Փաստ ինֆո

«Անցյալ տարի կառավարությունը հսկայածավալ գումար է հատկացրել պետական ծառայության մեջ գտնվող անձանց, մասնավորապես՝ ՀՀ գլխավոր դատախազի տեղակալ Էմիլ Բաբայանին, ավագ դատախազ Սուրեն Խաչատրյանին, Ֆինանսների նախարարության աշխատակիցներ Քրիստինա Մազմանյանին և Արմինե Հովսեփյանին և այլոց՝ բնակարան տրամադրելու համար»,- Ազգային ժողովի այսօրվա նիստում՝ կառավարության հետ հարցուպատասխանի ժամանակ, հայտնեց «Ժառանգություն» խմբակցության անդամ Զարուհի Փոստանջյանը:

Ըստ նրա՝ պետական ծառայության մեջ գտնվող առնվազն 28 անձի՝ ՀՀ դատախազության, ոստիկանության և ֆինանսների նախարարության աշխատակիցների, պետբյուջեի միջոցներից տրամադրվել են շուրջ 117 հազար ԱՄՆ դոլար արժողությամբ բնակարաններ: Գնումները կատարվել են ոչ մրցութային կարգով՝ «Միկմետալ» և «Միկշին» մասնավոր ընկերություններից:

Պատգամավորը կառավարությունից հետաքրքրվեց, թե ինչով է պայմանավորված այդ անձանց ընտրությունը, նրանց նման թանկարժեք բնակարանների տրամադրումը, հատկապես, որ այդ անձանց թվում են նաև անձինք, ովքեր բարեկեցիկ կյանքով են ապրում, անգամ ունեն իրենց անունով գրանցված սեփականություն և այդ բնակարանների կարիքը չունեին, այլ ոչ թե, օրինակ, տրամադրվել են հաշմանդամություն ունեցող ՊՆ աշխատակիցներին, ովքեր իրապես բնակարանի կարիք ունեն:

Ի պատասխան հարցի՝ ՀՀ ֆինանսների նախարար Գագիկ Խաչատրյանը վստահեցրեց, որ բնակարանները գնվել են գնումների ընթացակարգին համապատասխան՝ բանակցային թափանցիկ գործընթացով, որևէ խախտում չկա: Իսկ ինչ վերաբերում է նրան, թե ինչու հենց այդ գերատեսչություններին, ապա նախարարը պարզաբանեց. «Կառավարությունը գտնում է, որ սոցիալական փաթեթները պետական կառավարչական մարմիններում, Ձեր նշածին հակառակ, ավելի շատ հակակոռուպցիոն ազդեցություն ունեն և, եթե հնարավորությւոն ունենանք, դրանք շարունակական պետք է կատարենք»:

Գ.Խաչատրյանն անդրադառնալով անձերի ընտրությանը, նշեց, որ կոնկրետ իր ղեկավարած նախարարությունը ներկայացրել է երկու անապահով աշխատակցի, և կարծում է, որ «մյուս գերատեսչություններում էլ ըստ անհրաժեշտության են հատկացվել՝ ծառայության օրենքներին համապատասխան»:

Ընդդիմադիր պատգամավորը կոչ արեց լրատվամիջոցների ներկայացուցիչներին՝ «պարզել  այդ անձանց ինքնությունը, որովհետև այս անձինք վերջին աղքատները չեն Հայաստանի Հանրապետության, նրանք բարեկեցիկ կյանքով ապրում են»:

Նա հավելեց նաև, որ երբ բազային դրույքաչափը 1 մլն-ից ավելի է, չի կարելի բանակցային գործընթացով բնակարան տրամադրել, պետք է մրցույթ հայտարարվեր: Սա, ըստ նրա, «Գնումների մասին» օրենքի խախտում է: