Փաստ ինֆո

Երևանի բնակիչ Արտակ Մինասյանն այսօր դատապարտվեց 15 տարվա ազատազրկման՝ մեղավոր ճանաչվելով  սպանության հոդվածով:

Դատարանը մասնակի՝ 650 հազար ՀՀ դրամի չափով,  բավարարեց  տուժողի իրավահաջորդի քաղհայցը՝ արդեն կատարված ծախսերի մասով: Միաժամանակ դատարանը պարզաբանեց նաև, որ  հետագա ծախսերի մասով իրավահաջորդը կարող է հետագայում նորից  դիմել դատարան՝  ներկայացնելով տուժողի մահվան հետ կապված կատարված ծախսերի ապացույցներ՝ իրավահաջորդն ընդհանուր առմամբ պահանջել էր 1.400.000 ՀՀ դրամ՝ որպես հանցագործությամբ պատճառված վնասի հատուցում:  

1982թ. ծնված,   3  անգամ դատված, դատվածությունը չմարված ամբաստանյալն, ըստ մեղադրանքի,  ոգելից խմիչք օգտագործած վիճակում դուրս գալով տանից գնացել է Երևան քաղաքի Թբիլիսյան խճուղի, որտեղ հանդիպել է տուժող Արմեն Հակոբյանին, մայթեզրին կանգնած զրուցել նրա հետ։ Զրույցի ընթացքում նրանց միջև առաջացել է վիճաբանություն, որը վերածվել է քաշքշուքի։ Վիճաբանությունն ու քաշքշուքը շարունակելով, Թբիլիսյան խճուղուց առաջացել են դեպի Քանաքեռ 2-րդ փողոց, որի ընթացքում Ա.Մինասյանը գրպանից հանել է ծալովի դանակը, հարվածել է Ա.Հակոբյանի կրծքավանդակին՝ և «ապօրինաբար կյանքից դիտավորությամբ զրկել» նրան։ Դրանից հետո Ա.Հակոբյանին թողնելով Քանաքեռ 2 փողոցում անօգնական վիճակում՝ ամբաստանյալը դիմել է փախուստի։

Մեղադրող Դավիթ Կարապետյանն իր մեղադրական ճառում հաստատված էր համարել մեղադրանքը և միջնորդել ամբաստանյալին դատապարտել 14 տարվա ազատազրկման: Իսկ պաշտպան Հայկ Իսրայելյանը նշել էր, որ իր պաշտպանյալը դանակը գրպանից հանել ու հարվածել է տուժողին ոչ թե նրան կյանքից զրկելու դիտավորությամբ, այլ վիճաբանությանը վերջ տալու համար: Տուժողը նույն պահին չի մահացել,  եթե ամբաստանյալը սպանելու դիտավորություն ունենար, նույն պահին էլ կարող էր սպանել նրան:

Պաշտպանը միջնորդեց իր պաշտպանյալին առաջադրված մեղադրանքը վերաորակել ՀՀ քրեական օրենսգրքի 112-րդ հոդվածի 2-րդ մասի 14-րդ կետով՝  դիտավորությամբ առողջությանը ծանր վնաս պատճառելն, որն անզգուշությամբ առաջացրել է տուժողի մահը: Եթե դատարանը գտնի, որ արարքը ճիշտ է որակված, պաշտպանը միջնորդել էր նշանակել համաչափ պատիժ:

Ամբաստանյալն իր հերթին հայտարարել էր՝  «արել եմ, չեմ ցանկացել սպանել, այդպես է ստացվել» և խնդրեց իր հետ մեղմ վարվել: