Փաստ ինֆո

Գերմանիայի իշխանությունները վերանայել են եվրոգոտուց Հունաստանի դուրս գալու հարցում իրենց դիրքորոշումը և, խիստ անհրաժեշտության դեպքում, համաձայն են նման սցենարի հետ:

Այս մասին հունվարի 3-ի հրապարակման մեջ հայտնել է գերմանական Spiegel հանդեսը՝ վկայակոչելով երկրի կառավարությունում իր աղբյուրները:

Լրատվամիջոցը հայտնում է, որ Գերմանիայի կանցլեր Անգելա Մերկելը և ֆինանսների նախարար Վոլֆգանգ Շոյբլեն հանգել են այն եզրակացության, որ Հունաստանի դուրս գալը եվրոգոտուց ընդունելի տարբերակ է: Նախկինում նրանք հակառակ տեսակետին էին, սակայն եվրոգոտու կողմից ճգնաժամի հաղթահարումը թույլ է տվել նրանց փոխել իրենց կարծիքը:

Ի դեպ, պաշտոնական աղբյուրներն այս հրապարակմանը որևէ ձևով առայժմ չեն արձագանքել:

Ըստ Spiegel-ի, Գերմանիայում գտնում են, որ Հունաստանն անխուսափելիորեն կլքի եվրոգոտին այդ երկրում արտահերթ խորհրդարանական ընտրություններում ձախ արմատական ուժերի կոալիցիայի առաջնորդ Ալեքսիս Ցիպրասի հաղթանակի դեպքում: Նա խոստացել է հրաժարվել կոշտ տնտեսական միջոցներից և հասնել միջազգային վարկատուների հետ համաձայնությունների վերանայմանը:

Նշենք, որ հունական խորհրդարանին դեկտեմբերի 29-ին չհաջողվեց 3-րդ փուլում ընտրել Հունաստանի նախագահին: Միակ թեկնածուն՝ նախկին եվրոկոմիսար Ստավրոս Դիմասը, անհրաժեշտ 180 ձայնի փոխարեն, ստացել է միայն 168 խորհրդարանականների ձայները: Արդյունքում՝ Հունաստանում հունվարի 25-ին տեղի կունենան արտահերթ խորհրդարանական ընտրություններ:

Հիշեցնենք, ճգնաժամի հաղթահարման համար Հունաստանը ԵՄ-ից և ԱՄՀ-ից ընդհանուր առմամբ 240 մլրդ եվրո գումար է ստացել: Իսկ այդ երկրի ՀՆԱ-ի ցուցանիշը 2008թ-ից ի վեր կրճատվել է 25%-ով: