Փաստ ինֆո

Թովմա Մաթևոսյանի սպանության գործը քննող՝  Լոռու մարզի դատարանի դատավոր Աղասի Մկոյանին  տեղափոխում են քաղաքացիական գործեր քննելու,  դատավորը ենթադրաբար  զեկուցել է, որ  գործի քննությունը  շուտ կավարտի, «օրը մեջ դատական նիստեր է նշանակում» ու  մերժում  պաշտպանական կողմի բոլոր միջնորդությունները: Այս մասին «Փաստինֆո»-ի թղթակցին հայտնեց Թովմա Մաթևոսյանի սպանության մեջ մեղադրվող ամբաստանյալ Տիգրան Մելիքյանի պաշտպան, փաստաբան  Տիգրան Աթանեսյանը:

«Մենք փաստորեն դատարան չունենք, ոչ թե անարդար դատարան է, այլ  դատարան արդեն փաստորեն գոյություն չունի»,- ասաց փաստաբանը՝  կոչ անելով  դատական համակարգի ղեկավարներին, Դատարանների նախագահների խորհրդին միջոցներ ձեռնարկել, որպեսզի գործը պարզապես այլ դատավորի փոխանցվի, փորձաքննություն նշանակվի և «դրա արդյունքում հասկանանք, ով ինչում է մեղավոր»:

Ըստ պաշտպանի, դատաքննությունը  նորմալ ընթանում էր շուրջ ութ ամիս, որի ընթացքում հաջողվել էր  հարցաքննել դատաբժիշկ փորձագետին և բժիշկներին, ովքեր օգնություն են ցույց տվել տուժողին: Դրա արդյունքում, ըստ Տ.Աթանեսյանի,  իրենց մոտ կասկած է հասունացել առ այն, որ իրականում Թովման մահացել է ոչ թե դանակի հարվածի, այլ սխալ բժշկական օգնության հետևանքով: 

«Այդ փաստը կարող է հաստատվել կամ հերքվել միայն դատաբժշկական կրկնակի հանձնաժողովային փորձաքննությամբ», որը նշանակելու հիմքերն, ըստ պաշտպանի,  միանշանակ կան:  Այսպես, օրինակ, նշվում է, որ տուժողի ձախ պլևրալ խոռոչում  գտել են երկուսուկես լիտր արյուն, որը կարող էր  մարդու մոտ առաջանալ սովորաբար 3-4 ժամում,   մինչդեռ, ըստ գործի տվյալների, տուժողը  20 րոպե հետո է մահացել:

Բժիշկները ներարկել են ադրենալին-ատրոպին, որը կտրականապես արգելված է ներքին արյունահոսության դեպքում: «Շատ հավանական է, որ եթե  նույնիսկ նրան  Երևան բերեին, կարող է այսօր ողջ լիներ, էլ չեմ ասում,  եթե նորմալ օգնություն ցույց տային, 90  տոկոս շանս կար, որ նա ողջ կլիներ: Իմ պաշտպանյալը, եթե նա է կատարել այդ արարքը, այդ դեպքում  կմեղադրվեր ոչ թե սպանության, այլ ծանր մարմնական վնասվածքներ հասցնելու մեջ»,- ասաց Տիգրան Աթանեսյանը՝ ընդգծելով, որ հանձնաժողովային կրկնակի փորձաքննությունը  բոլոր այդ հարցերը կփարատի, կբացի: