Փաստ ինֆո

Արագածոտնի մարզի դատարանից ըստ ընդդատության  Երևանի Կենտրոն և Նորք-Մարաշ վարչական շրջանների ընդհանուր իրավասության դատարան է ուղարկվել ավազակային հարձակման, առևանգման, մահվան հանգեցրած ծանր մարմնական վնասվածք հասցնելու մի գործ: Մեղադրական եզրակացության մեջ նկարագրված  գործողությունները տեղի են ունեցել Հայաստանի սահմաններից դուրս՝   ՌԴ Դոնի Ռոստով քաղաքում:

Գործով մեկ ամբաստանյալ է անցնում՝   44-ամյա Արմեն Ղազարյանն, ով, ըստ մեղադրանքի,   2000թ. մայիսին, նախնական համաձայնությամբ գործելով Ի. Մոգիլևսկու և քննությամբ չպարզված անձի հետ, առևանգել է Ս. Կրուգլովային և Ե. Տոլստիխին, նրանց պատկանող դրամական միջոցների գտնվելու վայրը պարզելու նպատակով: Խաբեությամբ նրանց տարել են Դոնի Ռոստովի մի բնակարան,  որտեղ նրանք պահանջել են ասել տնային տնտեսության վաճառքից ստացված գումարի գտնվելու տեղը: Խոշոր չափի գումարի գույքին տիրանալու նպատակով սկսել են նրանց ծեծի ենթարկել, որից Ե. Տոլստիխը գիտակցությունը կորցրել է և գիտակցության գալով, չդիմանալով հարվածներին ասել է, թե որտեղ են գտնվում իրենց պահանջած գումարները: Այնուհետև Ղազարյանը, ըստ մեղադրական եզրակացության,  գործելով ըստ նախնական համաձայնության Մոգիլևսկու և քննությամբ չպարզված հանցագործի հետ,  ուղևորվել է Տոլստիխի նշած ռոստովյան հասցեն,  որտեղ այդ պահին գտնվել են Ս. Կրուգլովայի և Ե. Տոլստիխի ծեր ազգականները՝   Յու. Կրուգլովը, Ա. Կրուգլովան, Ե. Պտուխան:

«Ղազարյանը գնալով այդ հասցեով և օգտվելով այն հանգամանքից, որ իրեն նախկինում ծանոթ Կրուգլովը բացել է դուռը, մտել է բնակարան, որտեղ նախնական համաձայնությունը կատարելու նպատակով, քննությամբ չպարզված հանցագործի հետ Ս.Կրուգլովայի գումարին տիրանալու նպատակով սկսել է ծեծի ենթարկել նրանց, ճնշելով նրանց կամքը, որից հետո հափշտակել է Ս. Կրուգլովային պատկանող 6900 ԱՄՆ դոլար գումարը»,- նշվում է մեղադրական եզրակացության մեջ:

Բացահայտելով, որ Ս. Կրուգլովան ստացված հարվածներից մահացել է,  Ղազարյանը, Մոգիլևսկին և քննությամբ չպարզված հանցագործը Ս. Կրուգլովայի դիակը փաթաթել են փալասի մեջ և այն թողել բնակարանում, իսկ Ե. Տոլստիխին Մոգիլևսկին ստիպողաբար դուրս է  բերել բնակարանից և ավտոմեքենայով տարել ք. Դոնի Ռոստովի Մալինովսկու փողոց, որտեղ «Ֆորտունա» ավտոշուկայի շրջանում նրան բաց է թողել և թաքնվել:

Արմեն Ղազարյանին մեղադրանք է առաջադրվել ՀՀ քրեական օրենսգրքի երեք հոդվածներով՝ 175-րդ հոդվածի  3-րդ մասի 3-րդ կետով՝ ավազակություն՝ առողջությանը ծանր վնաս պատճառելով,  131-րդ հոդվածի 2-րդ մասի 1-ին, 6-րդ, 7-րդ կետերով՝ մի խումբ անձանց կողմից նախնական համաձայնությամբ շահադիտական դրդումներով երկու կամ ավելի անձանց  առևանգելը, 112-րդ հոդվածի 2-րդ մասի  14-րդ կետով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը:

Ամբաստանյալը հայտարարեց, որ ինքն իրեն մեղավոր չի համարում, տուժողների ցուցմունքներում առկա են բազմաթիվ հակասություններ: Ամբաստանյալն ի պատասխան դատարանի հարցի՝  հայտնեց, որ հրաժարվել է  իր պաշտպանի ծառայությունից և առայժմ չի ցանկանում պաշտպան ունենալ:

Այսօրվա դատական նիստին չէին ներկայացել երկու տուժողները, դատարանն առայժմ տեղեկություն չուներ նրանք  պատշաճ ծանուցվա՞ծ  են, թե ոչ և արդյոք ցանկանում են, որ գործը քննվի իրենց բացակայությամբ, թե ոչ: Մինչև հաջորդ դատական նիստը դատարանը կպարզի այս հարցերը: