Փաստ ինֆո

Կոտայքի մարզի ընդհանուր իրավասության դատարանի դատավոր Վաղինակ Մկրտչյանը բառացիորեն վայրկյաններ առաջ հրապարակեց դերասան Վարդան Պետրոսյանի գործով դատավճիռը:

Դրա համաձայն` դատարանը Վարդան Պետրոսյանին մեղավոր է ճանաչել 2013թ. հոկտեմբերի 20-ին Երևան-Եղվարդ ավտոճանապարհին տեղի ունեցած ավտովթարի համար` նրան դատապարտելով 5 տարվա ազատազրկման:

Դերասանը մեղադրվում է ճանապարհային երթևեկության կամ տրանսպորտային միջոցների շահագործման կանոնները խախտելու մեջ, որն անզգուշությամբ առաջացրել է երկու կամ ավելի մարդու մահ:

Հիշեցնենք` վթարի հետևանքով զոհվել էին հորեղբորորդիներ Էդգար և Էդուարդ Հակոբյանները:

Մեղադրող դատախազը նախապես դատարանից պահանջել էր Վարդան Պետրոսյանի նկատմամբ կիրառել 6.5 տարվա ազատազրկում: Միաժամանակ դատարանի վճռով Վարդան Պետրոսյանը զրկվեց 2 տարի ավտոմեքենա վարելու իրավունքից, մինչդեռ դատախազը 3 տարի էր պահանջել:

Դատարանը առանց քննության թողեց նաև տուժողների ներկայացուցիչների` Վարդան Պետրոսյանից կրած վնասների ու կատարած ծախսերի դիմաց փոխհատուցման ներկայացրած քաղաքացիական հայցերը: Փոխարենը 1 200 000 դրամի չափով բավարարեց Գյուղատնտեսության նախարարության ԾԻԳ-ի աշխատակից Հայկազ Կարապետկյանի քաղհայցը, քանի որ, հիշեցնենք, տուժող Արթուր Հակոբյանի վարած Նիվա ավտոմեքենան պատկանում էր այդ հիմնարկին:

Վարդան Պետրոսյանի պատժի կրումը կհաշվարկվի նրան կալանավորելու օրվանից` 2013թ. նոյեմբերի 6-ից: