Փաստ ինֆո

Այսօր խորհրդարանում Գյումրիում դաժան սպանության հետ կապված խորհրդարանական լսումների մեկնարկին ներկաները մեկ րոպե լռությամբ հարգեցին Ավետիսյանների ընտանիքի հիշատակը: Հաշվի առնելով մասնակիցների և լրատվամիջոցների ներկայացուցիչների զգալի քանակը՝ ընդդիմադիր պատգամավորների կողմից եղան առաջարկներ՝ քննարկումները տեղափոխել ԱԺ նիստերի դահլիճ:

Սակայն լսումների կազմակերպիչը՝ ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը, նշեց, որ քննարկումներն իրականացնելու համար կպահանջվի 2 ժամ և առաջարկեց շարունակել քննարկումը և զերծ մնալ տարբեր շահարկումներից:

Հիմնական զեկուցողը ՀՀ գլխավոր դատախազ Գևորգ Կոստանյանն է, ում հակիրճ խոսքից հետո պատգամավորներն ստացել են նրան հարցեր ուղղելու հնարավորություն, սակայն զրկված են ելույթ ունենալու իրավունքից, ինչը ևս առաջացրեց որոշ ընդդիմադիր պատգամավորների դժգոհությունը:

Հանձնաժողովի նախագահ Հ.Սահակյանը, համենայնդեպս, նրանց վստահեցրեց, որ լսումների՝ նախապես մշակված ընթացակարգը չի խանգարի, որպեսզի բոլոր ցանկացողները հարցեր ուղղեն հիմնական զեկուցողին: Այս պահին պատգամավորները փորձում են գլխավոր դատախազից ստանալ հստակ պատասխաններ և, ինչպես նկատեց «Ժառանգություն» խմբակցության Ռ.Հակոբյանը, ինքն իրեն հարց է տալիս, թե պատգամավորները մինչ այժմ ի՞նչ չգիտեին, որ գլխավոր դատախազն ասաց, և նշեց, որ իրենք ակնկալում էին, որ փակ քննարկում տեղի կունենա, որի ընթացքում պատգամավորները կկարողանային նաև իրենց խոսքն ասել:

Գլխավոր դատախազն իր խոսքում  մասնավորապես նշեց, որ այս հարցում չի կարող զգայական մոտեցում չլինել, քանի որ ցանկացած մարդու, ցանկացած հայի համար Ավետիսյանների ընտանիքի դաժան սպանությունը շատ ցավոտ հարց է դարձել վերջին օրերին: Սակայն, ինչպես նշեց Գ.Կոստանյանը, ինքը՝ որպես գլխավոր դատախազ, չի կարող առաջնորդվել զգայկական մոտեցումներով և պարտավոր է առաջնորդվել բացառապես օրենքների շրջանակներում ձևավորված մոտեցումներով:

Նա նաև նշեց, որ իր համար անընդունելի են ինչ-ինչ անձնական, քաղաքական շահերից ելնելով մոտեցումները: Ի պատասխան պատգամավորների հարցերին՝ մասնավորապես կապված Պերմյակովին հայկական կողմին հանձելու հասարակության պահանջի հետ, Գ.Կոստանյանը նշեց, որ տարածքային և անձի իրավազորության խնդիր կա: 

Ըստ նրա՝ թեև ռազմաբազայի տարածքը ՌԴ տարածքը չէ, բայց տվյալ տարածքում գործում է ՌԴ իրավազորությունը՝ համաձայն 1997թ. միջպետական պայմանագրի:

Գլխավոր դատախազը նշեց նաև, որ անձի հանձնման, արտահանձնման և գործի վարույթի փոխանցման հետ կապված բոլոր փոխհարաբերությունները կարգավորվում են այլ միջազգային պայմանագրերով:

Գ.Կոստանյանը նշեց նաև, որ հանձնման հետ կապված որևէ հարց այս փուլում չի քննարկվում: 

«Ժառանգություն»  խմբակցության պատգամավոր Զ.Փոստանջյանի հարցին ի պատասխան՝ Կոստանյանը կրկնեց, որ երբ գործի շրջանակներում ձեռք կբերվեն բոլոր ապացույցները, այդ թվում՝ զինծառայող Պերմյակովին հանցագործությունից հետո հայտնաբերելու ընթացակարգի հնարավոր խախտումների վերաբերյալ ապացույցները, հետագա ընթացք կտրվի, քանի որ ներկայումս բոլոր կոմպլեքս հարցերը քննարկվում են:

Գ.Կոստանյանը հայտնեց, որ չի պատրաստվում ներկայացնել նախաքննության գաղտնիք հանդիսացող որևէ հանգամանք կամ քննչական գործողությունների ծրագիրը, սակայն վստահեցրեց, որ ՌԴ գլխավոր դատախազին կդիմի միայն բավարար իրավական հիմքեր ունենալու դեպքում: