Փաստ ինֆո

Վարդան Պետրոսյանի փաստաբան Նիկոլայ Բաղդասարյանն այսօր տեղեկացրեց, որ փետրվարի 2-ին նշանակված դատական նիստում իր պաշտպանյալը հանդես կգա արդեն տուժողի կարգավիճակով:

Բանն այն է, որ դեռևս քրեական վարույթի ընթացքում Նիկոլայ Բաղդասարյանը հաղորդում էր ներկայացրել ՀՔԾ` Վարդան Պետրոսյանի վթարի գործը քննող քննիչ Հայկարամ Հակոբյանի կողմից քրեական գործում առկա փաստաթղթերը կեղծելու կամ այլ հանցավոր արարք պարունակող գործողության վերաբերյալ:

Եվ ահա, փետրվարի 2-ին արդեն իսկ նշանակված է քննիչի անգործության գործով առաջին դատական նիստը: Նիկոլայ Բաղդասարյանը կարծիք հայտնեց, որ այս գործով դատարանը կնշանակի դատաավտոտեխնիկական փորձաքննություն:

«Երբ ես այդ գործով կստանամ փորձաքննության արդյունքները, և Վարդան Պետրոսյանը կգտնվի ազատության մեջ, արդեն նոր երևան եկած հանգամանքով կվիճարկենք այս դատավճիռը»,-ասաց Նիկոլայ Բաղդասարյանը` նկատի ունենալով այսօր Կոտայքի մարզի առաջին ատյանի ընդհանուր իրավասության դատարանի կայացրած վճիռը, որով Վարդան Պետրոսյանը դատապարտվեց 5 տարվա ազատազրկման:

Ի դեպ, հենց այս հանգամանքը հաշվի առնելով էլ Վարդան Պետրոսյանն ու իր փաստաբանը որոշել են չբողոքարկել այսօրվա դատավճիռը, քանի որ զուգահեռ սկսվող նոր քրեական գործի շրջանակներում, Նիկոլայ Բաղդասարյանի խոսքով, իրենք կշարունակեն իրենց պայքարը: «Կապացուցենք, որ քրեական գործին կցված մի շարք ապացույցներ ձեռք են բերվել օրենքի խախտումով, և այդ գործով ստանալով այդ ապացույցներն ու փաստերը, այս գործով մենք կբերենք վերաքննիչ բողոք` նոր երևան եկած հանգամանքով, և կստանանք նույն արդյունքը, ինչ այս պահին բողոքարկելու արդյունքում»,- ասաց Նիկոլայ Բաղդասարյանը: