Փաստ ինֆո

Քիչ առաջ Ազատության հրապարակում ավարտվեց «Հայ ազգային կոնգրես»-ի և Հայաստանի ժողովրդական կուսակցության նախաձեռնությամբ հրավիրված հանրահավաքը:

Մասնակիցները քայլերթով  շարժվեցին դեպի Մյասնիկյանի արձան, որտեղ, ավանդույթի համաձայն, 2008թ.-ից ի վեր տեղի է մամավառություն՝ ի հիշատակ մարտիմեկյան տասը զոհերի:

Հանրահավաքում ելույթ ունեցան ՀԱԿ փոխնախագահներ՝ ԱԺ ՀԱԿ խմբակցության ղեկավար Լևոն Զուրաբյանը և խմբակցության քարտուղար Արամ Մանուկյանը, ինչպես նաև ՀԺԿ առաջնորդ, նույն խմբակցության անդամ Ստեփան Դեմիրճյանը,   2008 թ. մարտի մեկին զոհված Գոռ Քլոյանի հայրը՝ Սարգիս Քլոյանը:

Հանրահավաքի ավարտին ելույթ ունեցավ  ՀԱԿ առաջնորդ, ՀՀ առաջին նախագահ Լևոն Տեր-Պետրոսյանը:

«Տարելիցի առթիվ հերթական անգամ մեր հարգանքի ու վշտակցության տուրքը մատուցելով 2008թ. մարտի 1-ի զոհերի անմար հիշատակին, ցավոք, հերթական անգամ հարկադրված ենք նաև արձանագրելու, որ այդ ահավոր ոճրագործության հետ կապված անձանց քրեական պատասխանատվության ենթարկելու և զոհերի հարազատներին նյութական փոխհատուցում հատկացնելու գործը, հակառակ հասարակության, քաղաքական ընդդիմության և միջազգային հանրության ջանքերին, այդպես էլ մազաչափ անգամ տեղից չի շարժվել»,-մասնավորապես ասաց ՀՀ առաջին նախագահը:

Նա հանդես եկավ առաջարկով` հանրահավաքի մասնակիցների անունից մարտի 1-ը հռչակել «2008թ. մարտի 1-ի զոհերի հիշատակի և պետական ահաբեկչության ու բռնաճնշումների դեմ համազգային բողոքի օր», ինչպես նաև Ազգային ժողովի ընդդիմադիր խմբակցություններին պատվիրել օրենսդրական նախաձեռնությամբ հանդես գալ` այդ օրը ՀՀ պետական տոների և հիշատակի օրերի ցանկում ընդգրկելու համար։ Հանրահավաքի մասնակիցների քվեարկության արդյունքում նա արձանագրեց` որոշումն ընդունված է 2015թ. մարտի 1-ին Ազատության հրապարակում կայացած բազմահազարանոց հանրահավաքի կողմից։

Լ.Տեր-Պետրոսյանն անդրադարձավ նաև ներքաղաքական վերջին զարգացումներին.

«Հասկանում եմ, որ օրվա խորհրդից բացի, ձեզ ամենահետաքրքրող հարցերն այսօր կապված են Հայաստանի վերջին շրջանի բուռն քաղաքական իրադարձությունների, «Բարգավաճ Հայաստան» կուսակցության նկատմամբ գործադրված վայրագ հաշվեհարդարի, ընդդիմության հետագա ծրագրերի և, ընդհանրապես, ներքաղաքական դաշտում ակնկալվող վերադասավորումների հետ։

Ձեր բնական սպասումը հասկանալով հանդերձ, առայժմ ես զերծ կմնամ այդ հարցերի լուսաբանումից, որովհետև իրադարձությունները դեռ այնքան թարմ են, որ երկար մտորումների և հիմնավոր վերլուծության պահանջ են առաջացնում։

 Հուսով եմ, դուք էլ, ձեր հերթին, ըմբռնումով կմոտենաք իմ քայլին, քաջ գիտենալով, որ ես հապշտապ դատողություններ անելու և ոտքի վրա որոշումներ կայացնելու սովորություն չունեմ։ Նույն նկատառումով՝ ընդդիմության դաշտում կրկին միայնակ մնացած Հայ Ազգային Կոնգրեսին ժամանակ է պետք իր հետագա գործունեության մարտավարությունը ճշգրտելու և պայքարի շարունակման քաղաքական ռեսուրսները հաշվարկելու համար։ Ըստ այդմ, հաշվի առնելով նաև այն հանգամանքը, որ առաջիկա երկու ամիսները հագեցած են լինելու Հայոց ցեղասպանության 100-րդ տարելիցին նվիրված զանազան հանրային ծրագրերով՝ Կոնգրեսի ղեկավարությունը որոշել է միառժամանակ, առնվազն մինչև ապրիլի 24-ը, զերծ մնալ զանգվածային միջոցառումների անցկացումից»։