Փաստ ինֆո

Հայաստանում Ռուսաստանի ֆեդերալ անվտանգության ծառայության սահմանապահ վարչությունը ներկայացրել է Գյումրիում Ավետիսյանների սպանության մեջ կասկածվող Պերմյակովի ձերբակալության մանրամասները:  

Այսպես, կառույցի մամլո ծառայության հաղորդագրության համաձայն՝ ռուսաստանցի սահմանապահները հայ-թուրքական սահմանն ապօրինի հատելու փորձ կատարելիս ձերբակալել են զինծառայողին, ով կասկածվում է առանձնապես ծանր հանցագործություններ կատարելու մեջ:  

«Գյումրի քաղաքում դեպքերի հետ կապված Հայաստանում Ռուսաստանի ՖԱԾ սահմանապահ վարչության աշխատակիցները սահմանապահ ծառայությունը կատարել են ուժեղացված ռեժիմով: Հայ-թուրքական սահմանի ողջ տեղամասը, սպաների գլխավորությամբ, սահմանապահ հաշվարկների կողմից փակվել է՝ Թուրքիայի տարածք սահմանախախտի հնարավոր մուտք գործելու դեպքի համար»:  

Լենինականի սահմանապահ ջոկատի զինծառայողներից կազմված սահմանապահ հաշվարկը հունվարի 13-ին՝ ժամը  00:15 րոպեին 2000մ հեռավորության վրա բացահայտել է անհայտ անձի, ով շարժվում էր պետական սահմանի ուղղությամբ: Սահմանապահ հաշվարկին մոտ թողնելով անհայտ անձին՝ հաշվարկի ավագը «կանգնիր» հրամանն է տվել, սակայն սահմանախախտը շարունակել է շարժումը:

Ավելի ուշ սահմանապահը տվել է «կանգնիր, կկրակեմ» հրամանը, նրան դա էլ չի կանգնեցրել: Հետո հաշվարկի ավագը մեկ կրակոց է արձակել՝ նախազգուշական կրակոց օդ АК-74 տեսակի ինքնաձիգից, ստիպել սահմանախախտին պառկել գետնին՝ դեմքով դեպի ներքև:

Նախազգուշական միջոցներ ձեռնարկելով՝ Բայանդուր բնակավայրից 700մ ավելի հյուսիս սահմանապահները ձերբակալել են անհայտ անձին:

Սահմանախախտը քաղաքացիական հագուստով էր: Անձնական զննման արդյունքում չեն հայտնաբերվել անձը հաստատող փաստաթղթեր, նրա մոտ կար երեք բջջային հեռախոս, էլեկտրական լուսարձակ, 6000 դրամ:

 Ֆիլտրացիոն միջոցառումների ընթացքում հաստատվել է, որ ձերբակալվածը 102 ռազմական հենակետի շարքային Վ.Պ. Պերմյակովն է:
 
Սահմանապահ վարչության պետի, գեներալ-մայոր Վ.Վ.Բիրյուկովի  որոշմամբ՝ ձերբակալվածը փոխանցվել է ռազմական հենակետի հրամանատարին՝ կայազորի զինվորական կայազորի և զինվորական քննչական բաժնի ներկայացուցիչների ներկայությամբ»,- նշվում է հաղորդագրության մեջ:

Հիշեցնենք, որ Շիրակի մարզի Գյումրի քաղաքում երկուշաբթի, հունվարի 12-ին տեղի է ունեցել մի ամբողջ ընտանիքի դաժան սպանություն:

Զոհերի թվում է  երկու տարեկան երեխան: Ինքնաձիգից արձակված կրակոցներով գնդակահարվել են մեկ ընտանիքի անդամները՝ Սերյոժա Կարապետի Ավետիսյանը, Հասմիկ Ռաֆայելի Ավետիսյանը, Արմեն Սերգեյի Ավետիսյանը, Արաքսյա Անդրանիկի Ավետիսյանը, Աիդա Սերգեյի Ավետիսյանը և երկու տարեկան աղջիկ երեխան՝ Հասմիկ Արմենի Ավետիսյանը: Ընտանիքի ևս մեկ անդամը՝ վեց ամսական Սերյոժա Արմենի Ավետիսյանը ծանր վիճակում տեղափոխվել  հիվանդանոց:  

Դեպքի վայրում հայտնաբերվել են՝ «AK-74» ինքնաձիգ,  5,45 մմ տրամաչափի փամփուշտներ և պահունակ՝ փամփուշտներով, ինչպես նաև զինվորական կոշիկներ, որի վրա գրված էր «Պերմյակով» ազգանունը: Ընտանիքի ոսկեղենը, որը գտնվում էր տեսանելի տեղում, չի կորել: Այդ պատճառով քննությունը դեռևս բացառում է ավազակային հարձակման վարկածը:

Դեպքի օրը ՀՀ նախագահ Սերժ Սարգսյանն անց է կացրել սելեկտորային խորհրդակցություն իրավապահ մարմինների ղեկավարների հետ:
 
«Հայաստանում տեղակայված ռուսաստանյան ռազմական հենակետի հրամանատարությունը լիովին համագործակցում է Հայաստանի իրավապահ մարմինների հետ: Քննությունը գտնվում է երկրի ղեկավարի անձնական հսկողության ներքո»,- ասվում էր ՀՀ նախագահի մամուլի ծառայության հաղորդագրության մեջ: