Փաստ ինֆո

Գյումրիում մեկ օրվա տարբերությամբ հայտնաբերվեց երկու երիտասարդի դի` մեկը հրազենային վնասվածքով`  իր իսկ ավտոմեքենայի մեջ, իսկ երկրորդը` գյուղում` բռնության հետքերով:

«Փաստինֆո»-ն արդեն հայտնել է, Գյումրիում մարտի 7-ի գիշերը կատարված երկու սպանությունների գործերը միավորվել են մեկ վարույթում: Մեր տեղեկություններով, նրանք` 31-ամյա Քրիստ Վարդանյանն ու 34-ամյա Սամվել Հակոբյանը, մտերիմ ընկերներ են եղել, քրեական անցյալով, երկուսն էլ՝ նախկինում դատված:

«Փաստինֆո»-ին հայտնի են դարձել  սպանությունների վերաբերյալ նոր փաստեր, որոնք, թերևս, ավելի են խճճում այս առեղծվածային պատմությունը:

Եվ այսպես, մեր տեղեկություններով, Քրիստ Վարդանյանն ու Սամվել Հակոբյանն  իրենց մահվանը նախորդած ժամանակահատվածում միասին են եղել` Քրիստ Վարդանյանի տանը: Երեկոյան Սամվել Հակոբյանը հեռացել է: Որոշ ժամանակ անց իր ավտոմեքենայով տնից գնացել է նաև Քրիստ Վարդանյանը: Թե ուր են գնացել նրանք և արդյոք դրանից հետո դարձյալ հանդիպել ու միասին են եղել, առայժմ հայտնի չէ:

Փոխարենը հայտնի է մեկ այլ տարօրինակ հանգամանք ևս. մարտի 7-ի գիշերը Քրիստ Վարդանյանի  ավտոմեքենան տեսել են դեպի Բավրա գնացող ավտոճանապարհով ընթանալիս, եւ նա չի արձագանքել ծանոթների կանչերին, անգամ փորձել է ազատվել հնարավոր հետապնդումներից:

Այս հանգամանքը առիթ է տալիս կասկածելու, որ այդ ընթացքում Քրիստի ավտոմեքենայի ղեկին ուրիշ մեկն է եղել, ով ոչ միայն չի ճանաչել նրա ծանոթին, այլև հասկանալով, որ իրեն հետապնդում են, խույս է տվել անցանկալի հանդիպումից: Հատկանշական է, որ այդ ժամանակահատվածը համընկնում է Քրիստ Վարդանյանի մահման հնարավոր ժամանակահատվածի հետ:

Հիշեցնենք, որ մարտի 7-ի վաղ առավոտյան Ախուրյանի Քեթի գյուղի ձորում հայտնաբերվել էր Քրիստ Վարդանյանի ավտոմեքենան, իսկ դրա հետևի նստարանին` դիակը` հրազենային վնասվածքներով:

Մեկ օր անց նույն գյուղի մատուռի մոտ հայտնաբերվել էր նաև Սամվել Հակոբյանի դին` գլխի շրջանում բազմաթիվ կապտուկներով: Ինչպես պարզ է դարձել դատաբժշկական փորձաքննությունից հետո, նա սպանվել է գլխին մի քանի անգամ բութ առարկայով հարվածելու հետևանքով: Դիահերձման արդյունքներով երկուսի մահվան ժամերը համընկնում են: