Փաստ ինֆո

Մի քանի օր է, ինչ հակառակորդը խախտում  է հրադադարի պահպանման ռեժիմը՝ Տավուշի մարզի Այգեպար գյուղի ուղղությամբ կրակելով խոշոր տրամաչափի զինատեսակներից:

Երեկ կեսօրին հակառակորդը մեկ տասնյակից ավելի կրակոց է արձակել գյուղի տների տանիքների ուղղությամբ:

Իսկ օրեր առաջ թշնամու գնդակը ուղղված է եղել գյուղապետ Անդրանիկ Այդինյանին:

Գյուղապետը մեզ հետ զրույցում նշեց, որ իր մեքենայով շրջել է գյուղում, երբ կրակոց է արձակվել իր ուղղությամբ: Բարեբախտաբար, թշնամու արձակած կրակոցներն այս օրերին բնակիչներից ոչ մեկին չեն դիպել:

Գյուղապետը մտահոգված է, որ գյուղի փողոցները չեն լուսավորվում, տներում բնակիչները վախենում են լույս վառել, վառելու դեպքում էլ թշնամին անմիջապես «արձագանքում է»:

Իսկ առջևում Ամանոր է, Երևանում՝ Հանրապետության հրապարակում և ամենուր տոնական տրամադրություն է, լույսեր են վառվում, իսկ Այգեպարում՝ բնակիչները նկուղներում են թաքնվում:

Կառավարությունն էլ իր հերթին որոշել ու այնպիսի գյուղեր է սահմանամերձ ճանաչել, որոնք  թշնամու կրակոցն անգամ չեն լսել: «Սահմանամերձ գյուղն ու հողը խառնվել է իրար, Տարածքային կառավարման նախարարությունում  աշխարհագրություն իմացող մի մարդ չկա, քարտեզը բացեն նայեն»,- նշում է գյուղապետը:

Հիշեցնենք, որ, կառավարության որոշմամբ, 2015թ. հունվարի 1-ից ՀՀ 4 մարզերի 32 համայնքներ ճանաչվել են սահմանամերձ: Տվյալ համայնքների բնակիչները գազի, էլեկտրաէներգիայի և ոռոգման ջրի դիմաց կվճարեն կես գին, իսկ գույքահարկ և հողի հարկ՝ ընդհանրապես չեն վճարի:

Այգեպարի գյուղապետը նշում է, որ շատ լավ է, իհարկե, որ նրանք որոշակիորեն օգտվում են այդ արտոնություններից, սակայն, ըստ նրա, սահմանամերձ են Մովսեսը, Այգեպարը, Չինարին և Ներքին Կարմիր աղբյուրը:

«Այգեպարն ընդամենը 400 մետր է հեռու հայ-ադրբեջանական սահմանից, իսկ գյուղեր և հողեր կան, որ 15 կմ հեռավորության վրա են գտնվում և ճանաչվել են սահմանամերձ»,- ասաց Անդրանիկ Այդինյանը:

Այդուհանդերձ, գյուղապետը չի հուսահատվում և, անկախ նրանից,  որ իրենք բնակվում են սահմանամերձ բնակավայրում, հուսադրում է համագյուղացիներին: