Փաստ ինֆո

Զինծառայողի ինքնասպանության գործով այսօրվա նիստն սկսվեց երկրորդ տուժող Լիբիկ Մկրտչյանի հարցաքննությամբ, ով զինակից ընկերոջ մահվանից մոտ 2 տարի անց էլ չգիտի վերջինիս ինքնասպանության պատճառը:

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում այսօր տուժողը հարցաքննության գրեթե ողջ ընթացքում նշեց, որ դեպքից բավականին շատ ժամանակ է անցել և ինքը չի հիշում որոշ մանրամասներ:

Տուժողը ծառայել է 2012-2014թթ.-ին՝  ամբաստանյալների և մահացած զինծառայողի հետ միասին, և, ըստ նրա, փոխհարաբերությունները եղել են նորմալ:

Ըստ տուժող Լիբիկ Մկրտչյանի՝ ամբաստանյալներ Բաբկեն Գաբոյանը և Արման Ստեփանյանը իրենց վաշտում համարվել են հեղինակություններ , նրանց հարգել են, նրանց խոսքն ընդունել:

Տուժողը նշեց, որ իր և ամբաստանյալ Բաբկեն Գաբոյանի միջև անախորժ  միջադեպ եղել է, վերջինս իրեն ինչ-որ տեղ է ուղարկել, սակայն ինքը չի գնացել, առաջացել է  վիճաբանություն, մեկ անգամ էլ Գաբոյանը   հրել է իրեն, սակայն ի վերջո նրանք զրուցել են ու հաշտվել:

Ըստ տուժողի, երբ  Գաբոյանը հրել է իրեն, տվյալ պահին այդտեղ այլ անձինք ևս եղել են, բայց թե ովքե՞ր՝ չի հիշում:

Զինծառայող Մանուչար Մանուչարյանի ինքնասպանության օրը տուժող Լիբիկ Մկրտչյանը Գաբոյանի ասելով մաքրություն է կատարել,  թեև օրապահ չի եղել։ «Սերժանտս է եղել, ասել է, արել եմ»,- հավելեց տուժողը:

Մահացած զինծառայող Մանուչար Մանուչարյանի վերաբերյալ  տուժողն իրարամերժ ցուցմունքներ էր տալիս. նախ  նշեց, որ ամբաստանյալ Արման Ստեփանյանը Մանուչարին հրել է, ապա ասաց, որ հարվածել է:

Զինծառայության ժամանակ սերժանտներին՝ գործով անցնող ամբաստանյալներին, հակադարձելն արդյո՞ք լուրջ հետևանքներ կունենար հարցին ի պատասխան՝  տուժողն ասաց, որ  նորմալ կլիներ, սակայն նրանց ասածները մասնավորապես ինքը լսել և արել է:

Ինչ վերաբերում է մեղադրանքի այն դրվագին, ըստ որի ամբաստանյալները պահանջել են, որ տուժողը լվանա իրենց շորերը,  նա հերքեց՝ հավելելով, որ նրանց շորերն ինքը չի լվացել, ավելին՝ նման պահանջ չի էլ եղել:

Արդյո՞ք ամբաստանյալները կարող էին ստիպել, որ մահացած զինծառայողը լվանա իրենց հագուստները՝  տուժողը պատասխանեց, որ մի անգամ լսել է, թե ինչպես է Գաբոյանը Մանուչարյանին ասում, որ լվանա իր հագուստները, սակայն դժվարացավ ասել վերջինս լվացել է, թե ոչ:

Տուժողի իրավահաջորդի ներկայացուցչի այն հարցին, թե ինչպես է իմացել զինակից ընկերոջ մահվան մասին՝ տուժող Լիբիկ Մկրտչյանը նշեց, որ կրակոցներ է լսել, ապա զորամասում խոսակցություններից  տեղեկացել է, որ Մանուչարը մահացել է:

Նա հայտնեց նաև, որ հնչել է մեկից ավելի կրակոց, բայց չհիշեց, թե կոնկրետ քանի հատ և  մենահատ է եղել, թե կրակահերթ:

Տուժողը չէր հիշում նաև, թե դեպքի օրը քանի անգամ է մահացած զինակցին տեսել:

Ըստ տուժող Լիբիկ Մկրտչյանի՝ անվանականչից հետո, երբ բոլորը պառկել են քնելու, Ստեփանյանը 2-րդ հարկի  մահճակալների վրայով քայլելով գնացել  և ոտքով հրել է Մանուչարյանին, բռնել նրա կոկորդը, իսկ թե հետո ինչ է եղել՝ տուժողը կրկին չէր հիշում:

Ըստ նրա, մահացած զինծառայողը շատ մարդկանց հետ չի շփվել, սակայն վստահորեն ասաց, որ դեպքին նախորդող ժամանակահատվածում Մանուչարյանի և ամբաստանյալ Արման Ստեփանյանի հարաբերությունները նորմալ են եղել:

Ըստ տուժողի բնութագրման, ինքնասպան եղած զինակից ընկերը խելոք, համեստ անձնավորություն էր  և նրան հրելը կամ կոկորդից բռնելը չէր կարող ինքնասպանության պատճառ հանդիսանալ:

Հաջորդ՝ ապրիլի 28-ին կայանալիք նիստում կհարցաքննվի տուժողի իրավահաջորդ՝ մահացած զինծառայողի եղբայրը:

Ըստ մեղադրանքի՝ ՀՀ ՊՆ N զորամասի ավագ հետախույզ, կրտսեր սերժանտ Բաբկեն Գաբոյանը տեղ գնալու իր պահանջը չկատարելու կապակցությամբ՝ «սեփական անձի վարկանիշը բարձրացնելու, համածայողների շրջանում իր գերակայությունն ամրապնդելու նպատակով մեկ անգամ ապտակել է նույն զորամասի ժամկետային զինծառայող, շարքային Լիբիկ Մկրտչյանին, այդ կերպ վիրավորանք է հասցրել վերջինիս՝ անպարկեշտ ձևով ստորացնելով նրա պատիվն ու արժանապատվությունը»։

Բացի այդ, ըստ մեղադրանքի, Բ.Գաբոյանը նույն զորամասի ժամկետային զինծառայող, շարքային Մանուչար Մանուչարյանի նկատմամբ, որպես հեղինակություն վայելող զինծառայող առանձնանալու և անառարկելի հեղինակությունն ամրապնդելու անձնական շահագրգռվածությունից ելնելով, սեփական անձի վարկանիշը բարձրացնելու, համածառայողների շրջանում ենթադրյալ առավելությունը ցույց տալու, գերակայությունն ամրապնդելու նպատակով, կատարել է իր լիազորությունների և իրավունքների սահմաններից դուրս դիտավորյալ գործողություններ։

Բ.Գաբոյանի, ինչպես նաև նույն զորամասի ժամկետային զինծառայող, սերժանտ Արման Ստեփանյանի կողմից երեկոյան «քուն» հրամանից հետո, զորանոցում զինծառայության պարտականությունները կատարելու հետ կապ չունեցող առիթով՝ իր քաղաքացիական շորերը լվանալու պահանջը չկատարելու համար Մ.Մանուչարյանի նկատմամբ բռնություն գործադրելու՝ երկու ձեռքերով կոկորդից բռնելու, վերջինիս պատին հենելու և կոկորդը սեղմելու, ինչպես նաև դրանից քիչ անց, անկողնում պառկած Մ.Մանուչարյանին ոտքերով հարվածներ հասցնելու պատճառով, նրանց երկուսի հակաօրինական գործողությունների արդյունքում անզգուշությամբ վրա է հասել ծանր հետևանք, այն է՝ վերը նկարագրված պարբերաբար բնույթ կրող ծեծի, ստորացումների, անձնական արժանապատվությունը նվաստացնող գործողությունների ու ծաղրի հետևանքով շարքային Մ.Մանուչարյանի մոտ զարգացել է «սուր դեպրեսիվ հակազդում», որն արտահայտվել է տրամադրության դիսթիմիկ ֆոնով, ընկճվածությամբ, հուսահատվածությամբ, ստեղծված իրավիճակից որպես անելանելի ընկալման զգացողությունով: Դրա հետևանքով  վերջինս 31.07.2013թ.՝ ժամը 13:00-ի սահմաններում, իրեն ամրակցված ԱԿՍ-74 տեսակի ինքնաձիգով ենթակզակային շրջանում կրակոց արձակելով գործել է ինքնասպանություն, այսինքն՝ անզգուշությամբ պատճառվել է այլ ծանր հետևանք։