Փաստ ինֆո

Վերնիսաժի գործով այսօրվա դատական նստում ամբաստանյալ Գոռ Առաքելյանի պաշտպան Երեմ Սարգսյանը բացարկի միջնորդություն ներկայացրեց դատախազ Հարություն Սարգսյանին Բացարկի միջնորդության վերաբերյալ որոշում կայացնելու համար դատարանը հեռացավ խորհրդակցական սենյակ:

Ըստ պաշտպանի՝ մեղադրողն իր պաշտպանյալի նկատմամբ ունի կանխակալ վերաբերմունք, ուստի՝ չի կարող մասնակցել դատավարությունը:

Մասնավորապես, Երեմ Սարգսյանը նշեց, որ գործի քննությունը կատարվել է միակողմանի՝ Գոռ Առաքելյանի դեմ հնարավորինս ծանր մեղադրանք առաջադրելու միտումով:

Պաշտպանը նշեց, որ նախաքննության ընթացքում բազմաթիվ միջնորդություններ է ներկայացրել քննիչին՝ պահանջելով ճիշտ քրեաիրավական գնահատական տալ իր պաշտպանյալին մեղսագրվող արարքին, սակայն դրանք առանց որևէ հիմնավորման մերժվել են քննիչի կողմից, իսկ մեղադրողն էլ մերժել է այդ որոշումների դեմ իր ներկայացրած բողոքները:

Երեմ Սարգսյանը նշեց, որ Գոռ Առաքելյանի կնոջ և մանկահասակ երեխայի ներկայությամբ Գոռ Առաքելյանի նկատմամբ բռնություն է գործադրվել, և քննիչն ու դատախազը քննություն չեն տարել, թե արդյոք ամբաստանյալն արարքը կատարել է հոգեկան խիստ հուզմունքի վիճակու՞մ:

Որպես հիմնավորում պաշտպանը նշեց, որ իր պաշտպանյալի նկատմամբ նշանակվել է նյարդաբանի կոնսուլտացիա, նրա մոտ ախտորոշվել է «շարունակական սթրեսային նևրոտիկ վիճակ՝ իրավիճակով պայմանավորված ժամանակավոր հիշողության մասնակի կորուստ», ինչը վկայում է հոգեկան խիստ հուզմունքի առկայության մասին:

Միջադեպի հետևանքով ամբաստանյալի երկամյա դուստեր մոտ ախտորոշվել է հետտրավմատիկ սթրեսային վիճակ, երեխան երկար ժամանակ չի կարողացել խոսել, լավ չի քնում:

Այդ պայմաններում քրեական հետապնդումն իրականացնող մարմինը պարտավոր է նշանակել դատահոգեբանական փորձաքննություն, ինչը չի արել և մերժել է նաև պաշտպանական կողմի միջնորդությունը՝ դատահոգեբանական փորձաքննություն նշանակելու մասին՝ հոգեկան խիստ հուզմունքի վիճակը շփոթելով անմեղսունակության հետ:

Պաշտպանը պարզաբանեց, որ ըստ քննիչի եզրահանգման՝ Գոռ Առաքելյանը հաշվառված չէ նարկոլոգիական և հոգեբուժական դիսպանսերներում, որևէ հոգեկան հիվանդությամբ չի տառապում, ուստի՝ անհիմն է դատահոգեբանական փորձաքննություն նշանակելու միջնորդությունը:

Դատավարական հսկողությունն իրականացնող դատախազն էլ գտել է, որ քննիչը ճիշտ եզրահանգում է արել:

Մեղադրող Հարություն Սարգսյանը գտավ, որ պաշտպանի փաստարկները չեն համապատասխանում իրականությանը, որ հիշյալ միջնորդությունները մերժվել են հիմնավոր ձևով:

Ըստ նրա՝ նախաքննությամբ որևէ փաստական տվյալ ձեռք չի բերվել առ այն, որ դեպքի ժամանակ Գոռ Առաքելյանը գտնվել է հոգեկան խիստ հուզմունքի վիճակում: Ըստ մեղադրողի՝ պաշտպանը դեպքը ներկայացրել է յուրովի: