Փաստ ինֆո

Մատուցողուհու սպանության աղմկահարույց գործով այսօր դատարանում հարցաքննվեց սպանության վայր դարձած բնակարանի սեփականատերը, ով գործով տուժող է: Նա հայտնեց, որ պայմանագրով վարձակալության է տվել իր բնակարանը  սպանված աղջկան՝ Մարիամին, ու նրա ընկերուհուն, հետագայում  իմացել է, որ ևս մի աղջիկ էլ է բնակվել բնակարանում:

Սեփականատերը հայտնեց, որ վարձակալներին հանդիպում էր, երբ ինչ-որ կենցաղային հարց էր լինում կամ երբ գնում էր վարձի գումարը վերցնելու:  Մարիամի հետ շփում ունեցել է միայն մեկ անգամ՝ Նոր տարվա կապակցությամբ, երբ իրեն ևս Մարիամը հրավիրել է ռեստորան:

Ի պատասխան սպանության մեջ մեղադրվող ամբաստանյալ Դավիթ Թամրազյանի պաշտպան Կրոմվել Գրիգորյանի հարցերի՝ տուժողը հայտնեց, որ տարբեր տեղերից լսել է, որ Մարիամը  ոչ նորմալ, անբարո կյանք է վարում: Վարձակալված բնակարանի «ներքևի հարևանուհին» բողոքել է ուշ ժամերին աղմուկից, ինքն այս կապակցությամբ դիտողություն է արել իր տանը բնակվող աղջիկներին և դրանից հետո այլևս բողոք չի եղել:

Հիշյալ հարևանուհուց  էլ, ըստ տուժողի, ինքն իմացել է, որ իր բնակարանն հրդեհվել  է: Ոստիկաններն էլ սկզբից միայն բնակարանի հրկիզման մասին են ասել, հետո նաև հավելել են, որ բնակարանում դիակ կա և հարցրել են՝ «կարո՞ղ եք ճանաչել», նա ճանաչել է Մարիամին, ով պառկած էր անկողնում:

Բնակարանի տերը հայտնեց, որ վերջին անգամ Մարիամին տեսել է սպանությունից չորս օր առաջ՝  2013 թվականի մայիսի 3-ին, երբ գնացել էր վարձակալության գումարը վերցնելու:  Մարիամից ինքը ամբաստանյալ Դավիթ Թամրազյանի, նրա հետ «լավ կամ վատ հարաբերությունների մասին» բացարձակապես ոչինչ չի լսել:

Դատարանում սկսվեց, սակայն չավարտվեց սպանված աղջկա մոր հարցաքննությունը: Նա հայտնեց, որ չի ճանաչել ամբաստանյալին, նրան երբևէ չի հանդիպել: Սպանվածի մայրը հայտնեց, որ չի իմացել որտեղ ու ում հետ է բնակվում իր դուստրը, որքան վարձ է վճարում, սակայն միաժամանակ նշեց, որ գրեթե ամեն օր իր աշխատավայրում՝ բանջարեղենային կրպակում,  հանդիպել է իր դստերը:

Տուժողի իրավահաջորդը չէր պատասխանում իր դստերը վերաբերող հարցերին, տեղ-տեղ վրդովմունք էր հայտնում  պաշտպանի հարցերի կապակցությամբ՝  «Ձեր աղջիկը թշնամիներ ունե՞ր» հարցին, օրինակ, նա՝ ի նկատի ունենալով ամբաստանյալին՝  պատասխանեց՝  «Ձեր կողքին է թշնամին», «Ձեր կողքին է մարդասպանը»: Դատարանը կոչ էր անում  զուսպ պատասխանել պաշտպանի հարցերին՝ պարզաբանելով, որ պաշտպանն իր աշխատանքն է կատարում: Պարզաբանումները, ապա նաև կնոջ նկատմամբ կիրառված  դատական սանկցիան՝ նախազգուշացումը,  ցանկալի արդյունք չտվեցին.  դատարանը նախ  ընդմիջեց,  ապա հետաձգեց  դատական     նիստը՝ հարցաքննությունը կշարունակվի արդեն հաջորդ դատական նիստում:   

Հիշեցնենք, որ ըստ  մեղադրանքի, ամբաստանյալ Դավիթ Թամրազյանը «անձնապես վիրավորված լինելով իր հետ նախկինում հարաբերությունների մեջ եղած, տվյալ պահին հարաբերությունները խզած Մարիամից, վերջինիս դիտավորությամբ ապօրինաբար կյանքից զրկելու նպատակով, 2013 թվականի մայիսի 7-ին գնացել է աղջկա վարձակալած բնակարան, թե իբրև անակնկալ նվեր ունի տալու, վերջինիս խնդրել է փակել աչքերը, իր մոտ եղած խոհանոցային դանակով կտրել է Մարիամի կոկորդը, ինչի հետևանքով վերջինս տեղում մահացել է:

Բացի այդ, ըստ մեղադրանքի` ամբաստանյալը, հանցագործության հետքերը թաքցնելու նպատակով, հրկիզել է դեպքի վայր հանդիսացող բնակարանը` բնակարանի սեփականատիրոջը պատճառելով 680.437 ՀՀ դրամի գույքային վնաս»: