Փաստ ինֆո

Ազգային ժողովն այսօր 88 «կողմ», 20 «դեմ», 4 «ձեռնպահ» ձայներով երկրորդ ընթերցմամբ և ամբողջությամբ ընդունեց «Ազգային ժողովի կանոնակարգ» ՀՀ օրենքում փոփոխություններ և լրացումներ կատարելու մասին Գալուստ Սահակյանի, Գագիկ Մինասյանի, Արծվիկ Մինասյանի, Սամվել Նիկոյանի, Հրանտ Բագրատյանի, Խոսրով Հարությունյանի, Սուքիաս Ավետիսյանի և  Մհեր Շահգելդյանի հեղինակած օրինագիծը: Դրանով առաջարկվում է ԱԺ-ում նոր մարմին՝ բյուջետային գրասենյակ, ստեղծել, որտեղ պետք է աշխատեն համակարգող փորձագետն ու 4 այլ փորձագետներ, ովքեր բյուջեի մուտքերի ու ծախսերի վերաբերյալ տեղեկանքներ, մասնագիտական աջակցություն և տեղեկատվություն կտրամադրեն պատգամավորներին, մշտական հանձնաժողովներին, խմբակցություններին, պատգամավորական խմբերին:

Նախօրեին նախագծի քննարկման ժամանակ ԱԺ-ում բուռն բանավեճ էր ծավալվել: «Հայ ազգային կոնգրես» խմբակցության անդամ Գ. Ջհանգիրյանն այն նույնիսկ հակասահմանադրական էր որակել:

Այսօր, մինչ նախագծի քվեարկությունը, ԲՀԿ խմբակցության ղեկավար Նաիրա Զոհրաբյանը հայտարարեց, որ խմբակցությունը դեմ է քվեարկելու :«ԲՀԿ-ն չի պատրաստվում կողմ քվեարկել մի մարմնի ստեղծմանը, որի սահմանադրականության հետ խնդիրներ կա, այլապես մենք պետք է ընդունենք, որ ԱԺ այն կառույցները, որոնք ի պաշտոնե պետք է իրականացնենք այդ ֆունկցիան, պարազիտ վարչություններ են և պետք է լուծարվեն` անկախ նրանից, թե Կոնեկտիկուտում ով ինչի վրա է զարմացել»,- ասաց Նաիրա Զոհրաբյանը: