Փաստ ինֆո

Փետրվարի 17-ին  Վրաստանի դատախազությունը իր նախկին նախագահ Միխեիլ Սաակաշվիլիի ձերբակալության ու հանձնման միջնորդությամբ դիմել է Ուկրաինային: Այդ մասին, «kp.ua»-ի փոխանցմամբ, հայտնել են գերատեսչության մամուլի ծառայությունից:

Վրաստանի գլխավոր դատախազությունը Սաակաշվիլիի դեմ մեղադրանք է առաջադրել Վրաստանի Միացյալ բանկի աշխատակից Սանդրո Գիրգվլիանիի սպանության հետ կապված: Քննությունը դեռ չի ավարտվել, Վրաստանի նախկին նախագահը կասկածվում է նաև պաշտոնեական լիազորությունների չարաշահման մեջ: Այդ հոդվածով նրան սպառնում է երեքից հինգ տարվա ազատազրկում:

«Այն կապակցությամբ, որ Միխեիլ Սաակաշվիլիին Վրաստանում մեղադրանքներ են առաջադրվել և նրա նկատմամբ հայտարարվել ներպետական հետախուզում, գլխավոր դատախազությունը դիմել է Ուկրաինայի գլխավոր դատախազությանը՝ միջնորդելով Ուկրաինայում ձերբակալել Սաակաշվիլիին և արտահանձնել նրան Վրաստանին»,- նշվում է դիմումի մեջ:

Լրատվամիջոցը նշում է, որ Ուկրաինայի ու Վրաստանի միջև կա արտահանձնման ոլորտում համաձայնագիր, սակայն դեռևս ուկրաինական կողմը Միխեիլ Սաակաշվիլիի արտահանձման հարցում  ընդառաջ չի գնացել: 

Նշենք նաև, որ Ուկրաինայի նախագահ Պյոտր Պորոշենկոն փետրվարի  13-ին հրամանագիր է ստորագրել Մ.Սաակաշվիլիին իր արտահաստիքային խորհրդական և ստեղծված Միջազգային խորհրդակցական բարեփոխումների խորհրդի  ղեկավար   նշանակելու մասին: