Փաստ ինֆո

ՀՀ առողջապահության նախարարության լրատվական ծառայությունից հայտնում են, որ վերջին շրջանում «Կապանի բժշկական կենտրոն» ՓԲԸ է հոսպիտալացվել 4 հիվանդ, որոնց մոտ կասկածվել է «սուր հեպատիտ C»։ Ավելի ուշ պարզվել է, որ բոլոր հիվանդները դրանից առաջ տարբեր վիրահատություններ են ստացել «Քաջարանի բժշկական կենտրոն»-ում: Նույն ժամանակահատվածում Քաջարանում վիրահատված ևս մեկ հիվանդ էլ հոսպիտալացվել է «Նորք» ինֆեկցիոն հիվանդանոց:

Այս դեպքերից հետո առողջապահության նախարարի հրամանով Քաջարանի հիվանդանոցում կատարվել են նմուշառումներ: Արդյունքում, ըստ պաշտոնական աղբյուրի` «վիրաբուժական բաժանմունքից բժշկական գործիքների մանրէազերծման որակի վերաբերյալ վերցված 60 նմուշից 13-ում (21.6%), ախտահանման որակի 60 նմուշից 5-ում (8.3%), մանկաբարձագինեկոլոգիական բաժանմունքից բժշկական գործիքների մանրէազերծման որակի վերաբերյալ վերցված 40 նմուշից 8-ում (20%) հայտնաբերվել են շեղումներ», ասել է թե` գործիքները պատշաճ մակարդակովմանէազերծված չեն եղել, և բժիշկները դրանցով վիրահատել ու վարակել են պաշտոնական տվյալներով 5 հիվանդների:

Առողջապահության նախարարությունից հայտնում են, որ ԱՆ Առողջապահական պետական տեսչության կողմից նյութեր են նախապատրաստվել վարչական վարույթ հարուցելու համար, իսկ, նախարարության մասնագետների մասնակցությամբ, Սյունիքի մարզպետարանում ստեղծվել է հանձնաժողով, որը կազմակերպել է «Քաջարանի բժշկական կենտրոնում» վիրահատական բժշկական միջամտություն ստացած հիվանդների և բուժանձնակազմի՝ «հեպատիտ C»-ի նկատմամբ լաբորատոր հետազոտություններ: 

Հետազոտվել են հիվանդանոցի 22  աշխատակիցներ և 18 հիվանդներ: Հիվանդներից 3-ի մոտ ևս հայտնաբերվել է «հեպատիտ C»:

Հետազոտությունները դեռ ավարտված չեն: Վարչական վարույթի արդյունքում հնարավոր կլինի պարզել՝ արդյոք վարակն, իսկապես, ներհիվանդանոցային բնույթ ունի: