Փաստ ինֆո

Տնտեսական մրցակցության պաշտպանության հանձնաժողովը ՀԷՑ-ում ուսումնասիրություն չի արել և գերիշխող դիրքի չարաշահում այդ ոլորտում չի բացահայտել: Այս մասին այսօր, պատասխանելով ԱԺ պատգամավորների հարցերին, ասաց ՏՄՊՊՀ նախագահ Արտակ Շաբոյանը` հիշեցնելով, սակայն, որ անցյալ տարի այդ ընկերությունը 20 մլն դրամով տուգանվել է, իր բնական մենաշնորհային դիրքն օգտագործելով, քաղաքացիների նկատմամբ խտրական վերաբերմունքի համար:

«Վերջին 5 տարում ՀՀ մրցակցության ինդեքսն ի՞նչ ուղղությամբ է շարժվում», -Արտակ Շաբոյանից հետաքրքրվեց ԱԺ պատգամավոր, նախկին վարչապետ Հրանտ Բագրատյանը: Ի պատասխան՝ հանձնաժողովի նախագահը նշեց, որ վերջին տարիներին ավելացել են պատասխանատվության կիրառման և տուգանքի որոշումները: «Տարեկան 5-6 հարյուր որոշում է կայացվում, այն դեպքում, երբ նախորդ տարիներին  մինչև 100 որոշում էր կայացվում»,- ասաց Արտակ Շաբոյանը` հավելելով, որ հանձնաժողովը նաև «անտեսանելի» աշխատանք է իրականացնում` ստուգումներ, ուսումնասիրություններ:

«Հասկացանք, որ ստուգում եք, հըլը ու չստուգեիք, վերջ ի վերջո աշխատավարձ եք ստանում»- արձագանքելով Շաբոյանին՝ ասաց Բագրատյանը` հավելելով, որ տնտեսությունը ՀՀ-ում տարեցտարի կենտրոնանում է խոշոր ընկերությունների ձեռքում, իսկ, հարկային մարմնի պաշտոնական տեղեկատվության համաձայն, ամեն տարի հարկ վճարողների քանակը կրճատվում է 30%-ով:

Արտակ Շաբոյանը համաձայնեց կենտրոնացվածության մասին տեսակետին` հավելելով, որ իրենք ուսումնասիրել են այդ ոլորտները և գտել, որ խոշոր ընկերությունների առավելությունները օբյեկտիվ են. նրանք ապրանքները ձեռք են բերում աշխարհի խոշոր ընկերություններից էժան գներով ու մեծ խմբաքանակներով: «Դրա համար էլ ինքնարժեքն ավելի ցածր է»,- ասաց նա: