Փաստ ինֆո

Վերնիսաժի մոտ կրակոցների գործով այսօր սկսվեց դատաքննությունը:

Այսպես, ըստ մեղադրանքի՝ Գոռ Առաքելյանը գործով չպարզված հանգամանքներում ապօրինի կերպով ձեռք է բերել և պահել հրազեն հանդիսացող գործարանային արտադրուրյան 9մմ տրամաչափի «Մակարով» տեսակի ատրճանակ ու 9մմ տրամաչափի ակոսափող հրազեններից կրակելու համար նախատեսված ռազմամթերք հանդիսացող փամփուշտներ:

Դրանց  գործադրմամբ 2014թ. մայիսի 17-ին՝ ժամը 13:20-ի սահմաններում, Երևան քաղաքի Վարդանանց փողոցի թիվ 18/2 շենքի ստորգետնյա ավտոկայանատեղիի մուտքի դարպասների մոտ խուլիգանական դրդումներով, շատերի կյանքի համար վտանգավոր եղանակով փորձել է ապօրինաբար դիտավորությամբ կյանքից զրկել Վալերիկ Հովհաննիսյանին և Ներսես Մելքոնյանին, ինչպես նաև անուղղակի դիտավորությամբ կյանքին վտանգ սպառնացող ծանր մարմնական վնասվածքներ է հասցրել Մնացական Սուքիասյանին ու Մյասնիկ Հայրապետյանին, իսկ Ալվինա Բադալյանին՝ միջին ծանրության վնաս՝ առողջության տևական քայքայումով։

Վալերիկ Հովհաննիսյանին և Ներսես Մելքոնյանին մեղադրանք է առաջադրվել առ այն, որ նրանք հիշյալ ավտոկայանատեղիի մուտքի դարպասների մոտ ավտոմեքենան կայանելու շուրջ վիճաբանել են Գոռ Առաքելյանի հետ, որի ընթացքում կոպիտ կերպով խախտելով հասարակական կարգն ու բացահայտ անհարգալից վերաբերմունք ցուցաբերելով հասարակության՝ շրջակայքում գտնվող անձանց նկատմամբ, ակնհայտորեն խախտելով վարքագծի համընդհանուր ճանաչում ստացած նորմերը՝ շուրջ հինգ րոպե տևողությամբ բարձրաձայն տվել են սեռական բնույթի հայհոյանքներ, ինչպես նաև իրենց խուլիգանական գործողությունները զուգորդել են բռնության գործադրմամբ. հարվածներ են հասցրել Գ.Առաքելյանին՝ պատճառելով առողջության թեթև վնասի հատկանիշներ չպարունակող մարմնական վնասվածքներ՝ ձախ նախաբազկի, ձախ դաստակի շրջանի քերծվածքների ձևով։

29-ամյա Գոռ Առաքելյանին մեղադրանք է առաջադրվել ՀՀ քրեական օրենսգրքի 34-104-րդ հոդվածի 2-րդ մասի 1-ին, 6-րդ, 10-րդ կետերով՝ խուլիգանական դրդումներով շատերի կյանքի համար վտանգավոր եղանակով երկու կամ ավելի անձանց սպանության փորձ, 112-րդ հոդվածի 2-րդ մասի 1-ին, 5-րդ, 9-րդ կետերով՝ խուլիգանական դրդումներով շատերի կյանքի համար վտանգավոր եղանակով երկու կամ ավելի անձանց նկատմամբ դիտավորությամբ առողջությանը ծանր վնաս պատճառելը, 113-րդ հոդվածի 2-րդ մասի 6-րդ կետով՝ խուլիգանական դրդումներով առողջությանը միջին ծանրության վնաս պատճառելը, և 235-րդ հոդվածի 1-ին մասով՝ ապօրինի կերպով զենք, ռազմամթերք 30-ամյա Վալերիկ Հովհաննիսյանին և 36-ամյա Ներսես Մելքոնյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով՝ մի խումբ անձանց կամ կազմակերպված խմբի կողմից խուլիգանություն:

Ամբաստանյալները հրաժարվեցին դիրքորոշում հայտնել մեղադրանքի հետ կապված:

Դատարանի սահմանած ապացույցների հետազոտման կարգի համաձայն՝ այսօր սկսվեց և ավարտվեց տուժողների հարցաքննությունը:

Տուժող Մնացական Սուքիասյանը հայտնեց, որ ինքը դեպքի օրը գտնվել է Վերնիսաժում, որտեղ գործիքների առուվաճառքով է զբաղվում, լսել է կրակոց, երկրորդ կրակոցն իրեն է դիպել, աջ ոտքից վիրավորվել է  ու վայր ընկել, որից հետո ոչինչ չի հիշում: Իրեն բուժօգնություն են ցուցաբերել տեղում, ապա  տեղափոխել հիվանդանոց, որտեղ զգացել է, որ ոտքի մեջ երկաթ են դրել, մինչև օրս գտնվում է բժիշկների հսկողության տակ:

Տուժողը հայտնեց, որ վիճաբանության ձայներ, հայհոյանքներ չի լսել, կրակողներին էլ չի տեսել: Տուժողը կարծում է, որ իր վրա չեն կրակել, պարզապես գնդակը փոխել է ուղղությունն ու դիպել իրեն:

Մինչդեռ նախաքննության ժամանակ տուժողը հայտնել էր, որ լսել է վիճաբանության ձայներ, գոռգոռոցներ ու հայհոյանքներ, սակայն վիճաբանողներին չի տեսել, նաև չի տեսել, թե ով է իր վրա կրակել:

Տուժող Մյասնիկ Հայրապետյանը հայտնեց, որ տեսել է, որ մարդիկ են հավաքվում, մեկից ավելի կրակոցի ձայներ է լսել, մտել մերձակա շենքի շքամուտք, որտեղ կրակոցից վիրավորվել է, մինչև հիմա գնդակը գտնվում է ոտքի մեջ: Շքամուտքում, ըստ նրա, մեկ կրակոց է լսել, կրակողներին չի տեսել: Նա նշեց նաև, որ անզգուշորեն են իրեն վնասվածք պատճառել:  

Մինչդեռ նախաքննության ժամանակ տուժողը հայտնել էր, որ շքամուտքում կրակոցներ է լսել, բայց նաև նշել է, որ կրակողին չի տեսել ու չգիտի, թե «ինչից է սկսվել այդ ամենը»:

Տուժող Ալվինա Բադալյանը, ով Վերնիսաժում էր աշխատում, հայտնեց, որ աղմուկ է լսել, սակայն բառերը չէին հասկացվում. ինքը հեռու էր գտնվում, ձախ ոտքի ներքևի մասից վիրավորվել է: Տուժողը գտնում է, որ գնդակն իրեն պատահական է դիպել:

Մինչ դատաքննությունն սկսելը դատարանը մերժեց պաշտպանական կողմի երկու միջնորդությունները՝ ամբաստանյալ Գոռ Առաքելյանի պաշտպան Երեմ Սարգսյանի միջնորդությունը մեղադրողին բացարկ հայտնելու և ամբաստանյալ Վալերիկ Հովհաննիսյանի պաշտպան Արայիկ Ալվանդյանի միջնորդությունը քաղաքացիական հիվանդանոցում բուժում ստանալու համար իր պաշտպանյալին գրավի դիմաց ազատ արձակելու մասին:

Արդեն հաջորդ տարի՝ հունվարի 22-ին կայանալիք դատական նիստում կսկսվի վկաների հարցաքննությունը, որից հետո կհետազոտվեն գործի գրավոր ապացույցները, վերջում կհարցաքննվեն ամբաստանյալները, եթե ցանկանան ցուցմունք տալ: