Փաստ ինֆո

Եվրամիության անդամ երկրների արտգործնախարարները հունվարի 19-ին քննարկելու են ահաբեկչության դեմ պայքարի խնդիրը՝  Փարիզում հարձակման հետ կապված: 

«ՏԱՍՍ»-ի փոխանցմամբ,  «Charlie Hebdo» ֆրանսիական երգիծական ամսագրի աշխատակիցների գնդակարության մեջ կասկածվողները  հայտնաբերվել են Փարիզից  դեպի հյուսիս 80 կմ հեռավորության վրա: «France-Presse» գործակալությունը հաղորդում է, որ նկարագրության հետ համընկնող երկու զինված անձինք նկատվել են Վիլլիե-Կոտտերում, Էն դեպարտամենտում:

«ՏԱՍՍ»-ն անդրադարձել է  ահաբեկչական ակտի վերաբերյալ միջազգային արձագանքներին: Այսպես, Մեծ Բրիտանիայի ԱԳՆ ղեկավար Ֆիլիպ Համմոնդը կարծիք է հայտնել, որ հանցագործների համար շաբաթաթերթի խմբագրության վրա հարձակման դրդապատճառ է հանդիսացել Մերձավոր Արևելքում  ծավալված դիմակայությունը Արևմուտքի և  «Իսլամական պետություն» խմբավորման միջև: Մեծ Բրիտանիան բարձրացրել է անվտանգության աստիճանը սահմաններին՝  Փարիզում ահաբեկչական ակտի հետ կապված: Լոնդոնը նաև հակատեռորիստական ստորաբաժանման փորձագետներ է ուղարկել Ֆրանսիա:

«ՅՈՒՆԵՍԿՕ»-ի շտաբ-բնակարանում Ֆրանսիայի հետ համերաշխություն է  հայտնվել: Միջազգային կազմակերպության կոմյունիկեում, որը ստացել է «ТАСС»-ը,  կոչ է արվում բոլոր ԶԼՄ-ներին՝ միանալ սգին:

Ռուսաստանի ու Ֆրանսիայի արտգործնախարարներ Սերգեյ Լավրովն ու Լորան Ֆաբիուսը հեռախոսային խոսակցության մեջ նշել են, որ Փարիզում ահաբեկչական ակտը հաստատում է այդ սպառնալիքի դեմ  պայքարում  համատեղ ջանքերի անհրաժեշտությունը:

Իսկ իտալական լրագրողական ասոցիացիաները՝ ներառյալ Արտասահմանյան մամուլի ասոցիացիան, հայտարարել են ջահերով  երթ անցկացնելու մասին՝ զոհված ֆրանսիացի գործընկերների  հիշատակին: Ակցիան տեղի կունենա այսօր, տեղի ժամանակով ժամը  18:00-ին,  Ֆարնեզե հրապարակում համանուն պալատի դիմաց, որտեղ գտնվում է Հռոմում Ֆրանսիայի դեսպանությունը:

Ահաբեկչական ակտերը խիստ դատապարտել է Արտասահմանյան մամուլի ասոցիացիան Իտալիայում: Այն միավորում է Իտալիայում աշխատող տարբեր երկրների մոտ 400  լրագրողների:

Ամսագրի խմբագրության վրա հարձակումից հետո  զսպվածություն ու շրջահայացություն դրսևորելու կոչ է արել Գերմանիայի արդարադատության և սպառողների իրավունքների պաշտպանության նախարար Հայկո Մաասը: «Մենք թույլ չենք տա ահաբեկիչներին  զրկել մեզ ազատությունից ու իրավական պետականությունից», - հայտարարել է նա Բեռլինում: Նա քննադատության է ենթարկել  ահաբեկչական ակտի հետ կապված մի շարք կուսակցությունների ու կազմակերպությունների ներկայացուցիչների հայտարարությունները մուսուլմանների դեմ   ընդհանրապես  միջոցներ ձեռնարկելու նպատակահարմարության մասին: «Մուսուլմանները չպետք է գտնվեն կասկածանքի տակ՝ ամբողջությամբ վերցրած»,- ընդգծել է նախարարը՝ նշելով, որ «իսլամաֆոբիայի համար պատճառներ չկան»:  Մաասն եզրահանգել է. «Մենք չպետք է թույլ տանք, որ մեր հասարակությունը  բաժանված լինի, և մենք հստակ կցուցադրենք, որ ահաբեկչությունն ընդհանուր ոչինչ չունի իսլամի հետ: Մենք չպետք է թույլ տանք մշակույթների պայքար»: