Փաստ ինֆո

Գյումրիում մի ողջ ընտանիքի սպանության գործի նախաքննության շրջանակներում դատաձգաբանական փորձաքննության եզրակացությունը տուժողների իրավահաջորդներին ու նրանց ներկայացուցիչներին սպանության կատարման եղանակի վարկածները որոշակիորեն հստակեցնելու հնարավորություն կտա: Այս մասին «Փաստինֆո»-ի խնդրանքով մեկնաբանելով նախաքննության մարմնի կողմից ընդհանուր գծերով հրապարակված դատաձգաբանական փորձաքննության եզրակացությունը, նշեց տուժողների իրավահաջորդների ներկայացուցիչ, փաստաբան Երեմ Սարգսյանը:

Փաստաբանն ընդգծեց, որ մի կողմից եզրակացությունը միանշանակ չի  բացառում  ոճրագործությանը այլ անձանց մասնակցությունը, սակայն այն, որ բոլոր գնդակներն ու պարկուճներն արձակվել են նույն զենքից՝  Պերմյակովին կցված ինքնաձիգից, այսինքն՝  այն, որ դեպքի վայրում ընդամենը մեկ զենք է օգտագործվել, կարող է էական նշանակություն ունենալ գործի հանգամանքների բացահայտման համար:

Հիշեցնենք, որ ըստ նախաքննական մարմնի տեղեկատվության, դատաձգաբանական փորձաքննության եզրակացությամբ հաստատվել է, որ  դեպքի վայրում հայտնաբերված և փորձաքննության ներկայացված պարկուճները, գնդակները կրակվել են «АКС-74» տեսակի ինքնաձիգից, որը ամրակցված է եղել գործով մեղադրյալ Վ.Պերմյակովին և հայտնաբերվել դեպքի վայրում։

Այսպես` փորձագետների եզրակացության համաձայն՝  փորձաքննության ներկայացված ինքնաձիգը 1981թ. գործարանային  արտադրության 5,45մմ տրամաչափի «АКС-74» տեսակի ինքնաձիգ է, մարտական ակոսափող հրազեն, սարքին, պիտանի 5,45մմ (5,45x39) տրամաչափի մարտական փամփուշտներով մենահատ և կրակահերթի ռեժիմներով կրակելու համար։ Ներկայացված փամփուշտները՝ գործարանային արտադրության 5,45մմ (5,45 x 39) տրամաչափի մարտական փամփուշտներ են՝ պիտանի կրակոցների համար, և հանդիսանում են ռազմամթերք։

Փորձագետներն արձանագրել են, որ փորձաքննության ներկայացված պարկուճները գործարանային արտադրության 5,45մմ (5,45 x 39) տրամաչափի մարտական փամփուշտների մասեր են՝ կրակված պարկուճներ են, որոնք կրակվել են նշված «АКС-74» տեսակի ինքնաձիգից։ Փորձաքննության ներկայացված գնդակները ևս, ըստ փորձագետների, կրակվել են նույն «АКС-74» տեսակի ինքնաձիգի փողից։