Փաստ ինֆո

2013թ-ի սեպտեմբերին «Սևան» ՔԿՀ-ի դատապարտյալ Վոլոդյա Շախպերյանը մարմնական վնասվածքներ էր ստացել: Կոտրված ողերով նա փորձել էր հասնել իր քնելատեղին, բայց վատացել ու վայր էր ընկել: Իսկ ՔԿՀ աշխատակիցներին հայտնել էր, թե վնասվածքները ստացել է աստիճաններից վայր ընկնելու հետևանքով: Բայց հետագայում խոստովանել էր, որ իրականում իրեն ծեծի են ենթարկել դատապարտյալներ Ահարոն Մխիթարյանը և Անդրանիկ Հայրապետյանը:

Հարուցված քրեական գործի նախաքննության, իսկ հետո նաև դատաքննության արդյունքում պարզվեց, որ ամեն ինչ սկսվել էր զուգարանի դռնից, ավելի ճիշտ` այն ուշ բացելուց:

Վոլոդյա Շախպերյանը գնացել էր զուգարան, որտեղ այդ պահին գտնվելիս է եղել Արմեն Ոսկանյանը, որն էլ ուշ է բացել դուռը: Վ.Շախպերյանի հարցին, թե «ինչու է ուշ բացում դուռը», Ոսկանյանն ասել է. «Ստրախովկա էի պահում»: Այս խոսակցությունն էլ վերաճել էր վիճաբանության:

Հարաբերությունները պարզելու համար Շախպերյանն ավելի ուշ գնացել է «Սևան» ՔԿՀ  թիվ 1 հանրակացարան, որտեղ բնակվում էր Ա.Ոսկանյանը, և դիմել է նույն հանրակացարանում բնակվող երեք այլ դատապարտյալների՝ Ահարոն Մխիթարյանին, Անդրանիկ Հայրապետյանին և Մարտին Խաչատրյանին:

Մարտին Խաչատրյանը խոստացել է «զբաղվել» այդ հարցով և Շախպերյանին պատվիրել է գնալ: Բայց Ահարոն Մխիթարյանն ու Անդրանիկ Հայրապետյանը հետ են կանչել նրան ու հարցրել, թե ինքն ով է: Վոլոդյա Շախպերյանը ներկայացել է որպես «Կակուլ», քանի որ նրան այդ մականունով են ճանաչում ՔԿՀ-ում:

Այդ պահին Ահարոն Մխիթարյանը բռունցքով հարվածել է Վոլոդյա Շախպերյանի դեմքին, որից նա վայր է ընկել, իսկ Ահարոն Մխիթարյանը և Անդրանիկ Հայրապետյանը սկսել են ոտքերով հարվածել նրան: Ծեծից Շախպերյանը կորցրել է գիտակցությունը, իսկ գիտակցության գալուց հետո լուռ վեր կացել և գնացել իր քնելատեղին:

Հետաքրքրական է, որ 30-40-հոգանոց հանրակացարանում ոչ ոք այս միջադեպը չէր տեսել: Նախաքննության ընթացքում բոլորը պնդել էին, որ ոչինչ չեն տեսել և միջադեպի մասնակիցներին էլ անձամբ չեն ճանաչում:

ՔԿՀ-ում իրենց առավելությունը ցուցադրելու ու Շախպերյանի ծեծի միջոցով մյուս դատապարտյալներին իրենց կարողությունը ցուցադրելու փորձերը Ահարոն Մխիթարյանին ու Անդրանիկ Հայրապետյանին ազատազրկման լրացուցիչ տարիներ արժեցան: Կոտայքի մարզի ընդհանուր իրավասության դատարանի վճռով նրանցից առաջինը դատապարտվեց 3 տարի 5 ամիս, երկրորդը` 3 տարի ժամկետով ազատազրկման: Ավելի ուշ նույն դատավճիռն ուժի մեջ թողեց նաև վերաքննիչ դատարանը:

Ի դեպ, տուժող ճանաչված Վոլոդյա Շախպերյանն այս դեպքից հետո տեղափոխվել է այլ ՔԿՀ` պատժի մնացած հատվածը կրելու: