Փաստ ինֆո

Ստրասբուրգում՝ Մարդու իրավունքների եվրոպական դատարանի Մեծ պալատում քիչ անց կսկսվի «Փերինչեքն ընդդեմ Շվեյցարիայի» գործով վճռի դեմ Շվեյցարիայի բողոքի գործի քննությունը։

«Փաստինֆո»-ի թղթակցին Կանադայի «Զորյան ինստիտուտ»-ի հիմնադիր և նախագահ Գրեգ Սարգսյանը հայտնել է, որ «Փերինչեքի այս դատավարությունը և ցեղասպանության ուրացման հարցը մեզ համար գլխավոր նյութ է, քանի որ Զորյան ինստիտուտի գործունեության 3 հիմնաքարերն են Ցեղասպանությունը, Սփյուռքը և Հայաստանը»:

Գրեգ Սարգսյանն ընդգծել է, որ Փերինչեքն ընդդեմ Շվեյցարիայի վճռից հետո հստակ է դարձել, որ «Զորյան ինստիտուտ»-ը, հայկական գլխավոր քաղաքական, ակադեմակիական և հասարակական հաստատությունները պետք է ներգրավված լինեն այս մասշտաբի և կարևորության հարցին առնչվող գործում։

«Այսպիսի որոշումը խեղաթյուրում է պատմական իրականությունը, այն «Ցեղասպանություն» կոչելու իրավունքը, որի համար պետք էր, որ գործում ներգրավվեին այս հարցով զբաղվող բոլոր հայկական հաստատությունները։ Փերինչեքի հայտարարությունների գլխավոր նպատակը ոչ թե ազատ խոսքն էր, այլ մասնավորապես հայության նկատմամբ ատելության սերմանումը»,- ընդգծել է  Գրեգ Սարգսյանը:

Նա հայտնել է, որ իրենց հետ աշխատում են 2 իրավական թուրքական կազմակերպություններ։ «Զորյան ինստիտուտը» և թուրքական իրավական կազմակերպությունները միասնաբար մասնակցում են Փերինչեքի դատին. կարևոր է, որ Թուրքիայի հասարակությունը հասկանա, որ ատելության սերմանումը Փերինչեքի նման անձանց կողմից վնասում է Թուրքիայի ժողովրդավարացմանը։

Գիտությունների դոկտոր, Թուրքիայի Աշխատավորական կուսակցության առաջնորդ Դողու Փերինչեքը դատապարտվել էր Ցեղասպանության ժխտման համար. նա  2005 թվականի մայիսին, հուլիսին և սեպտեմբերին Շվեցարիայում մասնակցել էր տարբեր կոնֆերանսների, որոնց ընթացքում հրապարակայնորեն ժխտել էր, որ 1915 թվականին և դրանից հետո Օսմանյան կայսրությունը ցեղասպանություն է իրականացրել հայ ժողովրդի դեմ: Նա հայկական ցեղասպանության գաղափարը համարել էր «միջազգային սուտ»:

Սակայն Մարդու իրավունքների եվրոպական դատարանը Փերինչեքն ընդդեմ Շվեյցարիայի գործով կայացված վճռում ճանաչել էր Մարդու իրավունքների եվրոպական կոնվենցիայի 10-րդ հոդվածով (խոսքի ազատություն) երաշխավորված խոսքի ազատության իրավունքի խախտում:

Շվեյցարիան բողոքարկել է ՄԻԵԴ վճիռը ՄԻԵԴ Մեծ պալատ:

Հայաստանը գործում ներգրավվել է որպես երրորդ կողմ: