Փաստ ինֆո

Հայոց ցեղասպանության 100-րդ տարելիցին ընդառաջ աշխարհում ավելանում են թե երկրները, թե կառույցները, որոնք դատապարտում են Հայոց ցեղասպանությունը: Դրա վառ ապացույցը միայն վերջին տասնօրյակում եվրոպական 4 կառույցների՝ Եվրոպայի ժողովրդական կուսակցության, Եվրանեսթ խորհրդարանական վեհաժողովի, ՀՀ-ԵՄ միջխորհրդարանական հանձնաժողովի և Եվրոպական խորհրդարանի, բանաձևերն են, որտեղ խստագույնս դատապարտվում է Օսմանյան Թուրքիայի կողմից իրականացված Հայոց ցեղասպանությունը:

Այս մասին այսօր Ազգային ժողովի հայտարարությունների ժամին հայտնեց ԱԺ փոխնախագահ, ՀՀԿ խմբակցության անդամ Էդուարդ Շարմազանովը:

«Բայց արի ու տես, որ կան գործիչներ, ովքեր զբաղեցրել են շատ-շատ բարձր պաշտոն, եղել են իմ երկրի առաջին նախագահի պաշտոնում և այսօր հանդես են գալիս ուղերձով, որը մեծ ցանկության դեպքում հնարավոր չէ անվանել հայոց պետականության շահերը սպասարկող ուղերձ»,-ասաց նա՝ անդրադառնալով ՀՀ առաջին նախագահ Լևոն Տեր-Պետրոսյանի` Հայոց ցեղասպանության 100-րդ տարելիցի առթիվ Հայաստանի կողմից միջազգային հանրությանը հասցեագրված ուղերձի նախագծին:

ԱԺ փոխնախագահը նշեց, որ ծանոթացել է այդ ուղերձի նախագծին և այն կանվաներ «Հայոց պահանջատիրության թաղման ուղերձ»:

«Նա թաղում է Հայոց պահանջատիրությունը, և որպեսզի իմ հայտարարությունները մերկապարանոց չհնչեն, ես կներկայացնեմ փաստեր»,-ասաց նա՝ ընդգծելով, որ ՀՀ-ի համար հիմնական գաղափարական անկյունաքարերից մեկը Հայաստան-Արցախ-Սփյուռք եռամիասնությունն է:

Է.Շարմազանովը՝ որպես այդ եռամիասնությանը հակասող, մատնանշեց ՀՀ առաջին նախագահի հեղինակած ուղերձի նախագծի 9-րդ կետը. «Հայաստանի Հանրապետությունը միաժամանակ հարկ է համարում ընդգծել, որ մտադիր չէ Հայկական սփյուռքին թելադրել իր օրակարգը, որովհետև հայ ժողովրդի աշխարհացրիվ զավակները, որպես տարբեր երկրների քաղաքացի, հարկատու և ընտրող, իրավունք ունեն ճնշում բանեցնելու իրենց կառավարությունների վրա և նրանցից պահանջելու՝ ճանաչել և դատապարտել Հայոց ցեղասպանությունը: Այդ երկրների ներքին գործն է՝ արձագանքել կամ չարձագանքել իրենց քաղաքացիների պահանջներին»:

ԱԺ փոխնախագահը նշեց, թե մեր ամենակարևորագույն խնդիրը պահանջատիրությունն է, և այսօր վերջինիս արդյունքում բազմաթիվ երկրներ ոչ միայն դատապարտում են, այլ նաև ցեղասպանության ժխտողականության դեմ օրենքներ են ընդունում:

Է.Շարմազանովն անդրադարձավ ուղերձի նախագծի 11-րդ կետին, որում, մասնավորապես, նշվում է, թե «դիմելով եվրոպական երկրների կառավարություններին` Հայաստանի Հանրապետությունը խնդրում է. Հայոց ցեղասպանության ճանաչումը նախապայման չդիտել Եվրամիությանը Թուրքիայի անդամակցության հարցի շուրջ ընթացող բանակցություններում»:

Ըստ Է.Շարմազանովի, երրորդը՝ ամենակարևորը, այն է, որ «մենք 5 տարի ասում ենք, որ Լեռնային Ղարաբաղի կարգավորման գործընթացը չի կարող կապ ունենալ Թուրքիայի հետ հաշտեցման գործընթացի հետ և Թուրքիան ԼՂ-ի կարգավորման գործընթացում անելիք չունի»: Մինչդեռ ՀՀ առաջին նախագահը 11-րդ կետում «փոխկապակցվածություն է ընդունում»:

«Հարգելի պարոն առաջին նախագահ, հասկանում եմ, որ եզրագծից այն կողմ լուսանցքում հայտնվելը, քաղաքական թոշակառուի կարգավիճակ ունենալը դաժան է, բայց ընդունեք, որ պետական շահերի սպասարկումը շատ-շատ կարևոր է, և պետք չի նման հայտարություններով հանդես գալ , դա չի բխում մեր պետության շահերից»,-եզրափակեց նա:

Երկրի առաջին նախագահ Լևոն Տեր-Պետրոսյանի հրապարակած հռչակագրի նախագծի վերաբերյալ ՀՀԿ խմբակցության մեկ այլ անդամ՝ ՍԻՄ նախագահ Հայկ Բաբուխանյանն էլ, մասնավորապես, հայտարարեց. «Նա շատ հետևողական է իր հակահայկական քաղաքականության մեջ, որովհետև 1990 թվականին, երբ ընդունվում էր Անկախության մասին հռչակագիրը, նա ամեն ինչ անում էր, որպեսզի այնտեղ չմտնի ցեղասպանության մասին դրույթը՝ որպես Հայաստանի արտաքին քաղաքականության հիմնասյուն»: