Փաստ ինֆո

Հայ ընտանիքի 6 անդամների՝ Գյումրիում կատարված սպանության գործով ավարտվել է իրավաբանությունը և սկսվել է «քաղաքական որոշման արդյունքում իրավական սպեկուլյացիայի» փուլը:

Նման կարծիք այսօր լրագրողների հետ հանդիպմանը հայտնեց փաստաբան Նորայր Նորիկյանը` նշելով, որ դրա մեկնարկը տրվել է ՀՀ Գլխավոր դատախազությունը` երեկ տարածված հաղորդագրությամբ։

Փաստաբանի համոզմամբ՝ գործի քննությունը պետք է իրականացվեր Հայաստանում, քանի որ այս հարցը կարգավորվում է ՀՀ և ՌԴ միջև 1995 և 1997 թվականների կնքված «Հայաստանի Հանրապետության տարածքում ռուսաստանյան բազայի գտնվելու հետ կապված գործերով իրավասության և փոխադարձ իրավական օգնության հարցերի մասին» համաձայնագրով, որի 4-րդ հոդվածի համաձայն՝ ռուսաստանյան ռազմական բազայի կազմում ընդգրկվող անձանց կողմից Հայաստանի Հանրապետության տարածքում կատարված հանցագործությունները ենթակա են Հայաստանի Հանրապետության իրավասու մարմինների քննությանը՝ հայաստանյան օրենսդրությամբ սահմանված կարգով։

Նույն փաստաթուղթը հստակ սահմանում է նաև այն դեպքերը, երբ գործի քննությունը պետք է կատարվի Ռուսաստանի կողմից: Նորայր Նորիկյանի խոսքով՝ դրանք այն դեպքերն են, երբ հանցագործությունը կատարվել է ռուսական ռազմաբազայի տարածքում, կատարվել է զինվորական հանցագործություն և հանցագործը ձերբակալվել է ռազմաբազայի տարածքում:

Մինչդեռ, տվյալ դեպքում, ըստ փաստաբանի, «հանցագործությունը կատարվել է ՀՀ տարածքում և նա չի կատարել զինվորական կարգի դեմ ուղղված հանցագործություն, այլ մտել է խաղաղ տուն, ընտանիքին գնդակահարել և դուրս եկել: Ոչ մի ՌԴ Սահմանադրություն գոյություն չունի, ոչ մի 61-րդ հոդվածի հղում տալու խնդիր չկա: Ցանկացած անձ, ով խախտել է տվյալ երկրի պետական սահմանը, պետք է հանձնվի այդ պետության իրավապահ մարմիններին, իսկ ՀՀ իրավասու մարմինները պետք է պատասխան տան, թե ինչո՞ւ է այդ տղան տարվել ռազմաբազա»:

«Բոլորս հասկանում ենք, որ այս հանցագործությունն սկսվել, շարունակվել և, ցավոք սրտի, ավարտվել է ՀՀ տարածքում։ Հարց. Ի՞նչ կապ ունի և ի՞նչ իրավազորություն ունի անկախ և ինքնիշխան ՀՀ տարածքում ՌԴ սահամանադրությունը և նրա 61-րդ հոդվածը։ Հարց. Ո՞ր իրավական հիմքով էին ռուսական ռազմաբազայի զինծառայողները զինված շրջում ՀՀ տարածք հանդիսացող Գյումրի քաղաքում և «որոնում» հանցագործությունը կատարող անձին։ Հարց. Ո՞ր իրավական հիմքով է հանցագործության մեջ կասկածվող անձը հայտնաբերումից հետո տեղափոխվել ռուսական ռազմաբազա։ Այստեղ ուզում եմ ձեր ուշադրությունը հրավիրել հետևյալ հանգամանքի վրա. «Սահմանապահ զորքերի մասին» ՀՀ օրենքի 7-րդ հոդվածի համաձայն՝ սահմանապահ զորքերն իրավունք ունեն հանցագործություն կատարելու կասկածանքով ձերբակալված անձանց, իրավասու մարմինների քննությանը ենթակա անձանց պահել սահմանապահ զորքերի հատուկ սարքավորված տեղերում, անհրաժեշտության դեպքում այդ անձինք կարող են տարվել Ազգային անվտանգության և Ներքին գործերի մարմինների ժամանակավոր պահման մեկուսարաններում»,- ասաց փաստաբանը: