Փաստ ինֆո

20-րդ դարի առաջին՝  Հայոց ցեղասպանության մեկդարյա տարելիցի շրջանակներում ապրիլի 22-23-ին  Երևանում կայանալիք «Ընդդեմ ցեղասպանության հանցագործության»  հասարակական-քաղաքական գլոբալ ֆորումը կբացի ՀՀ նախագահ Սերժ Սարգսյանը:

 Լրագրողների հետ այսօրվա հանդիպմանը ՀՀ արտաքին գործերի փոխնախարար Կարեն Նազարյանը հայտնեց, որ ելույթներով հանդես կգան ՀՀ ազգային ժողովի նախագահը, վարչապետը, արտաքին գործերի նախարարը, իրենց մասնակցությունը կունենան նաև կառավարության անդամներ, պատգամավորներ: Ակնկալվում է, որ ֆորումին կմասնակցեն բարձրաստիճան դիվանագետներ, օտարերկրյա խորհրդարանականներ, միջխորհրդարանական վեհաժողովների ներկայացուցիչներ, միջազգային իրավունքի, այդ թվում՝  Ցեղասպանագիտության,  հանրահայտ մասնագետներ, միջազգային իրավապաշտպան կազմակերպությունների, հեղինակավոր լրատվամիջոցների, վերլուծական կենտրոնների ներկայացուցիչներ:

Համաժողովը նվիրված է լինելու ոչ միայն  Հայոց ցեղասպանությանը, այլ առհասարակ Ցեղասպանության հանցագործությանը:  

 ՀՀ արտաքին քաղաքական գերատեսչության ներկայացուցիչը նշեց, որ երկօրյա ֆորումը նախատեսված է անցկացնել ինտերակտիվ քննարկումների և մեկ լիագումար նիստի միջոցով: Առաջին թեման նվիրված է լինելու միջազգային իրավունքի տեսանկյունից մարդկության հանդեպ ոճրագործությունների կանխարգելման խնդիրներին,  հատուկ ուշադրություն է դարձվելու տարբեր վայրերում իրականացված զանգվածային բռնարարքների ուսումնասիրությանը, մասնավորապես, ինչպիսի ազդեցություն կարող է ունենալ Ցեղասպանության ժխտողականությունը միջազգային անվտանգության ու մարդու իրավունքների վրա:

Երկրորդ նիստում կքննարկվեն Ցեղասպանության հետևանքների վերացման ու պատասխանատվության խնդիրները,  Ցեղասպանության չկրկնվելու երաշխիքները, չլուծված խնդիրները, ֆորումի մասնակիցներին հնարավորություն կընձեռնվի հանդես գալ մեկնաբանություններով, ելույթներով, բանավեճի մեջ մտնել հիմնական զեկուցողների հետ:

Իսկ լիագումար նիստում «Խորհրդարանականներն ընդդեմ ցեղասպանության» թեմայով քննարկման ընթացքում նախ և առաջ նախատեսվում է, որ  ելույթներով հանդես կգան տարբեր երկրների խորհրդարանականներ կամ  խորհրդարանական պատվիրակություններ, որոնք համապատասխան հայտարարություններով, բանաձևերով ճանաչել են Հայոց ցեղասպանությունը: Դա նպատակ ունի բարձրաձայնել  այն էական ներդրման մասին, որ խորհրդարանականները կարող են ունենալ հանցագործության կանխարգելման և տևական խաղաղության հաստատման ու ամրապմնդման գործում:       

Համաժողովը մասնակիցների աննախադեպ մասշտաբ ունի՝ սպասվում է մոտ 600 մասնակից՝ քննարկումները կլուսաբանվեն հայաստանյան, ինչպես նաև  օտար լրատվամիջոցների կողմից:   

ՀՀ Նախագահի աշխատակազմի ղեկավար, Հայոց ցեղասպանության 100-րդ տարելիցին նվիրված միջոցառումները համակարգող Վիգեն Սարգսյանը հավելեց, որ  ֆորումի մեջ ևս երկու ֆորում է տեղի ունենալու՝ «Եկեղեցիներն ընդդեմ ցեղասպանութան հանցագործության. մարդկային կյանքն Աստծո պարգև»  հոգևոր ֆորումը և  Սփյուռքի նախարարության և ԵՊՀ կողմից կազմակերպված Իրավաբանների միջազգային համաժողովը՝  նվիրված Ցեղասպանության հանցագործության դեմ պայքարի խնդիրներին:

Վիգեն Սարգսյանը Հայոց ցեղասպանության ոգեկոչման միջոցառումների շարքում կարևորեց վերջին երկու տարիների ընթացքում Ցեղասպանության խնդրի շուրջ  հրատարակված մոտ երկու հազար անուն գրքի ցուցադրությունը՝ այն նախապատրաստական փուլն է մեծ «Book-expo»-ից առաջ: Հարյուրերորդ տարելիցի միջոցառումների շարքում Վ.Սարգսյանը կարևորեց նաև «շատ ազդեցիկ լուսանկարչական ցուցահանդեսը»՝ այսօր աշխարհի ամենահայտնի լուսանկարիչների մասնակցությամբ, մարդիկ,  ովքեր աշխատում են ամենավտանգավոր կետերում,  ցուցահանդեսի վրա աշխատել է ոլորտում  ամենահայտնի միջազգային փորձագետը:

Վիգեն Սարգսյանը հիշատակեց նաև Հայաստանի սահմաններից դուրս ոգեկոչման համերգների մասին՝ շատ մեծ թափով իրականանում է «Քեզ հետ, Հայաստան» ծրագիրը, որի շրջանակներում աշխարհահռչակ նվագախմբերը իրենց համերգաշարքից մեկ համերգ նվիրում են Հայոց ցեղասպանության զոհերի հիշատակին: Առաջիկայում նաև ոչ հայ շրջանակի հանդիսատեսի համար այդպիսի մեծ համերգներ  տեղի կունենան  Բրյուսելում,  Սանկտ Պետերբուրգի Մարինինյան թատրոնում, Նյու Յորքի Կառնեգի Հոլլում: 

Լրագրողների հետ հանդիպմանը նշվեց, որ «System of a Down»  ռոք խմբի տղաները, ովքեր  հայտնի են երկար տարիների իրենց պայքարով  Հայոց ցեղասպանության ճանաչման համար,  մեծ ոգևորությամբ ընդունեցին  համերգ և դրան նախորդող համաշխարհային համերգաշար  կազմակերպելու գաղափարը: Արդյունքում  հարյուր հազարավոր մարդկանց համար  Քյոլնում, Լիոնում,  Մոսկվայում, Ամստերդամում, Լոնդոնում համերգներ տեղի ունեցան և  կա համերգների շարունակության միտում: Համերգը կրում է  «Wake up, souls» շատ խոսուն վերտառությամբ անվանում:

Համերգները հայտնվեցին ռոք երաժշտության սիրահարների և միջազգային մամուլի ուշադրության կենտրոնում, ինչը Վիգեն Սարգսյանի գնահատմամբ,  Հայաստանը միլիոնավոր մարդկանց ուշադրության կենտրոն է դարձնում և կարևոր է  իրազեկության բարձրացման առումով:  

Հայոց ցեղասպանության 100-րդ տարելիցին նվիրված միջոցառումները համակարգողը նաև հայտնեց, որ այս շաբաթվա ընթացքում հայտարարվելու է  «Սրբոց նահատակաց» եկեղեցու կառուցման վայրն ու տեսքը: Այն  կառուցվելու է Երևանում Կոմիտասի պանթեոնում և   Կոմիտասի թանգարան-ինստիտուտի  հետ մեկտեղ լրացնելու է Կոմիտասի պանթեոնի պուրակի ամբողջական անսամբլը:  

Նշենք, որ աննախադեպ թվով հյուրերի այցելության պարագայում աննախադեպ է լինելու ոստիկանների թիվը: Ինչպես հայտնեց ՀՀ Ոստիկանության պետի տեղակալ Սամվել Հովհաննիսյանը,  այսօրվանից ոստիկանությունում  հայտարարված է արտակարգ ծառայություն, արդեն իսկ ներգրավվել են  ութ հազար ոստիկանության ծառայողներ,  և այդ թիվը մինչև ապրիլի 24-ն ու բուն ապրիլի 24-ին  կհասնի մոտ 12  հազարի: