Փաստ ինֆո

Վերաքննիչ դատարանը մերժել է ՀՀ քրեական օրենսգրքի 34-104-րդ հոդվածի 1-ին մասով 8,5 տարվա ազատազրկման դատապարտված անասնապահ Գևորգ Պողոսյանի պաշտպանի բողոքն՝ անփոփոխ թողնելով առաջին ատյանի դատարանի դատավճիռը:

Գևորգ Պողոսյանի պաշտպանը  վերաքննիչ դատարանից պահանջել էր ամբողջությամբ բեկանել և փոփոխել առաջին ատյանի դատարանի դատավճիռը, իր պաշտպանյալի նկատմամբ քրեական հետապնդումը դադարեցնել և գործի վարույթը կարճել:

Պաշտպանը վերաքննիչ դատարանից պահանջել էր նաև Պողոսյանին մեղավոր ճանաչել ՀՀ քրեական օրենսգրքի 112-րդ հոդվածի 1-ին մասով և դատապարտել ազատազրկման 2 տարի ժամանակով, պատիժը պայմանականորեն չկիրառել` նշանակելով փորձաշրջան 1 տարի ժամկետով:

Մասնավորապես, գործով անցնում են 2 ամբաստանյալ, նրանք 2-ն էլ անասնապահներ են, կերուխումից հետո տղամարդիկ վիճաբանել են, վեճի պատճառը  կին է եղել, վերջինս նրանցից մեկի ներկայիս կինն  է, իսկ մյուսի՝ նախկինը:

Նշենք, որ գործով մյուս ամբաստանյալին՝ Սպարտակին, մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով,  և նա դատապարտվել է 3,5 տարվա ազատազրկման:

Դեպքը տեղի է ունեցել դեռևս 2013թ. դեկտեմբերին, Սյունիքի մարզի Ծղուկ գյուղում. 3 անասնապահներ միասին հաց են կերել, խմել  2 շիշ օղի, սակայն ալկոհոլի օգտագործումն անհետևանք  չի մնացել: Նրանց միջև կենցաղային հարցերի շուրջ վիճաբանություն է առաջացել, որի ընթացքում գործով ամբաստանյալ Սպարտակը տնակի սեղանից վերցրել է դանակ և հարվածել Էդիկի ձախ զստափոսային շրջանին` դիտավորությամբ նրա առողջությանը պատճառելով կյանքին վտանգ սպառնացող ծանր վնաս:

Ըստ մեղադրանքի՝ Գևորգն էլ իր հերթին դիտավորությամբ փորձել է ապօրինաբար կյանքից զրկել Սպարտակին, սակայն իր կամքից անկախ հանգամանքներում մինչև վերջ չի հասցրել հանցագործությունը:

Նախաքննության ընթացքում պարզվել է, որ Գևորգն ու Սպարտակը Արուսյակի «ամուսիններն» են, Գևորգը ներկայիս, իսկ Սպարտակը՝ նախկին: Վերջինիս հետ Արուսյակը ամուսնալուծվել է 2010թ. և ամուսնացել է Գևորգի հետ:

Սպարտակը գտնվել է ՌԴ-ում  և, երբ 2011թ.  վերադարձել է Հայաստան, տեղեկացել է, որ նախկին կինը ամուսնացել է Գևորգի հետ, ինչի պատճառով էլ մի քանի անգամ վիճաբանել է նրա հետ:

Դատաքննության ընթացքում ամբաստանյալ Գևորգ Պողոսյանն առաջադրված մեղադրանքում իրեն մեղավոր է ճանաչել, սակայն հարցաքննվելիս՝ պահպանելով մինչդատական վարույթի ընթացքում որդեգրած դիրքորոշումը, իրեն դարձյալ մեղավոր չի ճանաչել:

Ըստ Գևորգի ցուցմունքի՝ ինքը Սպարտակի հետ վիճաբանել է նրա նախկին կնոջ` Արուսյակի, հետ ամուսնանալու պատճառով, որի ընթացքում Սպարտակը ասել է, որ իր  նախկին կնոջ հետ ամուսնանալու համար սպանելու է իրեն:

Դեպքի օրը Գևորգը Սպարտակին և գործով տուժող ճանաչված Էդիկին հրավիրել է հաց ուտելու, որի ընթացքում երկու շիշ օղի են օգտագործել: Ալկոհոլ օգտագործած վիճակում Էդիկը և Սպարտակը վիճաբանել են, դուրս եկել բակ, ինքն էլ վիճաբանությունը և քաշքշուկը դադարեցնելու նպատակով մոտեցել է նրանց:

Այդ պահին Էդիկը ցաքատը նետել է իր ուղղությամբ, Գևորգն էլ այն վերցրել է և դրանով երկու անգամ հարվածել է Սպարտակին,  որից հետո լսելով Էդիկի խոսքերը, թե «հերիք է խփես, սպանեցիր», դադարեցրել է հարվածել:

Գևորգն իրեն  մեղավոր է ճանաչել Սպարտակին  2 անգամ հարվածելու դրվագով, սակայն նշել է, որ նրան սպանելու նպատակ չի ունեցել, քանի որ նման դեպքում օգնություն ցույց չէր տա:

Ըստ Սպարտակի նախաքննական ցուցմունքի՝ ինքը  ճանաչել է Գևորգին և Էդիկին, նրանց հետ գտնվել է նորմալ փոխհարաբերությունների մեջ, սակայն մի քանի անգամ վիճաբանել է Գևորգի հետ՝ նախկին կնոջ հարցով, քանի որ կինը իր հետ ամուսնալուծվելուց հետո ամուսնացել է Գևորգի հետ: Իսկ դեպքի օրը ալկոհոլ օգտագործած վիճակում, վիճաբանել է Էդիկի  հետ, հարվածել ու  քաշքշել են միմյանց,  որից հետո ինքը մուտք է գործել տնակ, սեղանից վերցրել դանակը և, դուրս գալով բակ, դանակով մեկ անգամ հարվածել է Էդիկի որովայնին:

Ըստ Սպարտակի՝ Գևորգը «խանդի հողի վրա»,  ցաքատով բազմաթիվ հարվածներ է հասցրել իր գլխին, դեմքին և կրծքավանդակին:

Տուժող Էդիկն էլ հայտնել է, որ վիճաբանության ընթացքում բռնել է Սպարտակի ձեռքերից և դիմել է Գևորգին, որպեսզի վերջինս դանակը վերցնի նրա ձեռքից:

Դատահոգեբուժական և դատահոգեբանական փորձաքննությամբ Գևորգը և Սպարտակը  ճանաչվել են մեղսունակ, նրանք 2-ն էլ  հոգեկան հիվանդությամբ չեն տառապել և չեն տառապում, նրանց մոտ հայտնաբերվում է «սահմանային մտավոր թերզարգացում»:

Հանցավոր արարքը կատարելու պահին Գևորգը գտնվել է հուզական լարվածության, ֆրուստրացիայի, շփոթվածության ու սթրեսի վիճակում, ինչը էապես ազդել է նրա գիտակցության և վարքի վրա: Իսկ Սպարտակը գտնվել է հուզական լարվածության, ֆրուստրացիայի, խանդի և շփոթվածության վիճակում, ինչը էապես ազդել նրա գիտակցության և վարքի վրա: