Փաստ ինֆո

2013թ. հունիսի 12-ին լույս աշխարհ եկած որդուց հենց մայրն է հրաժարվել՝ Նարինե Նիկողոսյանը, նոտարական գրասենյակում համաձայնագիր ստորագրելով այն մասին, որ  երեխայի խնամքը հանձնում է Էդիսոն Ադյանին: Այդ մասին «Փաստինֆո»-ի թղթակցի հետ զրույցում ասաց Էդիսոն Ադյանի փաստաբանԿարեն Սարդարյանը:

Փաստաբանը մեզ հետ զրույցում նշեց, որ, ըստ իր վստահորդի, երեխան շուտով 2 տարեկան կլինի, սակայն այս ամբողջ ընթացքում մայրը ոչ մի քայլ չի ձեռնարկել երեխային տեսակցելու կամ երեխայի խնամքը հանձնելու ուղղությամբ:

Ավելին, ըստ Ադյանի, Նարինե Նիկողոսյանը նրանից 25.000 դոլար է պահանջել, որպեսզի հրաժարվի սեփական երեխայից, բայց քանի որ Ադյանն այդ գումարը նրան չի տվել, անցել է սպառնալիքների:

Ըստ այս կողմի էլ՝ Նարինեի և Էդիսոնի միջև մտերմիկ հարաբերություններ են եղել,  որոշ ժամանակ անց Նարինեն Էդիսոնին ասել է, որ հղի է, պայմանավորվածություն են ձեռք բերել երեխային պահելու, և Նարինեն բնակվել է Էդիսոնի եղբոր տանը: Այդ ընթացքում Էդիսոնը օգնել է նրան նաև ֆինանսապես, սակայն ինչ-որ մի պահին Նարինեն երեխայից ազատվելու համար գումար է պահանջել Էդիսոնից, իսկ վերջինս էլ հրաժարվել է գումար տալ, ասելով, որ երեխայից չազատվի և որ ինքը կստանձնի հայրական պարտականությունները և կօգնի նրան:

Նշենք նաև, որ հակառակ կողմը մեզ հետ զրույցում  նշում էր, որ երեխայի կենսաբանական հայրը այլ անձ է, ով ամուսնացած է, և Նարինեի հղիության մասին տեղեկանալով չի ցանկացել, որ երեխան ծնվի, և քանի որ կնոջ համար առաջնայինը եղել է երեխային չկորցնելն  ու առողջ ծննդաբերելը, նա  խուսափել է հանդիպել երեխայի կենսաբանական հորը և խզել է հարաբերությունները նրա հետ:

Էդիսոն Ադյանի փաստաբան Կարեն Սարդարյանը նշեց, որ իր վստահորդը հրաժարվում է ԴՆԹ անալիզից, քանի որ իր և երեխայի միջև հոգեբանական կապն այնքան ամուր է, որ ոչ մի նշանակություն չունի,  թե ով է իրականում երեխայի կենսաբանական հայրը:

Անկախ ամեն ինչից Էդիսոն Ադյանը հրաժարվում է երեխային որևէ մեկին տալ: Պաշտպանը նշում է, որ անգամ եթե այդ անալիզը կատարվի, դա գործի համար որևէ ապացուցողական նշանակություն չունի:

Պաշտպանը նշեց նաև, որ իր վստահորդը ներկայումս էլ պատրաստ է հաշտության համաձայնագիր կնքել և միջոցներ տրամադրել, որպեսզի մայրը ամսական 2 անգամ տեսակցի իր որդուն, սակայն Նարինեն որևէ համաձայնության չի գնում, իր համար երեխայի շահերը հետաքրքիր չեն և որ ուզում է միայն, որ Էդիսոն Ադյանը դատապարտվի:

Ինչպես ավելի վաղ տեղեկացրել էինք,  36-ամյա Նարինե Նիկողոսյանը պնդում  է, որ օգտվելով իր անօգնական վիճակից ապօրինի զրկել են իրեն որդուց: