Փաստ ինֆո

«Հայկական ժամանակ»-ն անդրադարձել է հունվարի 12-ին Գյումրիում տեղի ունեցած սպանության դեպքին: Լրատվամիջոցը Քննչական կոմիտեից տեղեկացել է, որ սպանության դեպքի առթիվ հարուցված քրեական գործի շրջանակներում իրականացվող դատաձգաբանական փորձաքննության արդյունքները դեռևս չեն ստացվել:

Ըստ թերթի՝ փորձաքննության արդյունքները կարևոր են նրանով, որ կտրվեն մի շարք հարցերի պատասխաններ: Մասնավորապես՝ արդյոք նույն զենքի՞ց են սպանվել Ավետիսյանների ընտանիքի անդամները, թե՝ տարբեր: Որից էլ կարելի է եզրակացնել՝ Պերմյակովը մենա՞կ է եղել դեպքի վայրում, թե՝ ոչ:

Լրատվամիջոցը զրուցել է Ավետիսյանների իրավահաջորդների փաստաբան Երեմ Սարգսյանի հետ, ով հարցին, թե  չի՞ ուշանում արդյոք փորձաքննության եզրակացությունը, պատասխանել է, որ փորձաքննության ավարտի ժամկետները կախված են փորձաքննության ծավալներից, ինչն էլ պայմանավորված է դեպքի առանձնահատկությամբ:

Թերթը հետաքրքրվել է նաև, թե արդյոք փաստաբանը տարօրինակ չի՞ համարում այն փաստը, որ ՀՀ գլխավոր դատախազը դիմել է ՌԴ գլխավոր դատախազին՝ միջնորդելով գործի վարույթը հայկական կողմին հանձնել:

«Հարց է առաջանում՝ եթե  սպանության վարույթը Ռուսաստանի քննչական մարմինների վարույթի տնօրինության ներքո է, ի՞նչ վարույթի շրջանակում է Ե.Սարգսյանը լիազորված՝ որպես Ավետիսյանների իրավահաջորդների փաստաբան, և ինչու՞ Կոստանյանը չի միջնորդել՝ մեղադրյալ Պերմյակովին հայկական կողմին հանձնելու մասին»,- հարց է բարձրացնում թերթը:

Լրատվամիջոցի այս հարցին ի պատասխան՝ Ե.Սարգսյանը նշել է, որ ինքը չի կարող ասել, թե ինչ է նկատի ունեցել գլխավոր դատախազը՝ վարույթը հանձնել ասելով, բայց ասվածից կարելի է եզրակացնել, որ վարույթը հանձնել՝ ենթադրում է նաև Պերմյակովի հանձնում:

«Անձի փոխանցման հարցը, ենթադրվում է, պետք է քննարկվի, քանի որ առանց մեղադրյալ վարույթ չի լինում»,- ասել է Երեմ Սարգսյանը:

Հոդվածն ամբողջությամբ կարող եք կարդալ «Հայկական ժամանակ» օրաթերթի` 05.02.2015թ. համարում: