Փաստ ինֆո

«Սա ևս մեկ քայլ կլինի թուրքական ժխտողականության դեմ և ցեղասպանությունների միջազգային դատապարտման ուղղությամբ»,- Օսմանյան Թուրքիայի կողմից 1915-1923 թ.թ-ին իրականացված հույների և ասորիների ցեղասպանությունը դատապարտելու մասին ԱԺ հայտարարության նախագծի քննարկման ավարտին հայտարարեց հիմնական զեկուցող՝ ԱԺ փոխնախագահ Էդուարդ Շարմազանովը:

Նախագիծը հեղինակել են ԱԺ բոլոր խմբակցությունները ներկայացող մի խումբ պատգամավորներ: Ըստ Է.Շարմազանովի, այն ներկայացվել է փոխհամաձայնության արդյունքում:

Է.Շարմազանովը նշեց, որ, ընդառաջելով պատգամավորների առաջարկներին, ԱԺ-ի վաղվա առաջին նիստում քվեարկության կդրվի Օսմանյան Թուրքիայի կողմից իրականացված հույների և ասորիների ցեղասպանությունը դատապարտելու մասին ԱԺ հայտարարության նախագիծը՝ առանց 1915-1923 թ.թ-ը մատնանշելու:

Անդրադառնալով որոշ ելույթներում հնչած հարցադրումներին, թե

ինչո՞ւ նախագծում չեն ներառվել այլ ցեղասպանությունները ևս, մասնավորապես, նշվել էր  Օսմանյան Թուրքիայում եզդիների ցեղասպանության մասին, Է.Շարմազանովը հայտնեց. «Խնդիրը քննարկվել է նաև գիտնականների հետ: Ցեղասպանագիտության մեջ Օսմանյան Թուրքիայում ցեղասպանություններն իրականացվել են միմիայն քրիստոնյանների, այսինքն՝ հայերի, հույների և ասորիների նկատմամբ: Այլ ցեղասպանություն ո՛չ պատմաբաններին, ո՛չ ցեղասպանագետներին հայտնի չէ»:

Նա խնդրեց գործընկերներին զգացական ելույթներ չունենալ, այլ խոսել փաստերով: «Ես չեմ ճանաչում աշխարհում որևէ պատմաբան, թուրքագետ կամ ցեղասպանագետ, ով հայտարարի, թե Օսմանյան Թուրքիայում, բացի հայերի, հույների և ասորիների ցեղասպանությունից, եղել է այլ ժողովուրդների ցեղասպանություն: Միգուցե՞ եղել է ցեղասպան քաղաքականություն, միգուցե՞ եղել են կոտորածներ, ջարդեր, դա քննարկման հարց է, բայց ցեղասպանությունն այլ որակում ունի»,-հայտարարեց ԱԺ փոխնախագահը:

Նա նշեց նաև, թե պատգամավորներից ոմանք առաջարկեցին հայտարարության նախագծում հղում անել Համահայկական հռչակագրին, մինչդեռ «հռչակագրից այստեղ ոչ միայն հղումներ կան, այլ հստակ մեջբերումներ կան, նաև շատ կոնկրետ մեջբերումներ կան ՄԱԿ-ի 1948-1968թ.-ին ընդունված կոնվենցիաներից»: