Փաստ ինֆո

Երկուսուկես տարեկան Լիա Միսակյանի՝ «Արաբկիր» բժշկական համալիրում մահվան գործով այսօրվա դատական նիստում նախատեսվում էր մեղադրական ճառի հրապարակում, սակայն դատաքննությունը վերսկսվեց, և դատարանը՝ որպես փաստաթուղթ, հետազոտեց Լիա Միսակյանի մահվանից ժամեր առաջ կատարված տեսագրության կրիչը:

Դատաքննությունը վերսկսելու և կրիչը հետազոտելու միջնորդությամբ հանդես եկավ ամբաստանյալ բժիշկ Լիլիթ Վարդանյանի պաշտպան Գիվի Հովհաննիսյանը:

Նշենք,  որ պաշտպանի միջնորդությանը կողմերը չառարկեցին, իսկ տեսագրությունը կատարվել է տուժողի իրավահաջորդ Գեորգի Միսակյանի կողմից՝ 2013թ. հունվարի 2-ին, մասնավորապես, տեսանյութում պարզ լսվում է 2,5 տարեկան Լիա Միսակյանի դժվարաշնչառությունը:

Դատաքննությունը վերսկսվելու միջնորդությամբ հանդես եկավ նաև տուժողի իրավահաջորդի ներկայացուցիչ Արթուր Սաքունցը:

Ըստ Սաքունցի՝ դատաքննությունն ավատվելուց հետո նոր ապացույցներ են ի հայտ եկել, մասնավորապես, «Արաբկիր»  ԲՀ-ում Լիա Միսակյանի բուժվելու ժամանակ լաբորատորիայի աշխատել- չաշխատելու վերաբերյալ:

Տուժող կողմը ցանկանում է դատաքննությունը վերսկսել և որպես վկա հարցաքննել երրորդ օրվա բժշկուհի Իրինա Մամյանի եղբորը՝ Սարգիս Մամյանին:

Սաքունցը նշեց, որ տուժողի իրավահաջորդի եղբայրը  ֆեյսբուք սոցիալական ցանցի միջոցով զրուցել է օգտատեր Սարգիս Մամյանի հետ, ով նշել է, որ իրեն որոշակի տեղեկություններ են հայտնի, և որ  տոնական առաջին օրը դժվար է բուժօգնություն ցուցաբերել և դա բժշկի մեղավորությունը չի, հիվանդանոցի հարցն է, քանի որ լաբորատորիան չի աշխատել:

Դատարանն այս միջնորդության քննարկումը հետաձգեց մինչև հաջորդ դատական նիստ: