Փաստ ինֆո

«Տիկինը կարող է գալ դատական նիստին, բայց եթե անգամ Հիսուսի կինն էլ գա, միևնույն է, հաջողության հասնելու շանս չի ունենա»,- ցինիկաբար հայտարարել է Թուրքիայի Աշխատավորական կուսակցության նախագահ Դողու Փերինչեքը՝ անդրադառնալով այն փաստին, որ 2015-ի հունվարի 28-ին Մարդու իրավունքների եվրոպական դատարանում քննվելիք «Փերինչեքն ընդդեմ Շվեյցարիայի» գործի դատավարության ժամանակ Հայաստանի շահերը պաշտպանելու է հոլիվուդյան կինոաստղ Ջոջ Քլունիի կինը` հայտնի իրավապաշտպան Ամալ Քլունին:

Նշենք, սակայն, որ Ամալ Քլունին, ով ընդամենն սեպտեմբերի վերջին է ամուսնացել Ջորջ Քլունիի հետ և վերցրել նրա ազգանունը, մինչ այդ հայտնի է եղել որպես իրավաբան, ակտիվիստ, միջազգային իրավունքի, քրեական իրավունքի, մարդու իրավունքների և արտահանձնման ոլորտներում մասնագիտացած փաստաբան Ամալ Ալամուդին: Նա ներգրավված է եղել Հաագայի Միջազգային դատարանում, ՄԻԵԴ-ում, Լոնդոնի դատարանում՝ մի շարք խոշոր դատավարություններում: Մասնավորապես,  պաշտպանել է «WikiLeaks»-ի հիմնադիր Ջուլիան Ասանժի, Ուկրաինայի նախկին վարչապետ Յուլյա Տիմոշենկոյի շահերը: աշխատել է ՄԱԿ-ում Լիբանանի հարցերով հատուկ դատարանի դատախազի, ինչպես նաև նախկին Հարավսլավիայի հարցերով Միջազգային քրեական դատարանի հետ:

Եվ պատահական չէ, որ Հայոց ցեղասպանությունը ժխտած Փերինչեքի գործում որպես երրորդ կողմ ներգրավված Հայաստանի իրավական թիմում Ամալ Քլունիին ընդգրկելու մասին օրերս հայտնած «Կալիֆորնիա կուրիեր» (The California Courier) թերթի գլխավոր խմբագիր և հրատարակիչ Հարութ Սասունյանը գրել է, թե հաշվի առնելով Քլունիի մասնագիտական ներուժն ու փորձը, կարելի է  վստահաբար ասել, որ նա մեծ առավելություն կտա Հայաստանի իրավական խմբին՝ հունվարի 28-ին ՄԻԵԴ-ում «Փերինչեքն ընդդեմ Շվեյցարիայի» վերաքննության գործով:

«Որոշ ընթերցողներ կարող են հարց տալ, թե ինչպե՞ս է մի կին՝ «Էլլ» (Elle) ամսագրի նկարագրությամբ, ունենալով «շլացուցիչ տեսք և շքեղ մազեր, կրելով բաց հագուստներ, նորաձև տաբատներ, գույնզգույն կրունկներ», ներգրավվել նման բարդ իրավական հարցում: Շատ մարդիկ տեղյակ չեն, որ Ամալ Ալամուդինը, այժմ տիկին Քլունին, իր գեղեցիկ դեմքից առավել այլ բարձր արժանիքներ ունի նման կարևոր հանձնարարության համար»,-իր հոդվածում գրել է Հ.Սասունյանը:

Ամալ Ալամուդին-Քլունին ծնվել է 1978 թվականին Լիբանանում: Նա մահմեդական արաբ է: 1980թ-ին, երբ Լիբանանում մոլեգնում էր քաղաքացիական պատերազմը, նրա ընտանիքը տեղափոխվել է Մեծ Բրիտանիա: Նա իրավաբանական կրթությունը ստացել է Նյու Յորքի համալսարանի իրավաբանական ֆակուլտետում և աշխատել Արդարադատության միջազգային դատարանում: 2010 թ. Լոնդոն վերադառնալուց հետո նա դարձել է «Դաութի Սթրիթ Չեմբրս»-ի փաստաբան: Եղել է Սիրիայի հարցերով ՄԱԿ-ի հատուկ հանձնակատարի խորհրդականը, իսկ 2013 թվականին՝ ՄԱԿ-ի անօդաչու սարքերի քննությամբ զբաղվող խմբի փաստաբանը: Նա գերազանց տիրապետում է անգլերենին, ֆրանսերենին և արաբերենին: