Փաստ ինֆո

 

2014թ. ընթացքում կարևորագույն իրադարձությունը Հայաստանի Հանրապետության կողմից Եվրասիական տնտեսական միությանը միանալու գործընթացի հաջող ավարտն էր, ինչը բխում էր ՀՀ ռազմավարական շահերից, նոր հնարավորություններ են բացվում երկրի տնտեսական զարգացման համար: Այս մասին այսօր հայտարարեց ՀՀ արտաքին գործերի նախարար Էդվարդ Նալբանդյանը՝ ներկայացնելով անցյալ դիվանագիտական տարվա ընթացքում կատարված աշխատանքները:  

 

Նախարարը նշեց, որ 2014թ. Հայաստանը շարունակել է ԵԱՀԿ Մինսկի խմբի համանախագահ երկրների հետ համատեղ ջանքերն՝ ուղղված Լեռնային Ղարաբաղի հիմնախնդրի բացառապես խաղաղ կարգավորմանը: 

 

«Ղարաբաղյան հակամարտության գոտում զինադադարի հաստատման 20-րդ տարեդարձին Ադրբեջանի կողմից ռազմատենչ հռետորաբանությունը, հրադադարի ռեժիմի բազմաթիվ կոպտագույն խախտումները, անընդմեջ կրկնվող դիվերսիոն գործողությունները Հայաստանի ու Ադրբեջանի սահմանին ու Արցախ-Ադրբեջան շփման գծում նոր թափ ստացան, որոնք Բաքվի ապակառուցողական կեցվածքի բանակցային գործընթացի էությունը խեղաթյուրող հայտարարությունները, միջնորդների առաջարկությունների շարունակական մերժման հետ միասին թույլ չտվեցին առաջընթաց գրանցել ինչպես հիմնախնդրի կարգավորման հիմնարար սկզբունքների շուրջ համաձայնության հասնելու, այնպես էլ վստահության ամրապնդման վերաբերյալ միջազգային հանրության կոչերն իրականություն դարձնելու գործում»,- նշեց  Հայաստանի արտաքին քաղաքական գերատեսչության ղեկավարը:

 

Օգոստոս, սեպտեմբեր և հոկտեմբեր ամիսներին համանախագահ երկրները, նախ Ռուսաստանի նախագահը Սոչիում, այնուհետև Միացյալ Նահանգների պետքարտուղարը Նյուպորտում և Ֆրանսիայի նախագահը Փարիզում, Հայաստանի և Ադրբեջանի ղեկավարների մասնակցությամբ կազմակերպեցին գագաթաժողովներ` լարվածությունը նվազեցնելու, իրավիճակի հետագա սրումը կանխելու և հիմնախնդրի կարգավորման գործընթացը առաջ մղելու համար  բարենպաստ պայմաններ ստեղծելու նպատակով:

 

«Լեռնային Ղարաբաղի պաշտպանության բանակի ուսումնավարժական թռիչք իրականացնող ուղղաթիռի խոցումը, ուղղաթիռի անկման վայրը շուրջ 10 օր շարունակ կրակի տակ պահելը, միջազգային մարդասիրական իրավունքի խախտման Ադրբեջանի հանցավոր կեցվածքը  զգալի լարվածություն առաջացրեցին, ինչը համապատասխան արձագանք ստացավ միջազգային հանրության կողմից»,- ասաց նախարարը՝ հավելելով, որ  Հայաստանի դիվանագիտությունը շարունակեց ջանքերը՝ իրավիճակի հետագա սրումը կանխելու և միջազգային հանրության  ուշադրությունը Ադրբեջանի արկածախնդիր քաղաքականության վրա հրավիրելու նպատակով, արտգործնախարարությունն ու մեր դիվանագիտական ներկայացուցչությունները Սփյուռքի կառույցների հետ համատեղ շարունակել են հետևողական ջանքերը  գործադրել Հայաստանում և արտերկրում Հայոց ցեղասպանության 100-րդ տարելիցի միջոցառումների կազմակերպման ուղղությամբ՝ ի կատարումն Հայաստանի նախագահի համապատասխան հրամանագրի և հանձնարարականների: Շարունակվել են աշխատանքները Հայոց ցեղասպանության ճանաչման ու դատապարտման, մարդկության դեմ հանցագործությունների կանխարգելման ուղղությամբ:  

 

2014թ. ՀՀ արտաքին գործերի նախարարությունը շարունակել է աշխատանքները երկրի արտաքին անվտանգության բաղադրիչի ամրապնդման, պետության զարգացման համար արտաքին բարենպաստ պայմանների և երաշխիքների ապահովման, տարբեր մայրցամաքներում Հայաստանի բարեկամների թվի ավելացմանը, միջազգային կազմակերպություններում և գործընթացներում ներգրավվության խորացման, բարեկամ և գործընկեր երկրների հետ համագործակցության զարգացմանը, միջազգային ասպարեզում Հայաստանի հեղինակության և դիրքերի ամրապնդման, արտերկրում Հանրապետության ու նրա քաղաքացիների շահերի պաշտպանության, հայկական մշակութային ժառանգության պահպանման, միջազգային հարաբերություններում դրական օրակարգ ձևավորող և մեր շահերին համահունչ նախաձեռնությունների իրականացման   ուղղությամբ՝ ՀՀ նախագահի ուրվագծած արտաքին քաղաքականության ուղենիշների ու նրա կողմից տրված հանձնարարականների հիման վրա: