Փաստ ինֆո

Գյումրիում հանրահավաքի ժամանակ Հիմնադիր խորհրդարանի  պատգամավոր   Հրաչիկ Միրզոյանին դանակահարելու հարցում  Կամո Խաչատրյանին կասկածելը  ակնհայտ անհիմն է: Այս մասին «Փաստինֆո»-ի լրագրողի հետ զրույցում նշեց կասկածյալի պաշտպան, փաստաբան Արմեն Սողոմոնյանը:

Նա ընդգծեց, որ իր պաշտպանյալը չէր կարող ոչ խանգարել հանրահավաքը, ոչ սադրել, ոչ խախտել հասարակական կարգը, առավել ևս դիտավորությամբ Հրաչիկ Միրզոյանի առողջությանը ծանր վնաս պատճառել այն պարզ պատճառով, որ դրա համար որևէ շարժառիթ չի ունեցել՝  Հրաչիկ Միրզոյանի հանդեպ հնուց եկած թշնամանք չի ունեցել, նրան չի ճանաչել,  նրա հետ չի ունեցել անգամ իրավիճակային վեճ:

Երկրորդ կարգի հաշմանդամ, երիկամային խնդիրներ ունեցող  Կամո Խաչատրյանը որևէ խմբավորման մեջ չի եղել, որևէ մեկի, այդ թվում՝ Նախագահի, հանձնարարություն չի կատարել ու չէր կարող կատարել՝ գյումրեցի 35-ամյա տղամարդն ո՞ւր, Նախագա՞հն՝ ուր: «Ինքը որևիցե քաղաքական հայացքներ չունի,  ոչ այդ մարդուն ճանաչել է, երբևիցե չի շփվել հետը, որևիցե վեճ նրանց մեջ չի եղել, առհասարակ տառ ու բառ չեն փոխանակել իրար հետ, իմաստ, շարժառիթ դանակահարելու չկա,  լրիվ ուրիշ կյանքով ապրող տղա է,  Հ.Միրզոյանն իր հանրահավաքն ուներ, Կ.Խաչատրյանն՝   իր աշխարհը: Այդ մարդն ու Հրաչյա Միրզոյանն իրար հետ ընդհանրապես կիսելու բան չունեին»,- նշեց Արմեն Սողոմոնյանը:

Առհասարակ սխալ է, գտնում է փաստաբանը,  շարքային քրեական գործը անհարկի քաղաքականացնելու փորձերը,  պրոֆեսիոնալ քաղաքական  գործչին, մանավանդ մարտական փառահեղ ուղի անցած ու հարգված անձնավորությանը՝ Ժիրայր Սեֆիլյանին վայել չէ: «Ճիշտ չէ, քաղաքական   աստառ տալ՝  դրանով ինչ-որ դիվիդենտներ շահելու համար»,- ասաց Արմեն Սողոմոնյանը:   

Ըստ պաշտպանի՝ Կամո Խաչատրյանն ընդամենը պատահականորեն հայտնվել է  հանրահավաքում. իր 13-ամյա որդուն տանում էր հանրահավաքի հարակից տարածքում գտնվող շախմատի դպրոց, նայել է, որ երեխան մտնի մարզասրահ, ապա ինքն էլ  փորձել է  շուտ դուրս գալ տարածքից, որպեսզի ավելորդ պատմության մեջ չընկնի: «Պարզապես ո՛չ այն ժամանակ և ո՛չ այն տեղում է հայտնվել»,- ասաց նա:

Վազել է, կային այլ վազողներ ևս, սակայն ովքեր էին նրանք՝  հանրահավաքի մասնակիցներ, սադրիչներ, թե իր պես պատահականորեն անցորդներ, չի կարող ասել: Վազելու պահին հավանաբար ոտքն ինչ-որ առարկայի է դիպել, կիսաընկնելու ժամանակ հակառակ կողմից եկող մի տղամարդու է  բախվել՝ «երեսներով, գլուխներով»,  ինքը ոտքի է կանգնել, իսկ իր հետ բախված մարդը չի էլ ընկել, ինքը  շարունակել է ընթացքը էլի վազելով, տղամարդն էլ հակառակ կողմն է գնացել:

Կասկածյալը հայտնել է, որ հայրն իրեն սև գույնի պոլիէթիլենային, մոտ քսան սմ-անոց փաթեթ է տվել՝ մեջը խոհանոցային դանակ և դուր, ու խնդրել տանել սրելու, վարպետի մոտից վերցնել սրելու համար տրված սղոցները ու բոլոր գործիքները միասին բերել տուն: Սակայն  իրարանցումը թույլ չի տվել, որ ինքը գնա արհեստավորի մոտ, որոշել է դա հետաձգել մինչև իրավիճակի հանդարտվելը:

Ընդ որում, ըստ կասկածյալի, հիշյալ  փաթեթը մի ձեռքում է եղել, հեռախոսը՝ մյուս ձեռքում, եթե նույնսիկ ուզենար դիտավորյալ հարվածել տուժողին, դանակ չէր կարողանա հանել: Տուն վերադառնալուց հետո հայրն է նկատել, որ փաթեթը պատռված է,  խոհանոցային դանակը տեղում է, իսկ  դուրը չկա, հավանաբար այն կորցրել է կամ տղամարդու հետ բախվելու,  կամ վազելու ընթացքում: «Պաշտպանյալս ասում է՝  որևէ դիտավորություն չի կարող լինել, գուցե բախման հետևանք լինի, եթե իրոք իմ հետ բախվող անձը եղել է Հ.Միրզոյանը, հնարավոր է, որ այդ ժամանակ վնասվածք ստանար, բայց ես որևէ դիտավորություն իրականում չեմ ունեցել»:

Տուն վերադառնալուց հետո մի երկու-երեք ժամ անց տնեցիներն իրեն ասել են՝  նայիր,  քո նկարներն են ինտերնետում որպես Հրաչյա Միրզոյանին դանակահարող, քեզ հետախուզում են: «Բայց այդ մարդը ոչ հետախուզման մեջ է եղել, ինքն իր բնակարանից տեղ չի գնացել»,- ասաց պաշտպանը հավելելով, որ եթե իր պաշտպանյալը փախչելու մտադրություն ունենար, ապա կփախչեր՝  շենգենյան երկրներ մուտքի արտոնագիր ուներ, Բավրայի անցակետն էլ յոթ սարերի հետևում չէր:

Կ. Խաչատրյանը  ոստիկանության բաժին չի գնացել միայն այն պատճառով, որ մտավախություն է ունեցել՝ «մի բան չսարքեն»: Ուզում էր հասկանալ, թե  ինչ է կատարվում, գուցե  շփոթմունք է եղել, սակայն տեսնելով, որ հերյուրանքներն իր ընտանիքի բարի համբավի վրա են ազդում, դրա համար փաստաբանի՝ Արմեն Սողոմոնյանի,  հետ  կամովին ներկայացել է բաժին՝ նախ պարզաբանելու, թե ինչու է հենց իր լուսանկարը շրջանառվում, նաև տալու պարզաբանումներ՝ թե ինչու է ինքը գտնվել  կոնկրետ այդ վայրում»,- ասաց պաշտպանը:

Սակայն, «փառապանծ ոստիկանները  առաջին գործողությունն,  որ արել են,  ձերբակալել են իմ պաշտպանյալին»՝ հիմնավորելով, որ   տուժող Հ .Միրզոյանը նկարով ճանաչել է իրեն: «Դա շատ քիչ է, որևէ դրդապատճառ չկա»,- ասաց փաստաբանը:

Ըստ գործի տվյալների, ինչո՞վ  է  վնասվածք ստացել տուժողը՝ դուրով, թե  դանակով, մեր հարցին փաստաբանը նշեց, որ դեռևս այդ մասին տեղեկություն չկա, նշանակվել է դատաբժշկական փորձաքննություն, փաստաբանը գտնում է, որ պետք է նաև հետքաբանական, վնասվածքաբանական փորձաքննություն կատարվի,  որպեսզի հստակ ասվի, թե  դա դուր է եղել, դանակ, թե այլ առարկա: Այդուհանդերձ, փաստաբանը գտնում է, որ քանի որ դուրը դանակի պես ունի նույն լայնքով շեղբ, համանման առարկաներ են, «շատ հնարավոր է, որ չտարբերվի, վերջնական կատեգորիկ եզրակացության հնարավոր չէ դրանով հանգել»: