Փաստ ինֆո

Ինֆեկցիոն բաժանմունքում  նշանակվել են բուժումներ, սակայն դրանք եղել են անբավարար, ինչի հետևանքով հետագայում ծանրացել է նորակոչիկ  հիվանդի վիճակը:   Պաշտպանության բանակ զորակոչված և զինհոսպիտալում մահացած նորակոչիկ Նորայր Սահակյանի գործով այսօր այս մասին նշվեց  դատաբժշկական  փորձաքննություն իրականացրած հանձնաժողովի  նախագահ Գագիկ Հարությունյանի հարցաքննության ընթացքում:

«Ո՞ր հիվանդության համար է ոչ բավարար եղել՝  հետպատվաստումային ռեակցիայի՞, թե թոքաբորբի» հարցին ի պատասխան  փորձագետը նշեց, որ բուժում չէր կարող նշանակված լինել թոքերի բորբոքման հետ կապված, քանի որ  այդ ժամանակ դեռևս հայտնի չի եղել, որ կա թոքերի բորբոքման խնդիր:

Ըստ փորձագետի՝ բուժումը եղել է ընդհանուր, եթե բուժումը լիներ բավարար, արդյունքը միանշանակ կլիներ դրական: Միաժամանակ փորձագետը  պնդեց, որ հոսպիտալ ընդունվելիս Նորայր Սահակյանի մոտ թոքաբորբ է եղել:  Ըստ Հարությունյանի,  անհերքելի փաստ է՝   եթե նորակոչիկին բարեխիղճ ձևով զննեին, ապա անհնար է, որ  հոսպիտալ  ընդունվելու  պահին նրա մոտ նորմայից շեղումներ չհայտնաբերեին:

Նորակոչիկին հոսպիտալում նշանակվել է պենիցիլին: Ընդ որում,  ըստ հարցաքննվող փորձագետի՝ Նորայր Սահակյանին պենիցիլինը «հենց այնպես է նշանակվել», դոզան եղել է շատ ցածր և հետևաբար՝ ոչ արդյունավետ: Դեղը պետք է նշանակվեր ավելի բարձ դոզայով:

Անպատասխան մնաց հարցն այն մասին, թե հետպատվաստումային ռեակցիայի համար ևս պենիցիլինն անբավարա՞ր է եղել  կամ սխա՞լ է  եղել նշանակումը, փորձագետը կրկնվեց՝  թոքաբորբի համար բավարար չէ:

«ՊՆ հավաքակայանում  նորակոչիկին ներարկված պատվաստումները  կարո՞ղ էին,  արդյոք,   նրա առողջական վիճակի վատթարացման  և նրա մոտ ախտորոշված հիվանդությունների պատճառ  հանդիսանալ, թե՞ ոչ»    ամբաստանյալ, բժիշկ  Մհեր Դավիդյանցի պաշտպան  Երեմ Սարգսյանի հարցին փորձագետը պատասխանեց, որ եղել են հիվանդություններ,  որոնք Նորայր Սահակյանն ունեցել է մինչև պատվաստում կատարելը, որոնցով նա տառապել է կենդանության օրոք, սակայն դրանք, որևիցե պատճառահետևանքային  կապ պատվաստման հետ չեն ունեցել:

Պաշտպանը հայտարարեց, որ հանձնաժողովային փորձաքննությունը չի պատասխանել քննիչի այն հարցին, որ արդյո՞ք պատվաստումը կարող էր «ֆիբրոբլաստիկ էնդոկարդիտի, հետադարձ գորտնուկավոր էնդոկարդիտի»  պատճառ հանդիսանալ: Փորձագետն իր հերթին արձագանքեց՝   «պաշտպանի ասածն անհեթեթություն է»,  քանի որ ըստ  փորձագետների եզրակացության՝ Նորայր Սահակյանը կենդանության օրոք տառապել է ֆիբրոբլաստիկ էնդոկարդիտի, հետադարձ գորտնուկավոր էնդոկարդիտի, սրտամկանի հիպերտրոֆիա հիվանդություններով, սակայն նշված հիվանդությունները մահվան հետ անմիջական պատճառահետևանքային  կապի մեջ չեն գտնվել:

Նշենք, որ արդեն երկրորդ դատական նիստն է  անցնում թեժ մթնոլորտում,  այսօր խախտվեցին նաև  էթիկայի կանոնները՝  ընդհուպ մինչև նախագահող դատավորը կասկածի տակ դրեց փաստաբան Երեմ Սարգսյանի ընկալելու  ունակությունները, ապա հավելեց, որ «դժվար ընկալելը  վիրավորական չէ»:

Նշենք նաև, որ ամբաստանյալ Մհեր Դավիդյանցի պաշտպան Երեմ Սարգսյանի մի շարք հարցեր հանվեցին նախագահող դատավորի կողմից, դրան  ի պատասխան պաշտպանը առարկեց նախագահողի անօրինական գործողությունների դեմ և հայտարարեց, որ դատարանը բացարձակապես փորձ չի անում հավասարություն և արդարություն ապահովել: Ըստ պաշտպանի՝ դատարանը թույլ չի տալիս հակափաստարկներ ներկայացնել և որևէ կերպ չի փորձում օբյեկտիվ իրականությունը բացահայտել: