Փաստ ինֆո

 

Դատական դեպարտամենտի նախկին ղեկավար Միսակ Մարտիրոսյանի և մյուսների գործով այսօրվա նիստում Դատական դեպարտամենտի ղեկավարի նախկին տեղակալ և Դատական դեպարտամենտի առանձնացված ստորաբաժանման՝ Դատական կարգադրիչների ծառայության նախկին ղեկավար Արմեն Մովսիսյանը հայտարարեց, որ ընդունում է իրեն առաջադրված առանձնապես խոշոր չափերի յուրացման մեղադրանքը, իսկ պաշտոնեական կեղծիքի մեղադրանքի վերաբերյալ դիրքորոշում չհայտնեց: Նա հայտարարեց, որ պնդում է իր նախաքննական ցուցմունքները: 

 

Նախաքննության ընթացքում որպես կասկածյալ հարցաքննվելիս նա հայտարարել էր, որ որևէ հանցավոր արարք, այդ թվում՝ առանձնապես խոշոր չափերի յուրացում չի կատարել, նախաքննական մարմնի այդ մասին կասկածանքները գնահատել էր որպես «անհասկանալի», «թյուրիմացություն», «զրպարտություն» ու «երևակայության արդյունք»: Նա ապօրինի է համարել նաև իր ձերբակալությունը: Որպես մեղադրյալ հարցաքննվելիս նույնպես նա սկզբնապես հայտարարել է, որ իրեն մեղավոր չի ճանաչում, որ իր տեղակալ Գագիկ Խաչատրյանն իրեն զրպարտել է, տվել կեղծ ցուցմունքներ՝ «կաշին փրկելու համար»:   
 

Հետագայում, սակայն, որպես մեղադրյալ հարցաքննվելիս Մովսիսյանը հայտնել էր, որ դատական կարգադրիչների աշխատավարձերը շատ ցածր էին, բազմիցս այդ հարցը բարձրացվել է, այդ թվում՝ կառավարական մակարդակով, սակայն խնդիրը լուծում չի ստացել: Ուստի՝ ինքը Դատական դեպարտամենտի ղեկավար Միսակ Մարտիրոսյանին առաջարկել է, որպեսզի ծառայությունում հրամանագրված, սակայն փաստացի չաշխատող դատական կարգադրիչներ լինեն, որոնց աշխատավարձերը տնօրինվեն իրենց կողմից, Միսակ Մարտիրոսյանը չի առարկել դրա դեմ: Դրանից հետո ինքն իր տեղակալներին հայտնել է, որ ղեկավարությունը տեղյակ է, «յուրաքանչյուրը կարող է ունենալ երկու անձանց  բանկային պլաստիկ քարտ ու օգտագործել սեփական կարիքների համար»: Յուրաքանչուր քարտից կանխիկացված գումարից 15  հազար ՀՀ դրամն ուղղվել է  ծառայության ներքին ծախսերի ու խնդիրների լուծմանը:
 

Ըստ նախաքննական ցուցմունքների՝ իր առաջին տեղակալ Գեղամ Գրիգորյանը կանխիկացնում էր իրենց գումարը, ամսվա կտրվածքով դա կազմում էր 1-2 մլն ՀՀ դրամ: Գումարն Արմեն Մովսիսյանը բաժանում էր երեք մասի ու բաժանում իր՝ Արմեն Մովսիսյանի, Գեղամ Գրիգորյանի և Միսակ Մարտիրոսյանի միջև: Չորս տարվա կտրվածքով, ըստ Արմեն Մովսիսյանի նախաքննական ցուցմունքի, ընդհանուր առմամբ Միսակ Մարտիրոսյանին տրված գումարը կազմել է մոտ 20 մլն. ՀՀ դրամ՝ ամսվա կտրվածքով նրան տալիս էր գումար 300 հազարից-500 հազար դրամի չափով: 

 

Միսակ Մարտիրոսյանը հայտարարեց, որ այս խոստովանական ցուցմունքի արձանագրության մեջ նշված օրը քննիչը մուտք չի գործել «Վարդաշեն» քրեակատարողական հիմնարկ, ինչպես նշված է արձանագրության մեջ: Արմեն Մովսիսյանը, սակայն, հայտարարեց, որ արձանագրությունն ինքն է ստորագրել, և հարցաքննությունը  տեղի է ունեցել «Վարդաշեն» ՔԿՀ- ում: 

 

Ամբաստանյալ, ՀՀ «Դատական դեպարտամենտ» ՊԿ հիմնարկի անձնակազմի կառավարման վարչության նախկին պետ Անգին Ղուկասյանը հայտարարեց, որ չի վիճարկում աշխատանքի տեղավորվելու համար կաշառք ստանալու երկու դրվագով փաստական տվյալները, դրանք համապատասխանում են իրականությանը:

 

Ամբաստանյալը հայտարարեց, որ իր արարքին սխալ քրեաիրավական գնահատական է տրվել՝ ինքը «կաշառքի սուբյեկտ չէ», խոսք կարող է գնալ միայն կաշառքի միջնորդության մասին է: Ամբաստանյալը չի ընդունում նաև իր իսկ նախաքննական ցուցմունքներում առկա ձևակերպումն առ այն, որ կաշառքի ստանալու շուրջ Միսակ Մարտիրոսյանի հետ «նախնական համաձայնության է եկել»: Ըստ նրա՝ նախնական համաձայնություն չկար, Միսակ Մարտիրոսյանի անմիջական ենթակայության ներքո աշխատող անձանց, այդ թվում՝ իր համար որևէ դժվարություն չէր ներկայացնում մտնել Դեպարտամենտի ղեկավարի մոտ ու միջնորդություն անել: Նախնական համաձայնության մասին ինքը նախաքննության ընթացքում ասել է, որպեսզի չերևա Դեպարտամենտում տիրող վիճակը: 

 

Անգին Ղուկասյանը հայտնեց, որ կաշառքի երկու դրվագով էլ ինքը հազար դոլարից 800 դոլարը տվել է Միսակ Մարտիրոսյանին, իսկ 200 դոլարը պահել է իրեն: Ամբաստանյալը հայտարարեց, որ կաշառատուներից մեկը համակարգի աշխատող էր և գիտեր, որ «Միսակ Մարտիրոսյանը նման գործարքների գնում է»: Մեկ այլ դեպքում Միսակ Մարտիրոսյանին կոնյակ ու ոսկե մետաղադրամ նվիրելը, Անգին Ղուկասյանի ընկալմամբ, շնորհակալություն էր՝ աշխատանքի ընդունվելու դիմաց: Ամբաստանյալը կարծիք հայտնեց, որ նվիրատուն չգիտեր, որ նվեր փոխանցելու օրը Միսակ Մարտիրոսյանի ծննդյան օրն է: 

 

Հիշեցնենք, որ Դատական դեպարտամենտի նախկին ղեկավարն ու Դատական կարգադրիչների ծառայության բարձրաստիճան պաշտոնատար անձինք մեղադրվում են «կազմակերպված խմբի կողմից ՀՀ պետական բյուջեից որպես աշխատավարձ և դրամական այլ բավարարումներ փոխանցված գումարներից 2009 թվականի հուլիսից մինչև 2013 թվականի օգոստոսն ընկած ժամանակահատվածում առանձնապես խոշոր չափերի` ընդհանուր 115.782.033 ՀՀ դրամ գումարի հափշտակության» մեջ:

 

Միսակ Մարտիրոսյանը մեղադրվում է նաև կաշառք ստանալու երկու դրվագով: