոցներով: 

 Հայոց ցեղասպանության հուշահամալիրի հիմնավերանորոգման աշխատանքները  տեղի են ունեցել 2011-2014թթ.,  բարեկարգվել է  Ծիծեռնակաբերդի ճեմուղին և հարակից տարածքը, հիմնավերանորոգվել  թանգարան-ինստիտուտի հիմնական մասնաշենքը, կառուցվել վարչական մասը՝ գրադարան, գիտաժողովների սրահ, պահոցներ և այլն: Արդյունքում  թանգարանի ցուցադրական տարածքը ընդարձակվել է երկուսուկես անգամ՝ կազմելով 2400 քառակուսի մետր: Ընդ որում, Հայաստանում առաջին անգամ կիրառվել են նոր տեխնոլոգիաներ՝  թանգարանային ցուցադրության բովանդակային լուծումները,   տեքստային նյութերն ու բացատրագրերը հիմնված են Ցեղասպանագիտության ոլորտում վերջին տարիների գիտական ու մեթոդական մշակումների վրա:

Լրագրողների հետ զրույցում Հայոց ցեղասպանության թանգարան-ինստիտուտի տնօրեն Հայկ Դեմոյանը նշեց, որ շինարարության համար ծախսվել է 4.5 միլիոն դոլար, ամբողջը ֆինանսավորվել է բարերարների կողմից: Ըստ  Հայկ Դեմոյանի, դիզայներներն ու թանգարան-ինստիտուտի աշխատողները լրացուցիչ գումարներ չեն ցանկացել ստանալ՝ իրենց կատարած լրացուցիչ աշխատանքների դիմաց: «Շնորհակալություն պետք է հայտնենք մեր բարերարներին, հատկապես՝ Գաբրիել Ճեմբերջյանին, Ռալֆ Յիրիկյանին, թանգարանի հավաքածուն մշտապես հարստացնելու համար աջակցություն ցույց տված մոսկվայաբնակ մեր հայրենակից Ջևան Չելոյանցին: Մենք աշխատել ենք մեր սովորական աշխատավարձերով: Պետական բյուջեից գումարներ չեն ծախսվել: Միայն հովանավորների և բարերարների աջակցությամբ է տեղի ունեցել»,- ասաց նա:

Թանգարանային մշտական ցուցադրության մեջ ամփոփվել են վերջին 7-8 տարիների հավաքչական աշխատանքի արդյունքում ձեռք բերված հազարավոր նորահայտ նյութեր, որոնց մի մասը ներկայացված է տպագիր, ինչպես նաև մուլտիմեդիայի՝ պրոյեկտորների և հպումով աշխատող էկրանների տեսքով:   

Ինչպես «Փաստինֆո»-ի թղթակցին հայտնեց թանգարան-ինստիտուտի փոխտնօրեն Սուրեն Մանուկյանը, եթե նախկինում ցուցադրությունը ներկայացված էր  երեք սրահներում, ապա հիմա ցուցադրական նոր տարածքն ունի  12 սրահ: Փոխտնօրենը գոհունակություն հայտնեց, որ «հսկայական քանակությամբ ավելացել է օրիգինալ նյութը»: Մասնավորապես, վերջին մի քանի տարվա ընթացքում թանգարանի հավաքածուն կրկնապատկվել է բնօրինակ նյութերով՝  դրանք հատել են 90  հազարի սահմանը: Ս.Մանուկյանը նշեց, որ 52 խորագրերով  փորձ է արվում ներկայացնել ամբողջ պատմությունը՝ Ցեղասպանությունից մինչև Ցեղասպանության ժխտողականություն:

«Փորձել ենք ներմուծել Ցեղասպանագիտության բոլոր նոր նվաճումները:  Համոզված եմ, որ ոչ մի բաց հարց այստեղ չի մնում»,- ասաց թանգարան-ինստիտուտի փոխտնօրենը՝ միաժամանակ հավելելով՝  «ամենալավ դատավորը այցելուն է՝ ոչ լրագրողներն են, կներեք, ոչ էլ պաշտոնյաները, ամենալավ դատավորը սովորական այցելուն է»: