Փաստ ինֆո

Այսօր գիշերը հրազենային վնասվածքներ ստացած Վարդան Կարապետյանի կյանքը փրկել են հարևանները: Նրանցից մեկը պատմում է, որ գիշերն իրենց տանը հեռուստացույց նայելիս, բղավոց է լսել: Իսկ երբ ձայնի վրա դուրս է վազել տնից, տեսել է իրենց հարևան Վարդան Կարապետյանին` մեջքով գետնին պառկած: Տղամարդու խոսքով, Վարդանն իրեն հայտնել է, որ ոչ մեկին չի տեսել, քանի որ կրակողը «գլխարկով է եղել»:

Հասկանալով, որ Վարդանի վիճակը ծայրահեղ է, առանց ժամանակ կորցնելու հարևանն իր ընտանիքի անդամների օգնությամբ նրան տեղափոխել է իր ավտոմեքենան, ու ինքն էլ հիվանդանոց տարել:

Ի դեպ, նրա խոսքով, իրենք նույնպես փողոցում այդ ընթացքում որևէ մեկին չեն նկատել:

Հիշեցնենք՝ անցած գիշեր, 01:30-ի սահմաններում, Երևանի Պոպովի փողոցում  անհայտ անձը կրակել էր 36-ամյա Վարդան Կարապետյանի ուղղությամբ, որի հետևանքով վերջինս հրազենային վնասվածք էր ստացել որովայնի շրջանում։ Սպանությունից անմիջապես հետո լուրեր տարածվեցին, որ Վարդան Կարապետյանը վերջերս Նուբարաշենում սպանված քրեական աշխարհում  «Երրորդմասցի Լյովիկ» մականունով հայտնի  Լևոն Ղազարյանի ընկերն է: Թե որքանով այս սպանության փորձը կապ ունի Լյովիկի սպանության եւ  հանցավոր աշխարհում դրան հաջորդած ու նախորդած այլ իրադարձությունների հետ, թերևս, կպարզի հարուցված քրեական գործերի նախաքննությունը:

Իսկ մինչ այդ, որքան էլ որ տարօրինակ հնչի, բայց քրեական այս պատմության շարունակությունը անսպասելի չէր: Նուբարաշենում տեղի ունեցած փոխհրաձգությունից և Լյովիկի ու նրա 2 մտերիմների սպանությունից հետո այս պատմության շարունակությունը ենթադրվում էր: Բայց, խոստովանենք, սպասվում էր ճիշտ հակառակը: Հաշվի առնելով այն, որ քրեական աշխարհում ընդունված չէ ներել նման սպանություններն, և այն, որ դրանք որպես կանոն փոխհատուցվում են համարժեք ձևով, արդեն շուրջ 1 ամիս Հայաստանում սպասում են ԱՄՆ-ում բնակվող «օրենքով գող» Պզոյի ժամանմանը: Բանն այն է, որ Երրորդմասցի Լյովիկը Պզոյի հորեղբոր որդին էր: Ուստի և ենթադրվում էր, թե վերջինը չի կարող անպատասխան թողնել եղբոր սպանությունը, գալու է, որ վրեժ լուծի նրան սպանողներից:

Բայց կատարվեց հակառակը: Փաստորեն, գնդակը դեռ նրանց հակառակորդների խաղադաշտում է: Անցած գիշեր կատարված հերթական սպանության փորձը վկայում է, որ երկու խմբավորումների միջև հաշիվները երկու կողմերում էլ դեռ փակված չեն: Իսկ սա էլ իր հերթին տեղիք է տալիս մտածելու, որ նրանց հարաբերությունները շատ ավելի խճճված են, քան կարելի է պատկերացնել: Ու վերջին խոսքը, կլինի դա ԱՄՆ-ից ժամանող Պզոյի, թե հայաստանյան քրեական աշխարհի մեկ այլ ներկայացուցչի կողմից, ոչ միայն դեռ ասված չէ, այլև դեռ այնքան էլ շուտ չի ասվելու: