Փաստ ինֆո

Ազգային ժողովի պատգամավորներ Հովհաննես Սահակյանը, Էդմոն Մարուքյանը, Մարգարիտ Եսայանն ու Արման Սահակյանը հանդես են եկել օրենսդրական նախաձեռնությամբ, որով առաջարկում են լրացում կատարել ՀՀ Քրեական դատավարության օրենսգրքում:

ՀՀ կառավարություն ներկայացրած օրենքի նախագծով հեղինակներն առաջարկում են քրեական գործի վարույթը կասեցնելու որոշման պատճենը հանձնել նաև մեղադրյալին: Հեղինակների համոզմամբ` «մեղադրյալի իրավունքների լիարժեք պաշտպանության տեսանկյունից արդարացված կլինի վերը թվարկված սուբյեկտների շարքում նախատեսել նաև մեղադրյալին՝ նկատի ունենալով այն հանգամանքը, որ համաձայն ՀՀ քրեական դատավարության օրենսգրքի 31 հոդվածի 1-ին մասի՝  քրեական գործի վարույթը կասեցվում է նաև այն դեպքերում, երբ մեղադրյալը ծանր հիվանդ է կամ գտնվում է Հայաստանի Հանրապետության սահմաններից դուրս, որոնց պատճառով չի կարող մասնակցել քրեական գործով վարույթին, եթե առանց նրա մասնակցության քրեական գործով հետագա վարույթն անհնար է և այն դեպքում, երբ գործում է անհաղթահարելի ուժ, որը ժամանակավորապես խոչընդոտում է քրեական գործով հետագա վարույթին»:

Հիշեցնենք, որ գործող օրենքով, քննիչը պարտավոր է քրեական գործի վարույթը կասեցնելու մասին որոշման պատճենը ուղարկել տուժողին, նրա ներկայացուցչին, քաղաքացիական հայցվորին, քաղաքացիական պատասխանողին կամ նրանց ներկայացուցիչներին` միաժամանակ պարզաբանելով դրա բողոքարկման ընթացակարգը:

Նախաձեռնության հեղինակները վստահ են, որ քրեական գործով վարույթը կասեցնելու մասին որոշման պատճենը մեղադրյալին հանձնելու պարտականության ամրագրումը լրացուցիչ երաշխիք կստեղծի մեղադրյալի պաշտպանության իրավունքի, հատկապես` քրեական հետապնդման մարմնի որոշումները և գործողությունները բողոքարկելու իրավունքի արդյունավետ իրականացման համար:

Ի դեպ, այս կարգավորումն արդեն իսկ ներառված է ՀՀ քրեական դատավարության նոր օրենսգրքի նախագծում: Եվ, այդուհանդերձ, կառավարությունը ներկայացված նախագծին դեմ չէ, մի պայմանով միայն` օրենքի նախագծի վերնագրում «լրացում» բառը փոխարինել «փոփոխություն» բառով: Այս փոփոխության դեպքում, Կառավարությունը ներկայացված օրենքի նախագիծն ընդունելի կհամարի: Նախագիծը կառավարության հաստատմանը կներկայացվի վաղը` մարտի 26-ի նիստում: