Փաստ ինֆո

Նոր դատավոր Արթուր Մկրտչյանին վերամակագրվելուց հետո զինծառայողի ինքնասպանության վերաբերյալ գործով այսօր սկսվեց դատաքննությունը:

Մեղադրող դատախազը հրապարակեց մեղադրական եզրակացության եզրափակիչ մասն, ըստ որի՝ ՀՀ ՊՆ N զորամասի ավագ հետախույզ, կրտսեր սերժանտ Բաբկեն Գաբոյանը տեղ գնալու իր պահանջը չկատարելու կապակցությամբ՝ «սեփական անձի վարկանիշը բարձրացնելու, համածայողների շրջանում իր գերակայությունն ամրապնդելու նպատակով մեկ անգամ ապտակել է նույն զորամասի ժամկետային զինծառայող, շարքային Լիբիկ Մկրտչյանին, այդ կերպ վիրավորանք է հասցրել վերջինիս՝ անպարկեշտ ձևով ստորացնելով նրա պատիվն ու արժանապատվությունը»։

Բացի այդ, ըստ մեղադրանքի, Բ.Գաբոյանը նույն զորամասի ժամկետային զինծառայող, շարքային Մանուչար Մանուչարյանի նկատմամբ, որպես հեղինակություն վայելող զինծառայող առանձնանալու և անառարկելի հեղինակությունն ամրապնդելու անձնական շահագրգռվածությունից ելնելով, սեփական անձի վարկանիշը բարձրացնելու, համածառայողների շրջանում ենթադրյալ առավելությունը ցույց տալու, գերակայությունն ամրապնդելու նպատակով, կատարել է իր լիազորությունների և իրավունքների սահմաններից դուրս դիտավորյալ գործողություններ։

Բ.Գաբոյանի, ինչպես նաև նույն զորամասի ժամկետային զինծառայող, սերժանտ Արման Ստեփանյանի կողմից երեկոյան «քուն» հրամանից հետո, զորանոցում զինծառայության պարտականությունները կատարելու հետ կապ չունեցող առիթով՝ իր քաղաքացիական շորերը լվանալու պահանջը չկատարելու համար Մ.Մանուչարյանի նկատմամբ բռնություն գործադրելու՝ երկու ձեռքերով կոկորդից բռնելու, վերջինիս պատին հենելու և կոկորդը սեղմելու, ինչպես նաև դրանից քիչ անց, անկողնում պառկած Մ.Մանուչարյանին ոտքերով հարվածներ հասցնելու պատճառով, նրանց երկուսի հակաօրինական գործողությունների արդյունքում անզգուշությամբ վրա է հասել ծանր հետևանք, այն է՝ վերը նկարագրված պարբերաբար բնույթ կրող ծեծի, ստորացումների, անձնական արժանապատվությունը նվաստացնող գործողությունների ու ծաղրի հետևանքով շարքային Մ.Մանուչարյանի մոտ զարգացել է «Սուր դեպրեսիվ հակազդում», որն արտահայտվել է տրամադրության դիսթիմիկ ֆոնով, ընկճվածությամբ, հուսահատվածությամբ, ստեղծված իրավիճակից որպես անելանելի ընկալման զգացողությունով: Արդյունքում՝ վերջինս 31.07.2013թ.՝ ժամը 13:00-ի սահմաններում, իրեն ամրակցված ԱԿՍ-74 տեսակի ինքնաձիգով ենթակզակային շրջանում կրակոց արձակելով գործել է ինքնասպանություն, այսինքն՝ անզգուշությամբ պատճառվել է այլ ծանր հետևանք։

Բաբկեն Գաբոյանին մեղադրանք է առաջադրվել ՀՀ քրեական օրենսգրքի 360 –րդ հոդվածի 2-րդ մասով՝ զինծառայողին վիրավորանք հասցնելը՝  2 դրվագով և 358.1-րդ հոդվածի 4-րդ մասով՝  ստորադասի նկատմամբ բռնի գործողություններ կատարելը կամ դրանք կատարելու սպառնալիքը, որոնք անզգուշությամբ առողջությանը պատճառել են ծանր վնաս կամ այլ ծանր հետևանքներ, իսկ Արման Ստեփանյանին՝ 358.1-րդ  հոդվածի 4-րդ մասով: Նրանց 2-ի նկատմամբ որպես խափանման միջոց է ընտրվել կալանավորումը:

 Ամբաստանյալներն առաջադրված մեղադրանքում իրենց մեղավոր չճանաչեցին:

Դատարանի կողմից սահմանված ապացույցների հետազոտման հաջորդականության համաձայն, նախ կհարցաքննվեն տուժողը՝ զինծառայող Լիբիկ Մկրտչյանը, տուժողի իրավահաջորդը՝ մահացած զինծառայող Մանուչար Մանուչարյանի եղբայրը՝ Օնիկ Մանուչարյանը,  ապա կհարցաքննվեն վկաները, կհետազոտվեն քրեական գործում առկա ապացույցները, մյուս փաստաթղթերը, իսկ վերջում կհարցաքննվեն ամբաստանյալները:

 Նշենք, որ այսօրվա դատական նիստին չէր ներկայացել տուժող Լիբիկ Մկրտչյանը, վերջինս դատարանին գրավոր տեղեկացրել էր, որ թոքերի բորբոքում է ստացել  և չի կարող ներկայանալ:

Դատական նիստը հետաձգվեց, հաջորդ դատական նիստին՝ տուժողի ներկայությունն  ապահովելու նպատակով: